Хэгъэгум ишъолъыриплI къызекIухьэм ыуж, кIэлэегъэджэ IэпэIэсэныгъэм итамыгъэ къэлэ-лIыхъужъэу Волгоград — псэемыблэжьныгъэм, шIулъэгъоу Родинэм фыряIэр къызщагъэшъыпкъэжьыгъэм къэсыгъ.

НыбжьыкIэ фестивалэу #ТриЧетыре зыфиIорэм къыдыхэлъытагъэу «Илъэсым имастер» ибыракъ торжественнэу къызщаратыжьырэ Iофтхьабзэр Волгоград щыкIуагъ, къалэм щыпсэухэрэри Урысыем икъыблэ щыщхэри ащ зэхиугъоягъэх. Фестивалым ипрограммэ зэнэкъокъу зэфэшъхьафхэр, цIыф гъэшIэгъонмэ аIукIэнхэр, жъаугъохэр зыхэлажьэхэрэ концертхэр хэтыгъэх. Джащ фэдэу къалэм игъэсэныгъэ организациехэр къызщагъэлъэгъогъэ лъэтегъэуцори зэхащэгъагъ, кластерэу «Профессионалитет» зыфиIорэри ащ хэтыгъ.

Къыблэ федеральнэ шъолъырым хэхьэрэ субъектмэ, ДНР-м, ЛНР-м, Запорожскэ ыкIи Херсонскэ хэкухэм ягъэцэкIэкIо хабзэ иорганхэм ялIыкIохэр ыкIи гъэсэныгъэ организациехэм къарыкIыгъэхэр Волгоград щыкIогъэ зэхахьэм хэлэжьагъэх. Шъолъыр зэнэкъокъумэ 2022-рэ, 2023-рэ ыкIи 2024-рэ илъэсхэм ащытекIуагъэхэри ахэм ахэтыгъэх. Ахэм зэу ащыщыгъ Мыекъопэ къэралыгъо технологическэ университетым и Политехническэ колледж икIэлэегъаджэу Оксана Ивановар. МэфэкI Iофтхьабзэмэ афэшъхьафэу шъолъырмэ къарыкIыгъэмэ IофшIэн ыкIи культурнэ прогаммэхэр къяжэщтыгъэ.

Зэхахьэм хэлэжьагъэмэ къыхагъэщыгъ мыщ фэдэ Iофтхьабзэмэ яшIуагъэ къызэрэкIорэр, шIэныгъэу аIэкIэлъхэмкIэ шъолъыр зэфэшъхьафхэм къарыкIыгъэхэм зэряхъожьхэрэр, зыгъэгумэкIырэ упчIэхэмкIэ федеральнэ операторыр джэуапэгъу къазэрэфэхъурэр.

— IэпэIэсэныгъэшхо зыхэлъ мастер ыкIи кIэлэегъаджэ дэгъу ухъун ылъэкIыщтэп гъэсакIо тэрэз уимыIэу. IэпэIэсэныгъэм хэгъэхъогъэнымкIэ зэнэкъокъоу зэхащэрэр кIэлэегъаджэхэмкIэ IофыгъошIу дэдэу щыт, — къыIотагъ гъэсэныгъэмкIэ, шIэныгъэмкIэ ыкIи ныбжьыкIэ политикэмкIэ Волгоградскэ хэкум икомитет итхьаматэу Лариса Савинам.

Мы мэфэ благъэхэм зэнэкъокъоу «Илъэсым имастер» зыфиIорэм ибыракъ Краснодар краим къынагъэсыщт.