Непэ Мыекъопэ къэралыгъо технологическэ университетым федеральнэ гъэсэныгъэ проектэу «Къулыкъу ябгъахьызэ ебгъэджэнхэр» зыфиIорэр 2023-2024-рэ еджэгъу илъэсхэм зэрагъэцэкIагъэм зэфэхьысыжьхэр щыфашIыгъэх.

Iофтхьабзэм хэлэжьагъэхэр: IофшIэнымкIэ ыкIи социальнэ хэхъоныгъэ егъэшIыгъэнымкIэ АР-м и Министрэу Мырзэ Джанбэч;  МКъТУ-м иректорэу Къуижъ Саид; уплъэкIун IофхэмкIэ ГъэIорышIапIэм и ГъэIорышIэпIэ шъхьаIэ иотдел ипащэу Иван Тормозовыр; республикэ еджэпIэ-интернатэу макъэмрэ нэмрэ зэщыкъуагъэ зиIэ сабыйхэр зыщаIыгъхэм ипащэ игуадзэу 3оя Петрашевар; сэкъатныгъэ зиIэхэм я Урысые общественнэ къутамэ иреспубликэ къутамэ итхьаматэу Агъыржьэнэкъо Сим; «Хэгъэгум иухъумакIохэр» зыфиIорэ къэралыгъо фондым итхьаматэ игуадзэу Джарымэ Елена; Урысые общественнэ организациеу «Урысыем ипенсионерхэм я Союз» зыфиIорэм иадыгэ къутамэ ипащэу Валентина Дагамукыр; АР-м и Лъэпкъ музей ипащэу Джыгунэ Фатим.

Бакалавриатым, специалитетым ыкIи магистратурэм алъэныкъокъо 20-р проектым зэлъеубыты. Ащ студентхэу, магистрантхэу ыкIи кIэлэегъаджэхэу 1080-рэ  хэхьэ.

Проектым зырагъэушъомбгъуным фэшI  аккаунтхэр социальнэ хъытыум къыщызэIуахыгъэх: VK  Telegram-канале МГТУ «Модуль Обучение служением», ахэм социальнэ проектхэм афэгъэхьыгъэ къэбархэр ренэу къарагъахьэх, ащытегущыIэх.

Ащ фэшъхьафэу, программэм къыдыхэлъытагъэу яIэпэIэсэныгъэ университетым иIофышIэ нэбгыриплIмэ хагъэхъуагъ  (Санкт-Петербург экономикэмкIэ иапшъэрэ еджапI, АНО «Центр знаний «Машук», Лъэпкъ ушэтын университетыр)

Анахь мэхьанэ зиIэ проектхэм ащыщэу къыхэбгъэщымэ хъущт: «Мобильнэ приложениеу «Адыгеим имузейхэр» зыфиIорэр, ар Урысыем ия VI-рэ зэнэкъокъоу социальнэ проектхэм афэгъэхьыгъэу «Инносоциум» зыцIэм ифинал ихьагъ. Джырэ уахътэм университетыр социальнэ проект 60-мэ адэлажьэ, ахэм ащыщ 52-р апшъэрэ еджапIэхэм я ЗэIухыгъэ зэнэкъокъу хэлажьэх.

Илъэсым зэфэхьысыжьхэр къыфишIыхэзэ, ректорэу Къуижъ Саидэ анахь чанэу Iоф зышIагъэхэр Щытхъу тхылъхэмкIэ къыхигъэщыгъэх. Ахэмэ ащыщых кафедрэмэ япащэхэр, гъэсакIохэр, студентхэр, проектнэ офисым икомандэ. Гъэсэныгъэ проектэу «Къулыкъу ябгъахьызэ ебгъэджэнхэр» зыфиIорэм игъэкIотыгъэу зэхахьэм щытегущыIагъэх, зэпхыныгъэхэм зэрахагъэхъощтым, социальнэ мэхьанэ зиIэ проектхэр нахьыбэ зэрашIыщтхэм ягугъу ашIыгъ.

Социальнэ ныбджэгъухэр ныбжьыкIэхэм ыкIи университетым къыдеIэнхэу, социальнэ гумэкIыгъохэм язэшIохын Iофхэм къахэлэжьэнхэу зэрэхьазырхэр къыраIотыкIыгъ.

Зэхахьэм сурэтэу щытырахыгъэхэр зэкIэ мыщ ижъугъотэщтых:  ВКонтакте.