Мы мафэхэм Урысые обществэу «ШIэныгъэм» и Адыгэ шъолъыр къутамэ ипащэу Галина Измайловар гъэсэныгъэ Iофтхьабзэу Москва щыкIорэм хэлажьэ, ар гъэIорышIэн ыкIи гъэсэкIо проектхэм афэгъэхьыгъ.

Егъэджэн программэм едэIухэрэр къутамэмэ япащэхэмрэ яменеджерхэмрэ, федеральнэ шъолъырхэм хэхъоныгъэхэр ягъэшIыгъэнхэмкIэ гъэIорышIапIэхэм яIофышIэхэр, пресс-секретарьхэр, Урысые обществэу «ШIэныгъэм» ишъолъыр къутамэхэм япащэхэр. Урысые обществэу «ШIэныгъэм» итхьаматэу Максим Древаль пэублэ псалъэ зэхахьэм къыщишIыгъ. 2023-рэ илъэсэу икIыгъэм ащ зэфэхьысыжьхэр къыфишIыгъэх ыкIи 2024-рэ илъэсым ашIэн фаехэм ягугъу къышIыгъ.

— Экспертнэ сессиеу  Москва щыкIорэр лъэубэкъушIу хъугъэ, сыда пIомэ обществэм хэтхэм Iофэу ашIагъэм зэфэхьысыжьхэр фашIыгъэхэ къодыеп, уасэ къаратыгъ ыкIи тапэкIэ зыдэлэжьэщтхэ лъэныкъохэр къагъэнэфагъэх. Анахьэу анаIэ зытырадзагъэр шIэгъахэу щыIэхэр, практическэ IофшIэнхэр, проектыкIэхэу шъолъырхэр зыдэлажьэхэрэр, Урысыем исубъект пэпчъ хэушъхьафыкIыгъэ екIолIакIэу фашIырэр ары, — къыIотагъ Урысые обществэу «ШIэныгъэм» и Адыгэ шъолъыр къутамэ ипащэу Галина Измайловам.

Урысем исубъектхэм ялъытыгъэу проектхэр къыхэхыгъэнхэм ыкIи лекторхэр гъэхьазырыгъэнхэмкIэ сэнаущыгъэ зыхэлъхэр къыхэгъэщыгъэнхэм фэгъэхьыгъэ едзыгъошхо гъэсэныгъэ программэм къыщыдалъытагъ. УФ-м и Президент и Администрацие мониторингымкIэ, зэфэхьысыжьхэр шIыгъэнхэмкIэ и ГъэIорышIапIэ иреферентэу Евгений Казаковыр, коммуникационнэ холдингэу «Минченко консалтинг» зыфиIорэм ипрезидентэу Евгений Минченкэр, урысые биатлонистэу, «Зэкъошныгъэм» иорден икавалерэу, ОлимпиадитIумэ ахэлэжьагъэу, 2006-рэ илъэсым тыжьын медаль къыщызыхьыгъэу ыкIи плIэгъогогъо дунаим ичемпионэу Николай Кругловыр, театрэм ыкIи кином яактерэу Кирилл Лопаткиныр, Урысые обществэу «ШIэныгъэм» илекторхэр ыкIи нэмыкIхэр зэхахьэм къыщыгущыIагъэх.

Къэбар лъыгъэIэс Iофхэм едзыгъо шъхьаф афэгъэхьыгъагъ. А лъэныкъомкIэ къэгущыIагъэх Урысыем гъэсэныгъэмрэ шIэныгъэмрэкIэ и Министерствэ иIофышIэу Анна Гуреевар, УФ-м цифрэм хэхъоныгъэ егъэшIыгъэнымкIэ, зэпхыныгъэхэмкIэ ыкIи коммуникацие жъугъэхэмкIэ и Министрэ иупчIэжьэгъоу Мария Мезенцевар, бренд-стратегэу АНО «Диалог» зыфиIорэм иIэ Анна Тихоновар, медиахолдингэу Readovka ипащэу Алексей Костылевыр ыкIи PR-пащэу продюсерскэ гупчэу Insight People зыфиIорэм иIэ Валерия Родинар. ЗэIукIэмэ яшIуагъэкIэ зэпхыныгъэхэр нахь пытагъэх, къэбар лъыгъэIэс лъэныкъомкIэ Iоф зэрашIэщтыр агъэнэфагъ.

Гъэсэныгъэ семинарым зэфэхьысыжьхэр къыфишIыгъэх Урысые обществэу «ШIэныгъэм» игенеральнэ пащэ игуадзэу Георгий Будный.