Гурыт еджапIэу №7-м икIэлэеджакIохэу лагерым зыщызгъэпсэфыхэрэр ХэушъхьафыкIыгъэ дзэ операцием хэлэжьагъэу, Мыекъопэ къэзэкъ отделым иатаман игуадзэу Александр Роговым IукIагъэх. Тематическэ Iофтхьабзэр гъэсэныгъэ проектэу ШIэныгъэр.ЛIыхъужъхэр зыфиIорэм къыдыхэлъытагъэу рагъэкIокIыгъ.

КIэлэцIыкIу гъэмэфэ зыгъэпсэфыгъо уахътэм илъэхъан Урысые обществэу «ШIэныгъэр» гъэ къэс гъэсэныгъэ программэм къыхэлажьэ. Шъолъыр пэпчъ зы е нахьыбэ къыхехы зэхэт Iофтхьабзэхэр зэхищэнхэу. Лагерым щыIэхэм апае общественнэ организацием проектих ыгъэхьазырыгъ, ащ хэлажьэ зышIоигъохэм Обществэу «ШIэныгъэм» исайт заявкэ щатыныр икъущтыгъэ.

ЗэIукIэгъур зэдэгущыIэгъу шIыкIэм тетэу кIуагъэ, Александр Роговыр заом зэрэхэлэжьагъэм, зэкъошныгъэм ыкIи ныбджэгъугъэ шъыпкъэм къатегущыIагъ, Хэгъэгум къыгъэуцугъэ пшъэрылъхэр Iо хэмылъэу зэрагъэцакIэрэм игугъу къышIыгъ. Джащ фэдэу дзэкIолIхэр зэрэзэдеIэжьхэрэм къатегущыIагъ.

КIэлэеджакIохэм хьакIэм къыIуатэрэр зэкIэ ашIогъэшIэгъоныгъ. Роговым кIэлэцIыкIумэ къаригъэлъэгъугъ лъэуаехэмкIэ уIагъэхэр зэо чIыпIэм зэрэрахыжьыщтыгъэхэр, уIагъэр зэрапхырэ шIыкIэр, щынэгъончъэ чIыпIэр къызэрагъотырэр ыкIи нэмыкIхэр.

Александр Роговым къызэрэхигъэщыгъэмкIэ, тактическэ медицинэм ипшъэрылъыр цIыфхэм ящыIэныгъэ икъэгъэнэжьын, дзэкIолIхэм япсауныгъэ лъыплъэгъэныр, ауIагъэхэм IэпыIэгъу арагъэкIыныр ары.

ХьакIэр упкIэнчъэу къагъэнагъэп, ныбжьыкIэмэ армейскэ щыIакIэр ашIогъэшIэгъоныгъ, дзэкIолIхэр зыщычъыехэрэр, зэрэшхэхэрэр…

— Тилагерь лIыхъужъым идесэ щыредгъэкIокIыгъ, ар зэрищагъ атаманым игуадзэу Александр Роговым. КIэлэцIыкIумэ лIыхъужъныгъэм имэхьанэ зыфэдэр ашIагъ, лIыгъэшIапIэм уифэмэ узэрэзекIощтым щыгъозагъэх. ЩыIэныгъэмкIэ къашъхьэпэщт Iофтхьабзэу ар хъугъэ. Александр Роговым лъэшэу тыфэраз, тисабыйхэм бэ кIэу зэхаригъэхыгъэр, нахь кIуачIэ хъунхэм ар фэIорышIэнэу тэгугъэ, — къыIотагъ еджэпIэ лагерым ипащэ.