Урысые Федерацием социальнэ-экономическэ хэхъоныгъэ 2030-рэ илъэсым нэс егъэшIыгъэнымкIэ федеральнэ проектэу «Профессионалитет» зыфиIорэр Iофыгъо шъхьаIэхэм ащыщ хъугъэ.

Проектым ипшъэрылъ шъхьаIэхэм ащыщыр — гъэсэныгъэ производственнэ гупчэхэр (кластерхэр) ыкIи гурыт профессиональнэ гъэсэныгъэм игъэсэныгъэ кластерхэр зэхэщэгъэнхэр ары. Колледжхэмрэ экономикэм къызэлъиубытрэ организациехэмрэ зыкIыныгъэ ахэлъэу зэдэлэжьэнхэр а Iофым къыделъытэ, ащ гурыт предпринимательствэри социальнэ лъэныкъори хахьэх.

ЗэкIэ колледжхэмрэ хъызмэтшIапIэхэмрэ зэзэгъыныгъэм зэдыкIатхэх ыкIи ащ елъытыгъэу IофшIапIэ къязытхэрэр колледжхэм ягъэIорышIэн Iофтхьабзэм хэлэжьэнхэ алъэкIы: гъэсэныгъэ программэхэм язэхэгъэуцон ыкIи япхырыщын, Iэмэ-псымэхэмкIэ зэтырагъэпсыхьанхэр, яIофшIакIохэр гъэсакIохэу ахэм ащыгъэлэжьэгъэнхэр.

Кластерэу «ПрофиМед» зыцIэр Мыекъопэ къэралыгъо технологическэ университетым и Политехническэ колледж рапхыгъэу щыт. ГъэIорышIэкIо купыр агъэхьазырыгъ, кIэлэегъаджэу Iофым хэлэжьэщтхэр агъэнэфагъэх, егъэджэн-производственнэ комплексыр, программэхэр агъэпсыгъэх. Проектым елъытыгъэу гъэлъэшыгъэ шIыкIэмкIэ гъэсэныгъэ программакIэхэр егъэджэн процессым щатIупщыгъэх, хэушъхьафыкIыгъэ хъызмэтшIапIэмэ афытегъэпсыхьагъэхэу IофшIэкIощтхэр агъэхьазырых.

Ащ фэдэ программэхэм апае информационнэ шапхъэу «Цифровой конструктор компетенций» зыфиIорэр щыIэ хъугъэ.

Кластерэу «ПрофиМед» зыфиIорэм щэлажьэх: кIэлэегъаджэхэр, производствэр язгъашIэрэ мастерхэр, гъэсэныгъэ-пIуныгъэм фэгъэзагъэхэр, гъэIорышIэнымкIэ командэр — ахэмэ егъэджэнхэр Москва дэт Институтэу профессиональнэ гъэсэныгъэм хэхъоныгъэ егъэшIыгъэным фытегъэпсыхьагъэм щакIух, федеральнэ проектэу «Профессионалитетыр» нахь зэрагъэцэкIэщтым нэужым дэлэжьэнхэм фэшI.

Ахэмэ кIэлэегъэджэ, производственнэ, гъэсэныгъэ амалхэр яIэхэ хъущтых, гъэсэныгъэ программэхэм язэхэгъэуцони фэIэзэщтых. ЗэкIэмкIэ кIэлэегъэджи 105-мэ, методист 15-мэ ыкIи гъэIорышIэкIуи 5-мэ теоретическэ егъэджэнхэр дэгъоу акIугъэх программэу «ПрофессионалитетымкIэ», джыри ахэм модулитIу аушэтынэу апэ илъ.

Политехническэ колледжым икIэлэегъаджэхэр Iэмэ-псымакIэхэу псауныгъэр къэухъумэгъэным къыхиубытэрэ организациехэу Адыгэ Республикэм итмэ къафагъэхьазырыгъэм нэIуасэ зафашIыщт.

Федеральный проектэу «Профессионалитетыр» гурыт профессиональнэ гъэсэныгъэм зэхъокIыныгъэшIухэр фэшIыгъэнхэмкIэ амал дэгъу дэдэ хъугъэ. Ащ иапэрэ пшъэрылъхэм ащыщ ныбжьыкIэ кадрэхэу гурыт звеном, рабочэ сэнэхьатхэм арылэжьэщтхэр гъэхьазырыгъэнхэр.