Мэлылъфэгъум и 24-м къыщыублагъэу бэдзэогъум и 4-м нэс Мыекъопэ къэралыгъо технологическэ университетым гъэсэныгъэ программэу «Фермерхэм яеджапI: фермерскэ хъызмэтыр зехьэгъэнымкIэ технологиякIэу организациехэм агъэфедэрэр» зыфиIорэр щыкIуагъ.

Программэр лъэныкъуищ зэзэгъыныгъэм елъытыгъэу агъэцэкIагъ: АО «Россельхозбанкыр», Адыгэ Республикэм мэкъу-мэщымкIэ и Министерствэ ыкIи МКъТУ-р. Зэрэрагъэджагъэхэр лъэныкъуитIу: «Пхъэшъхьэ-цумпэ продукцием икъыдэгъэкIын» ыкIи «Былымхъуным хэхъоныгъэ егъэшIыгъэныр, щэ ыкIи лы къэзытырэр».

Программэм ипащэр — МКъТУ-м мэкъу-мэщ продукциер къыдэгъэкIыгъэным итехнологие икафедрэ ипащэу, мэкъу-мэщ шIэныгъэхэмкIэ докторэу Мамсыр Нурбый.

Фермерскэ хъызмэтшIапIэхэр кIэу къызэIухыгъэнхэм, бизнес-практикэр къызфагъэфедэзэ фермерскэ Iофым хэхъоныгъэхэр егъэшIыгъэнхэм проектыр афытегъэпсыхьагъ.

Программэм ишIуагъэкIэ езгъэжьэгъэкIэ фермер 48-рэ рагъэджагъ, ахэм ащыщэу 35-мэ IэпэIэсэныгъэ ухьазырыныгъэ зэряIэмкIэ дипломхэр аратыгъэх. Ахэмэ ащыщ нэбгырэ 25-р пхъэшъхьэ-цумпэ продукцием, нэбгыри I0-р былымхъуным адэлэжьэнхэм фагъэсагъэх.

Адыгэ Республикэм ыкIи Краснодар краим арыт хъызмэтшIапIэхэм япроизводственнэ площадкэмэ практическэ IофшIэнхэр рагъаджэрэмэ ащарагъэкIугъ. Ащ фэдэ дэкIыгъо егъэджэнхэр ИП ЛэупакIэ А.А. (ст. Сергиевскэр, Джэджэ район) щыкIуагъ. Ащ чъыгхатэхэр къызэрэщагъэкIырэм нэIуасэ щыфэхъугъэх.

«Республиканскэ бизнес-инкубаторым» (ст. Дондуковскэм, Джэджэ район) езгъэжьэгъэкIэ фермерхэм зыщыщагъэгъозагъ бизнес гурытым  ыкIи цIыкIум IэпыIэгъоу къэралыгъом ригъэкIырэм.  Мыекъопэ опытнэ станцием – ВИР-м икъутамэ (п. Подгорнэм, Мыекъопэ район) пхъэшъхьэ-цумпэ дунэе коллекцием нэIуасэ щыфэхъугъэх, джащ фэдэу КФХ Савосько зыцIэм (п. Тимирязевэр, Мыекъопэ район) цумпэ культурэр щызэрагъэлъэгъугъ.

Торжественнэ шIыкIэм тетэу яIэпэIэсэныгъэ зэрэхагъэхъуагъэмкIэ фермерхэм дипломхэр шышъхьэIум и 5-м сыхьатыр 10-м МКъТУ-м и «Точка кипение» щаратыжьыщт.

Iофтхьабзэм хэлэжьагъэмэ зэкIэмэ тафэгушIо, ягухэлъхэр къадэхъунхэу тафэлъаIо!