А хъугъэ-шIагъэм ехъулIэу сурэтхэмкIэ МКъТУ-р къэзыухыгъэ анахь дэгъухэм нэIуасэ шъуафэтшIынэу къышъуфэдгъэхьазырыгъ.

ТIолъфэныкъохэу Степановхэ Никитэрэ Даниларэ (сэмэгумкIэ апэрэу щытыр Никит ары; джабгъумкIэ ятIонэрэр Данила) — инженернэ факультетым щеджагъэх, спортым ылъэныкъокIэ гъэхъэгъэшхохэр ашIыгъэх. Университетым щырекIокIырэ зэнэкъокъумэ ащаублэгъагъ, джы дунаем ацIэ щэIу.

Мэкъу-мэщ факультетым ижъуагъоу плъытэмэ хъущт Сергей Кравцовыр (сурэтым сэмэгумкIэ ятIонэрэу ит). Сергей илъэсиплIым къыкIоцI спортивнэ зэнэкъокъубэмэ ащытекIуагъ, МКъТУ-м волейболымкIэ икомандэ хэтыгъ. Ащ шIошъхъуныгъэ пытэу текIоныгъэм фыриIэм командэм хэтхэр егъэгушхох.

Павел Дорошенкор (сурэтым ящэнэрэу сэмэгумкIэ ит) — МКъТУ-м анахь щызэлъашIэрэ цIыф. Урысыем шапхъэм имылъ гъэсэныгъэм ылъэныкъокIэ игукъэкIыбэ щыпхыращыгъ, зэнэкъокъубэмэ ащытекIуагъ. Ащ неущрэ мафэр зэрилъэгъурэм фэдэу зыми ылъэгъурэп.

Вероника Кияшкинар (сурэтым яплIэнэрэу сэмэгумкIэ ит) ыкIи Айна Кушъур (сэмэгумкIэ ятфэнэр) —экологическэ факультетым илIыкIох. Вероникэ игухэлъ шъхьаIэ къыдэхъугъ, Арктикэм щыIагъ ыкIи кIэлэцIыкIу сэкъатмэ афэгъэхьыгъэ проектыр ыгъэцэкIагъ, «Тактильнэ тхылъэу «ЗэгорэкIэ машIор къыкIанэмэ» зыфиIорэр ыгъэхьазырыгъ. Анахь текIоныгъэшхоу Айнэ иIэр — флористикэмкIэ Урысыем илъэпкъ сборнэм зэрэхэфагъэр ары.

Едыдж Азидэ (сурэтым сэмэгумкIэ ятфэнэр) — лечебнэ факультетым къычIитIупщыгъ, шIэныгъэ-практическэ конференциемэ бэрэ ахэлажьэщтыгъэ, текIоныгъабэ къащыдихыгъ, шIушIэ медицинскэ акциехэр бэрэ зэхищагъэх. Ащ иIэпэIэсэныгъэрэ ишIушIагъэхэмрэ цIыфхэм ащыгъупшэрэп.

Иныхъу Джанет (сурэтымкIэ ыгузэгу ит) — экономикэм ыкIи юриспруденцием яинформационнэ системэхэм яфакультет имагистратурэ къычIитIупщыгъ. Ар волейболымкIэ МКъТУ-м ибзылъфыгъэ командэ хэтыгъ, Апэрэ  шъолъыр зэнэкъокъоу кавказоведхэр зыхэлэжьагъэхэ «СэшIэ Кавказ» зыфиIорэм апэрэ чIыпIэр къыщихьыгъ; джащ фэдэу апэрэ чIыпIэ къыщыдихыгъ шIэныгъэ-правовой джэгукIэу «Гражданин» зыфиIорэм, командэу «Civis» хэтыгъ. Джанетэ акъылымрэ спортивнэ шэнымрэ зэдегъэкIошъух.

Бэгъушъэ Бислъан (сурэтымкIэ агузэгу ит) —стоматологическэ факультетым къычIитIупщыгъ, командэм щыщ хъугъэу  проектэу «Оптимизация процесса предоставления медицинской услуги в республиканской стоматологии» при поддержке кураторов в Адыгее от Госкорпорации «Росатом» зыфиIорэм дэлэжьагъ. Инновационнэ екIолIакIэу медицинэм фыриIэм IофыгъошIухэр къыкIэлъэкIох.

Хьабый Айдэмыр (джабгъумкIэ яплIэнэрэу сурэтым ит) —педиатрическэ факультетым къычIитIупщыгъ, джыри я 3-рэ курсым исыгъ сэнэхьатэу къыхихыгъэр зэрэтэрэзыр къызыгурэIом, врач къодыеп, кIэлэегъаджэуи МКъТУ-м ипчъэ зэIухыгъэмэ я Мафэ зыкъыщигъэлъэгъуагъ.

Къуаджэ Фатим (сурэтым джабгъумкIэ ящэнэрэу ит) — илъэсихэу лечебнэ факультетым зыщеджагъэм шIэныгъэм истуденческэ тхьамафихмэ ахэлэжьагъ, шIэныгъэ статьябэ ытхыгъ, федеральнэ ыкIи дунэе конференциемэ ахэлэжьагъ. Пандемием илъэхъан COVID-19 ебэныгъэхэм ащыщыгъ, колл-гупчэм чанэу щылэжьагъ.

Игорь Синютар (джабгъумкIэ апэрэу сурэтым ит) — мэкъу-мэщ факультетым къычIитIупщыгъ, МКъТУ-м анахь чанэу къащыхэщыгъэхэм ащыщ, ар зэнэкъокъоу «Студенческэ стартап» зыфиIорэм апрэ чIыпIэр къыщыдихыгъ ыкIи сомэ 1000 000 къыратыгъ, я VII-рэ зэIухыгъэ зэнэкъокъоу «Молодые профессионалы» зыфиIоу Агенствэм ишапхъэкIэ апшъэрэ еджапIэм щызэхащэрэми щытекIуагъ.

Ныбджэгъухэр, шъуигъэхъагъэхэм тэ тарэгушхо! Шъуигъогу джы ешъогъажьэ къодый, шъуапэ джыри IофыгъошIубэ зэрилъыщтым тицыхьэ телъ.