Адыгэ Республикэм Апэрэ республикэ онкологическэ форумэу щызэхащагъэр Мыекъопэ къэралыгъо технологическэ университетым щыкIуагъ.

Форумыр медицинскэ шIэныгъэхэм яхэгъэхъон ыкIи инновационнэ технологиехэр медицинэм илъэныкъо шъхьаIэхэм ащыщэу онкологием щыгъэфедэгъэнхэм афэгъэхьыгъагъ.

Республикэ ыкIи федеральнэ специалистхэр форумым хэлэжьагъэх. ШIуфэс гущыIэхэр къэзэрэугъоигъэхэм къапигъохыгъ Адыгэ республикэ клиническэ онкологическэ диспансерэу М.Х. Ашхьамафэм ыцIэ зыхьырэм иврач шъхьаIэу, госпитальнэ хирургием ыкIи дипломым ыуж къэкIырэ гъэсэныгъэм икафедрэ идоцентэу АкIэгъу Заур. Конференцием ипрограммэ секциищ хэтыгъ:

— «Хирургическэ щынэгъончъэр ыкIи терапиеу онкологием фэузэнкIыгъэр»;

— «Лъы системэм иузхэмкIэ упчIэ шъхьаIэхэр»;

— «Адэбзыр зэрагъэхъужьырэ лъэныкъо зэфэшъхьафхэр».

Секциехэм яIофшIэн къыдыхэлъытагъэу къэгущыIагъэх Наталья Шевченкэр — клиническэ врач, фармаколог, онколог, медицинэ щынэгъончъэным иуполномоченнэу Краснодар краим ит ГБУЗ «Клиническэ онкологическэ диспансер №1» МЗ; Юрий Шатохиныр — медицинэ шIэныгъэхэмкIэ доктор, профессор, Ростовскэ къэралыгъо медицинскэ университетым гематологием ыкIи трансфузиологием ФПК ыкIи ППС-м икафедрэ ипащ, псауныгъэр къэухъумэгъэнымкIэ УФ-м и Министерствэ ивнештатнэ специалист гематолог шъхьаI; Зарина Лягуфовар — Адыгэ республикэ клиническэ онкологическэ диспансерэу М.Х. Ашхьамафэм ыцIэ зыхьырэм имедицинскэ гематологическэ гупчэ ипащ, псауныгъэр къэухъумэгъэнымкIэ АР-м ивнештатнэ специалист гематолог; Сурея Эфендиевар — Дагъыстан Республикэм иреспубликэ онкологическэ гупчэ иврач шъхьаIэ игуадз.

Докладмэ лъэныкъуабэ къызэлъаубытыгъ: антимикробнэ профилактикэм ыкIи онкологием итерапие къызэрахэщырэр; эритропопоэтинхэр гематологическэ уз зиIэхэмкIэ зэрагъэфедэхэрэр ыкIи нэмыкIыбэхэр.

Конференцием хэлэжьагъэмэ онкологическэ узхэм якъыхэгъэщынрэ узэреIэзэщтымрэ афэгъэхьыгъэу бэ кIэу зэхахыгъэр, Урысые Федерацием медицинэ ушэтыныкIэу ышIыгъэхэм защагъэгъозагъ.