Мы мафэхэм Чэчэн Республикэм Кавказскэ инвестиционнэ форумым къыдыхэлъытагъэу хъоум ыкIи шъолъырым хэхъоныгъэ ягъэшIыгъэным и Лабораторие дэкIыгъо IофшIэн иIагъ. Iофтхьабзэм ипшъэрылъыр Темыр Кавказым ишъолъырхэм зекIоным зыщягъэушъомбгъугъэныр ары.

Мыекъопэ къэралыгъо технологическэ университетым маркетингымкIэ, сервисымкIэ ыкIи зекIонымкIэ икафедрэ идоцентэу Хьанахъукъо Заремэ зипэщэ Лабораторием иIофшIэн апэрэу хэлэжьагъэх экономикэмрэ гъэIорышIэнымрэ ифакультет истудентхэр: Михаил Рай, Роман Муллер, Имран Мусаев.

Программэм гъэлъэшыгъэ шIыкIэм тетэу гъэсэныгъэ мэфиплI хэхьагъ, ахэр отраслэм ипэрытхэм зэращагъ. Форумым икIэухым проектхэм язэфэхьысыжьхэр питчинг ашIыгъэх.

Проектнэ IофшIэным Темыр Кавказым ыкIи Къыблэм яфедеральнэ шъолъырхэм къарыкIыгъэхэ команди 7 хэлэжьагъ.

Командэ пэпчъ категориеу иIэм елъытыгъэу проектхэр къыгъэхьазырыгъэх: тыкъэзуцухьэрэ дунаимрэ общественнэ чIыпIэхэмрэ ядизайнхэр, ландшафтнэ архитектурэр ыкIи зэтегъэпсыхьэгъэныр, урбанистикэр, туризмэр, геобрендингыр.

МКъТУ-м истудентмэ проектэу «Экскурсионно-музейный комплекс «ЭтноАулит» зыфиIорэр къагъэлъэгъуагъ. Адыгэ Республикэм итуризмэ отраслэ командэм зэригъэшIагъ ыкIи ащ игъэцэкIэнкIэ шIэгъэн фаехэм къатегущыIагъ.

— Лабораториехэм ушэтынхэр ащытшIыгъэх, опытхэр дгъэуцугъэх. Тэ тиIагъэх «реактивхэр» — гукъэкIхэр, чIыпIэхэр, IофшIагъэхэр, дизайнхэр, — къыIотагъ командэм икапитанэу Михаил Рай.

Iофтхьабзэр рекIокIыфэ студентмэ Iоф къадашIагъ бизнесым ипащэхэм ыкIи иунаехэм, рестораторхэм, менеджерхэу гъэIорышIэкIо компаниехэм къарыкIыгъэхэм, урбанистхэм, маркетологхэм, апшъэрэ еджапIэхэм якIэлэегъаджэхэм, экономистхэм, дизайнерхэм, архитекторхэм ыкIи политикхэм. Джащ фэдэу хьакIэхэр экскурсие ащагъэх, Чэчэн Республикэр, къалэу Грознэр арагъэлъэгъугъэх, ятарихъ, якультурэ щагъэгъозагъэх.

Тыгу къыддеIэу текIоныгъэ къыдэзыхыгъэ гъэсакIохэмрэ студентхэмрэ тафэгушIо!