Непэ Мыекъопэ къэралыгъо технологическэ университетым и «Точка кипение» гъэсэныгъэ программэу «Фермерхэм яеджапI» зыфиIорэр щызэфашIыжьыгъ.

Торжественнэ зэхахьэм хэлэжьагъэх мэкъу-мэщымкIэ АР-м иминистрэ игуадзэу Сергей Шопиныр, АО «Россельхозбанкым» ипащэ игуадзэу Мария Боровскаяр, «Адыгеим ифермерхэм я Союз» ипащэу Дзэхъохъу Аслъан, мэкъу-мэщ технологиехэм яфакультет идеканэу Шъхьэпацэ Аслъан. Зэхахьэр зезыщагъэр гъэсэныгъэ программэу «Фермерхэм яеджапI» зыфиIорэм ипащэу, мэкъу-мэщ продукцием ипроизводствэ ыкIи итехнологие якафедрэ ипащэу, мэкъу-мэщ  шIэныгъэхэмкIэ докторэу Мамсыр Нурбый.

Пхъэшъхьэ-цумпэ продукцием ипроизводствэ ыкIи былымхъуным хэхъоныгъэ егъэшIыгъэным алъэныкъокIэ программэр къэзыухыгъэхэм дипломхэр аратыгъэх. ЗэкIэмкIи программэм сыхьат 250-рэ хахьэщтыгъ, ащ щыщэу сыхьати 150-р теоретическэ IофшIэныгъ, сыхьати 100-р хэушъхьафыкIыгъэ десэхэм атырагощэгъагъ.

Практическэ ухьазырыныгъэм анаIэ лъэшэу тырагъэтыгъ. Мэкъуогъу мазэм пхъэшъхьэ-цумпэ производствэм фэгъэзагъэхэр Мыекъопэ опытнэ станциеу ВИР зыцIэм щыIагъэх, ащ ипащэ игуадзэу Евгений Добренкэм дунэе коллекцием студентхэр нэIуасэ фишIыгъагъэх.

МКъТУм имагистратурэ лъэныкъоу «Агрономия» къэзыухыгъэ Игорь Богородскэм къызэрэригъэблэгъагъэхэм тетэу фермерхэр Шытхьалэ щыIэ хъызмэтшIапIэм щыIагъэх, цумпэхэр зыщагъэтIысхьэрэ гектари 10-р, рассадэу «Trey Plants» зыфиIорэр зэрэхалъхьэрэ методикэр ащ щалъэгъугъагъэх. Джырэ уахътэм МКъТУ-м къычIитIупщыгъэ тичIыгогъу Урысыем ифермерхэм япрофессиональнэ сообществэ и Президент, ащ Урысыем ыкIи Белорусием ифермери 100-м ехъу хэхьэ.

Гъэсэныгъэ программэу «Фермерхэм яеджапI» зыфиIорэр Адыгэ Республикэм 2021-рэ илъэсым къыщыублагъэу щагъэцакIэ, Мыекъопэ къэралыгъо технологическэ университетыр, мэкъу-мэщымкIэ АР-м и Министерствэ, Акционернэ обществэу «Россельхозбанкыр» зэгъусэхэу а лъэныкъомкIэ зэдэлажьэх.

А уахътэм къыщыублагъэу фермерэу IофшIэныр езыгъэжьэгъакIэхэм ащыщыбэмэ егъэджэн программэр акIугъ. 2021-рэ илъэсым ащ фэдэу нэбгырэ 25-рэ щыIагъ, 2022-м ахэм япчъагъэ 35-м нэсыгъ, 2024-м нэбгырэ 43-мэ программэр зэрагъэшIагъ.

«Фермерхэм яеджапIэ» IахьитIоу гощыгъэ: теоретическэр ыкIи практическэр. Теоретическэ Iахьым хэхьэх дисциплинэхэу экономикэм, бухгалтерскэ учетым, хэбзэIахьым ыкIи цифровизацием афэгъэзагъэхэр. Джащ фэдэу  мэкъумэщ органическэ продукцием икъыдэгъэкIын ыкIи ар сертификацие шIыгъэныр. Практическэ Iахьым сыхьат 60 тырагъэкIодагъ, Адыгэ Республикэм имэкъу-мэщ хъызмэтшIапIэ пэрытхэм ащызэхащагъ.