Бэдзэогъум и 3-м къыщыублагъэу и 6-м нэс Урысыем иапшъэрэ мэкъу-мэщ еджапIэхэм япроректорхэм я Урысые семинарэу шIэныгъэ IофшIэнхэм афэгъэхьыгъэр щыкIуагъ. Ащ хэлэжьагъ Мыекъопэ къэралыгъо технологическэ университетым ипроректорэу Татьяна Овсянниковар.

Iофтхьабзэм къыдыхэлъытагъэу Мыекъопэ къэралыгъо технологическэ университетымрэ Уральскэ къэралыгъо мэкъу-мэщ университетымрэ зэрэзэдэлэжьэщтхэмкIэ Зэзэгъыныгъэм зэдыкIэтхагъэх.

Зэхэсыгъом хэлэжьагъэх мэкъу-мэщымкIэ Урысыем и Министерствэ илIыкIохэр, мэкъу-мэщым ыкIи пцэжъыеешэным фэгъэзэгъэ гъэсэныгъэ учреждениехэм я Ассоциацие хэтхэр, Къэралыгъо Думэм шIэныгъэмкIэ ыкIи апшъэрэ гъэсэныгъэмкIэ икомитет щылажьэхэрэр, шIэныгъэмкIэ Урысыем иакадемие, Свердловскэ хэкум и Правительствэ ащыщхэр ыкIи апшъэрэ еджэпIэ 20-мэ япроректорхэр.

Технологическэ суверенитетыр къэухъумэгъэным фэшI мэкъу-мэщ шIэныгъэм хэхъоныгъэхэр егъэшIыгъэнхэм, мэкъу-мэщ гъэсэныгъэр ыпэкIэ лъыгъэкIотэгъэным афэгъэхьыгъэ зэхэгущыIэжьхэр Iофтхьабзэм щыкIуагъэх. Ащ къыдыхэлъытагъэу шIэныгъэ-ушэтын ыкIи егъэджэн программэу Уральскэ къэралыгъо мэкъу-мэщ университетым иIэхэм нэIуасэ афэхъугъэх «Уралплемцентрэм» щыIагъэх.

Мыекъопэ къэралыгъо технологическэ университетымрэ Уральскэ къэралыгъо мэкъу-мэщ университетымрэ зэрэзэдэлэжьэщтхэмкIэ Зэзэгъыныгъэу зыкIэтхагъэхэм къыделъытэ зэхэт шIэныгъэ ыкIи егъэджэн проектхэр агъэцэкIэнхэу, лабораторнэ-техническэ базэмкIэ зэхъожьынхэу, егъэджэн-методическэ литературэр зэхагъэуцонэу, академическэ зэхъожьынхэр студентхэмкIэ ыкIи кIэлэегъаджэхэмкIэ, профессорскэ-кIэлэегъэджэ купхэмкIэ рагъэкIокIынхэу.

ШIэныгъэ-гъэсэныгъэ амалэу апшъэрэ еджапIэхэм яIэхэр гъэпытэгъэнхэмкIэ мы Iофыгъор лъэубэкъушIоу щыт.