Урысые обществэу «ШIэныгъ» зыфиIорэм и Адыгэ шъолъыр къутамэ иIофшIэн къыдыхэлъытагъэу кIэлэцIыкIу лагерэу «Лань» зыфиIорэм кIэлэеджакIохэм апае мэхьанэшхо зиIэ лекцие щызэхащагъ.

Ащ темэу иIагъэр «Профессиональная ориентация как средство гражданско-патриотического воспитания обучающихся». Iофтхьабзэр зезыщагъэр Мыекъопэ къэралыгъо технологическэ университетым ипрофессорэу, социальнэ технологиехэм ыкIи шъолъыр (муниципальнэ) гъэIорышIэным ипрактикхэм я Академие итхьаматэу Азэщыкъ Геннадий.

НыбжьыкIэхэм яхэгъэгу инеущрэ мафэ зыфэдэщтым ылъэныкъокIэ пшъэдэкIыжьэу ахьырэр къагурыIоным, джащ фэдэу тарихъ шIэжьыр къызэтегъэнэгъэным япхыгъэ Iофыгъохэм къэзэрэугъоигъэхэр атегущыIагъэх. 

Лекцием къыдыхэлъытагъэу мэхьанэшхо зиIэ пооектитIу къагъэлъэгъуагъ, ахэм пэщэныгъэ адызэрехьэ МКъТУ-м ипрофессорэу Геннадий Хьасанбый ыкъом:

1. «Адыгеим зыкъэухъумэжьынымкIэ игъогу» — Адыгеим ипартизан движение итарихъ ашIэным, Хэгъэгу зэошхом ишIэжь къэухъумэгъэным афэгъэхьыгъэ IофшIэным кIэлэеджакIохэр ыкIи студентхэр къыхэгъэлэжьэгъэнхэм фэгъэхьыгъ.

2. «ТекIоныгъэм и Быракъ» — мы проектыр зыфэгъэхьыгъэр ТекIоныгъэм и Быракъ пылъ тарихъыр зэгъэшIэгъэныр, мыщ икопиехэр шIыгъэнхэр ыкIи ахэр Кавказ икъушхьэхэм адэхьыегъэнхэр ары. ТицIыфхэм языкIыныгъэ ыкIи ялIыблэнагъэ ащ къыреIотыкIы. 

Мы проектым игъэцэкIэнкIэ лекцием хэлэжьагъэхэм яшIогъэшхо къагъэкIуагъ: ныбжьыкIэхэм ежь аIэхэмкIэ ТекIоныгъэм и Быракъ икопие ашIыгъ, гуманитар IэпыIэгъоу СВО-м хэлажьэхэрэм афырагъэщэщтым ар игъусэу аIэкIагъэхьащт, ащкIэ тидзэкIолIхэм агу къыдащэещт.

КIэлэеджакIохэм ашIогъэшIэгъонэу лекцием едэIугъэх, упчIэхэр къатыгъэх. Азэщыкъ Геннадий къызэрэхигъэщыгъэмкIэ, ныбжьыкIэхэм пстэури ашIогъэшIэгъоныгъ, граждан-патриотическэ пIуныгъэм имэхьанэ дэгъоу къагурэIо.