Мыекъопэ къэралыгъо технологическэ университетым истуденткэу Анна Горковенкэр модэм ииндустрие иарт-еджапIэ хэлэжьагъ. Дизайнер сэнэхьатыр зэзыгъэгъотырэм урыс лъэпкъ нэшанэр зыхэлъ щыгъынхэр непэрэ мафэм диштэхэу ешIых.

— Сэ арт-еджапIэу модэм ииндустрие фэгъэхьыгъэр къызкIыхэсхыгъэр, а лъэныкъомкIэ хэхъоныгъэхэр сшIынхэм сыщэгугъышъ ары. Программэр зэрэгъэпсыгъагъэм елъытыгъэу модэм ибизнес гъэпсыкIэм нэIуасэ тыфэхъугъ, ащ елъытыгъэу творчествэм хэдгъэхъуагъ ыкIи Iофыр зэрэлъыдгъэкIотэщтым тегупшысагъ. Сэ щыгъын брендэу сэсыеу щытыщтым икъыхэхын джырэ уахътэм сыдэлажьэ, ар арт-еджапIэм щызгъэпсын слъэкIыгъэ, — къыIотагъ Анна Горковенкэм.

Студенткэм къызэриIуагъэмкIэ щыгъынэу ыдыхэрэмэ урыс лъэпкъ нэшанэр къахэщэу гъэпсыгъэщтых, ащ пае урыс хъырахъишъэхэр ыгъэфедэщтых. «Сыгу рехьы урыс кIакIомэ яшIын ыкIи ялъыгъэкIотэн. Ар сэркIэ гъунэнчъэ творчествэ IофшIэнэу щыт», — къыхегъэщы дизайнерым.

Арт-еджапIэм IэпэIэсэныгъэ ин зыхэлъхэр зэрипхыгъэх, ахэр хэгъэгум илъэныкъо зэфэшъхьафхэм къарыкIыгъэх. Сэнаущыгъэ зыхэлъ ныбжьыкIэмэ япроектхэр къагъэлъэгъуагъэх, модэм ииндустрие иэкспертмэ уасэу къаратырэм зыщагъэгъозагъ.

Апэрэу арт-класстерым щыгъыным идизайнер закъохэр арэп къыщаугъоигъэхэр, ащ дакIохэри, конструкторхэри, брендмэ лъапсэ афэзышIыгъэхэри, ательемэ яIофышIэхэри щызэIукIагъэх.

Программэм къыдыхэлъытагъэу упчIэжьэгъуи 157-рэ рагъэкIокIыгъ, кейс 80-м ехъу зэхафыгъ, ахэм язэфэхьысыжь елъытыгъэу дизайнерскэ проектхэр агъэнэфагъэх. Проект анахь дэгъуибгъур непэрэ мафэм зыщыкIэхэу щытых, ахэр къыхахыгъэх бизнес-упчIэжьэгъоу ыкIи гъэIорышIэкIо гъусэгъоу Виктор Бурмистровым и BeOn consulting ыкIи Рената Мансуровам имультибрендовэ тучанхэу «Дизайнерхэм я Унэ Гупчэ» аратынхэу.  

Джырэ уахътэм арт-кластерэу «Тавридэм» исайт гъэсэныгъэ IофтхьабзиплIэу щыкIощтхэм апае заявкэхэр атых: «Театрэм ар нахьыб», «Унэгъо зэхахь», «Наукэр искусствэм фэдэу 2.0», «Союзнэ къэралыгъор: узэгъусэным иискусствэ». Творчествэ зэнэкъокъум пхырыкIхэрэмэ ыпкIэ амытэу ахэм ахэлэжьэнхэ алъэкIыщт. Заявкэр мыщ ит: сайт.