Къэралыгъо фондэу «Хэгъэгум иухъумакIохэр» ыкIи обществэу «ШIэныгъ» зыфиIохэрэр кIэщакIо зыфэхъугъэхэ Урысые Iофтхьэбзэшхор тикъэралыгъо щырагъэкIокIы.

Мы патриотическэ проектым Адыгэ Республикэри хэлэжьэнэу ригъэжьагъ. ХэушъхьафыкIыгъэ дзэ операцием иветеранхэм ящысэкIэ къыткIэхъухьэрэ лIэужхэм яхэгъэгу шIу алъэгъоу пIугъэнхэм ар фэIорышIэ.

Мэзэ заулэ хъугъэу Урысыем ишъолъырхэм зэкIэми ащызэхащэрэ Iофтхьабзэхэм СВО-м иветеранхэр ныбжьыкIэхэм ащаIокIэх. ЛIыхъужъхэр опытэу аIэкIэлъымкIэ ахэм адэгуащэх, Урысыем ыкIи дунаим непэ ащыхъурэм еплъыкIэу фыряIэр къыраIотыкIы. Яхэгъэгу къаухъумэным игъогу зэрэтеуцуагъэхэр, хъулъфыгъэмкIэ ащ мэхьанэшхо зэриIэр ыкIи унагъом иIэпы1эгъу пстэуми анахь шъхьаIэу зэрэщытыр ахэм къыхагъэщы.

УФ-м и Президентэу Владимир Путиным къызэрэхигъэщыгъэмкIэ, хэушъхьафыкIыгъэ дзэ операцием хэлажьэхэрэр ыкIи иветеранхэр ары непэ къэралыгъом и УIэшыгъэ КIуачIэхэм алъапсэ. Ахэр къэралыгъом игъэIорышIэн ыкIи проект инхэм япхырыщын хэлэжьэнхэ фае.

Мыщ къыдыхэлъытэгъэ апэрэ Iофтхьабзэр зыщыкIуагъэр кIэлэцIыкIу лагерэу «Лань» зыфиIорэр ары. КIэлэцIыкIухэм нэIуасэ ашIыгъ хэушъхьафыкIыгъэ дзэ операцием хэлэжьэгъэ Андрей Васнецовыр.

2022-рэ илъэсым Андрей Васнецовым хэушъхьафыкIыгъэ дзэ операцием къыдыхэлъытагъэу я 4-рэ хэушъхьафыкIыгъэ отрядэу «БАРС» зыфиIорэм хэтэу Донецкэ ыкIи Луганскэ народнэ республикхэм ыкIи Украинэм къулыкъур ащихьыгъ. ЛIыхъужъныгъэм иорден, медальхэу «За воинскую доблесть» (я II-рэ шъуашэ зиIэр), «За отличие в военной службе» (я III-рэ шъуашэ зиIэр) къыфагъэшъошагъэх.

НыбжьыкIэхэм ащ упчIэхэр фагъэзагъэх. Спикерым анахьэу ынаIэ зытыридзагъэр непэ хэхъоныгъэхэр зышIырэ волонтер движениер ары.

- ХэушъхьафыкIыгъэ дзэ операцием щыIэ дзэкIолIхэр чIыпIэ къинэу зэрытхэр къызэпачынымкIэ ыкIи ящыIэныгъэ къаухъумэнымкIэ Iахьылхэм, ныбджэгъухэм ыкIи амышIэрэ цIыфхэм къагъэхьырэ письмэхэм ыкIи посылкэхэм мэхьанэшхо яI, - къыIотагъ Андрей Васнецовым.

Илъэсым къыкIоц1 фондэу «Къэралыгъом иухъумакIохэр» зыфиIорэм ныбжьыкIэхэм япатриотическэ пIуныгъэ фэгъэхьыгъэ Iофтхьабзэхэм СВО-м иветеран 3500-м ехъу ахигъэлэжьагъ, Iофтхьэбзэ 2500-м ехъу ригъэкIок1ыгъ, ахэм кIэлэцIык1у ыкIи ныбжьык1э мин 500 фэдиз ахэлэжьагъ.