Лъэныкъуищ зэзэгъыныгъэу Адыгэ Республикэм мэкъу-мэщымкIэ и Министерствэм, АО «Россельхозбанкым» ыкIи Мыекъопэ къэралыгъо технологическэ университетым зэдашIыгъэм елъытыгъэу гъэсэныгъэ программэу «Фермерхэм яеджапIэ» агъэцакIэ.

Программэм сыхьат 250-рэ телъытагъ, ащ дэкIыгъо экскурсиехэу шъолъырым ихъызмэтшIапIэхэм япроизводственнэ площадкэхэм ащашIыхэрэр хэтых. Фэдэ ухьазырныгъэм къыделъытэх «Былымхъуным хэхъоныгъэ егъэшIыгъэныр, ащ хэхьэх щэм ыкIи лым япроизводствэ» ыкIи «Пхъэшъхьэ-цумпэ продукцием икъыдэгъэкIын».

Непэ пэшIорыгъэшъэу агъэнэфэгъэгъэ дэкIыгъо экскурсиемкIэ зыдэкIуагъэхэр АР-м и Автономнэ учреждениеу «Республикэ бизнес-инкубаторыр» ары. ХъызмэтшIапIэм Iофэу ыгъэцакIэрэм, пшъэрылъэу иIэхэм зыщагъэгъозагъ. Ащ изэхэщакIор — программэу «Фермерхэм яеджапIэ» ипащэу Мамсыр Нурбый.

Бизнес-инкубаторым ипшъэрылъ шъхьаIэр республикэм щыпсэурэ цIыфхэм хъызмэтшIэпIэ цIыкIухэр ыкIи гурытхэр зэхащэнхэм фэгъэблыгъэнхэр, проектыкIэхэр зэхэгъэуцогъэнхэр ыкIи фэгъэкIотэныгъэхэр афэшIыгъэнхэр ары.

АР-м и Автономнэ учреждениеу «Республикэ бизнес-инкубаторым» ипащэ ипшъэрылъхэр зыгъэцакIэрэ Хьасанэ Махьмудэ фермер сэнэхьатым зыфэзгъасэхэрэр производственнэ лъэныкъо зэфэшъхьафхэм нэIуасэ афишIыгъэх: нэшэбэгухэмрэ помидорхэмрэ къызщагъэкIырэ фэбапIэхэр, мыIэрысэ чъыгхатэу псы гъуаткIохэр ренэу зыкIагъахъорэр, хэтэрыкIхэмрэ пхъэшъхьэ-мышъхьэхэмрэ къэмланхэм зыщадалъхьэхэрэр ыкIи ахэр зэраIыгъхэрэр, гъэщ продукциер гъэучъыIалъэхэм зэрэчIагъэлъыхэрэр ыкIи нэмыкIхэр. Джащ фэдэу хъызмэтшIапIэ гурытхэу ыкIи цIыкIухэу IофшIэныр езгъэжьэгъакIэхэм къэралыгъом IэпыIэгъоу къаригъэкIырэр зыфэдэр пащэм къыIотагъ.

Фермер сэнэхьатыр къыхэзыхыгъэмэ зэкIэмэ ягухэлъхэр къадэхъунхэу, яIэпэIэсэныгъэ хагъэхъонэу тафэлъаIо!