НыбжьыкIэ проектхэм я Урысые зэнэкъокъоу «Уигухэлъ факIу» зыфиIорэм лъэныкъоу «ЗекIо уцугъэр» зыцIэмкIэ щытекIуагъэхэм шIухьафтын дэгъу афашIыгъ — тхьамафэм къыкIоцI стажировкэ акIунэу Шъачэ Парк ХьакIэщым агъэкIуагъэх, ар Сириусым ифедеральнэ шъолъыр хэхьэ.

ТекIоныгъэ къыдэзыхыгъэ проектэу «Адыгэ щэеешъоным ихабзэхэр» зыфиIорэр зыфэгъэзагъэр лъэпкъ зэхахьэхэр шIыгъэнхэр, ащ епхыгъэ мастер-классхэр, викторинхэр ыкIи орэд программэхэр, адыгэ джэгухэр регъэкIокIыгъэнхэр ары.  Фестивалым ипшъэрылъ шъхьаIэр адыгэ щаер зэлъягъэшIэгъэныр, шъолъырым къыщыкIырэ продуктэу зэрэщытым щыгъэгъозэгъэнхэр къыделъытэ. Проектым икомандэ хэтых Роман Муллерыр, Имрана Мусаевар, Илья Орловыр ыкIи Дарья Новиковар. Ахэм яIэшъхьэтетыгъэх маркетингым, сервисым ыкIи туризмэм якафедрэ идоцентэу, экономикэ шIэныгъэхэмкIэ кандидатэу Хьанахъукъо Заремэ, МКъТУ-м имагистрантэу, Preferred by Nature зыфиIорэм идунэе аудиторэу, биогъэстыныпхъэ проектхэм яэкспертэу Михаил Раир.

Стажировкэм ипрограммэ хэхьагъэх компание купхэм яобъектхэр зэгъэлъэгъугъэнхэр: курортэу «Красная Поляна», «Сочи Парк», «Университет Сириус» ыкIи «Кавказскэ биосфернэ заповедникыр». Специалист шъхьаIэхэм студентхэр аIукIагъэх, ащ ишIуагъэкIэ чIыопсыр къэзыухъумэрэ шIыкIэу щыIэхэм нэIуасэ афэхъугъэх, курортнэ шъолъырхэм хэхъоныгъэхэр зэрарагъэшIырэм зыщагъэгъозагъэх. ШIэныгъэу зэрагъэгъотыгъэхэр Адыгэ Республикэм туризмэм зыщырагъэушъомбгъунымкIэ къашъхьэпэщтых, япроектхэр щылъагъэкIотэшъущтых.

— МэфиплIым къыкIоцI стажировкэу скIугъэм гукъэкIыжь шIагъохэр къысфигъэнагъэх. «Краснэ Полянэм» икомандэ зекIо программэр дэгъу дэдэу ыгъэхьазырыгъ, зэкIэ Iофтхьабзэхэм тахэлэжьэн ыкIи тызыфаер зэдгъэлъэгъун тлъэкIыгъэ. Туризмэм епхыгъэ бизнесышхор зыпкъ итышъущта? Мы мафэхэм тэ ар зэрэхъущтыр тшIагъэ. ИлъэситIум къыкIоцI теориер ары тызпылъыгъэр, джы мы мафэхэм практикэр тлъэгъугъэ, процессыр зэрэкIорэм тыхэтыгъ. Туристическэ продуктыр гъэшIэгъонэу зэрэпшIыщтыр, тыкъэзыуцухьэрэ дунаим тиягъэ етымыгъэкIэу ар зэрэпхырытщыщтыр, ащ пае шIэгъэн фаехэр зэхэтфыгъэх, зэдгъэшIагъэх. Къоджэ туристическэ объект цIыкIухэм сапылъэу щытыти, сэ дэгъоу къызгурыIуагъ «Краснэ Полянэм» шIыкIэу ыгъэфедэхэрэр бизнесышхом имызакъоу, ар чIыпIэ хэхыгъэ цIыкIуми зэращыбгъэфедэшъущтыр,  — къытфиIотагъ МКъТУ-м имагистрантэу, проектым игъэсакIоу Михаил Рай.

—Краснэ Полянэм процессхэр зэрэщыкIохэрэр зэгъэшIэгъэныр гъэшIэгъоныгъэ, джащ фэд Шъачэ Паркыри. Дэгъоу зэкIэ тфызэхащагъ, стажировкэр IофтхьабзэхэмкIэ ушъэгъагъэ, — къыхигъэщыгъ МКъТУ-м истудентэу, командэм икапитанэу Роман Муллерым.

Стажировкэм игъэсэныгъэ программэ джащ фэдэу хэлэжьагъэх зэнэкъокъоу «Уигухэлъ факIу» зыфиIорэм ипащэу, маркетингым, сервисым ыкIи зекIоным икафедрэ идоцентэу, «Точка кипением» ипрограммнэ пащэу Светлана Новиковар; курортэу «Краснэ полянэм» ипащэу Лев Шагаровыр; курортэу «Краснэ Полянэм» тыкъэзыуцухьэрэ дунаим икъэухъумэнкIэ иотдел ипащэу  Анастасия Батинар; маркетингымкIэ ыкIи щэнымкIэ  «Шъачэ Паркым» ипащэу Юлия Горбачевар; инженер-эколог  шъхьаIэу «Шъачэ Паркым»  иIэу Светлана Арутюняныр; учебнэ офисым испециалист шъхьаIэу Ирина Потаповар; курортэу «Краснэ Полянэм» игидхэр-зещакIохэр, Кавказскэ къэралыгъо  биосфернэ заповедникэу Шапошниковым ыцIэ зыхьырэм ивольернэ комплексэу «Лаура» зыфиIорэм иIофышIэхэр.

— НыбжьыкIэ проектхэм я Урысые зэнэкъокъоу «Уигухэлъ факIу» зыфиIорэм ипшъэрылъ шъхьаIэхэм ащыщ цIыфхэм ягумэкIыгъохэм ядэгъэзыжьынкIэ Iэрыфэгъу хъущт проектхэр зэхэзгъэуцохэрэм адэIэпыIэгъэныр. Джащ тетэу Iофым удэлажьэмэ дунаири нахьышIу ыкIи нахь гъэшIэгъон хъущт. Компаниешхохэр проектым къызэрэхэлажьэхэрэм ишIуагъэкIэ, кIэлэеджакIохэм ыкIи студентхэм гъогу зафэр къыхахын алъэкIы. Къушъхьэ экокурортэу «Лэгъо-Накъэ» ихьатыркIэ Адыгеим иапшъэрэ еджапIэхэм ыкIи иколледжхэм ащеджэхэрэ студент 30-м ехъумэ яеплъыкIэхэр къагъэлъэгъуагъэх, ащ хьакIэхэри  хэлэжьэнхэу джы амал яIэ хъугъэ, — къыIотагъ  МКъТУ-м и «Точка кипение» ипрограммнэ пащэу Светлана Новиковам.

Шъугу къэдгъэкIыжьын ныбжьыкIэ проектхэм я Урысые зэнэкъокъоу «Уигухэлъ факIу» зыфиIорэр 2012-рэ илъэсым къыщегъэжьагъэу иучредителыр Мыекъопэ къэралыгъо технологическэ университетыр ары, ащ Адыгэ Республикэм гъэсэныгъэмрэ шIэныгъэмрэкIэ и Министерствэ иIэпыIэгъу.