Медицинэм иIофышIэ и Мафэ фэгъэхьыгъэ торжественнэ зэхахьэ республикэ филармонием щыкIуагъ.

Iофтхьабзэм хэлэжьагъэх АР-м и ЛIышъхьэу КъумпIыл Мурат, АР-м и Къэралыгъо Совет-Хасэ и Тхьаматэу Владимир Нарожнэр, псауныгъэр къэухъумэгъэнымкIэ АР-м и Министрэу Мэрэтыкъо Рустем, Мыекъопэ къэралыгъо технологическэ университетым иректорэу Къуижъ Саидэ, АР-м и Министрэхэм я Кабинет хэтхэр, федеральнэ, республикэ ыкIи муниципальнэ органхэм ялIыкIохэр, медицинэ системэм иIофышIэхэр, профсоюзхэр ыкIи гуфакIохэр.

Республикэм ипащэ игущыIэхэм къащыхигъэщыгъ медицинэ IофышIэм шIэныгъэ иIэ закъокIэ зэримыкъурэр, ащ гукIэгъуныгъэшхо зэрэхэлъын фаер.

— ШъуиIофшIакIэ, шъуиIэпэIэсэныгъэ ыкIи шъуиопыт осэшхо фэтэшIы. Пандемием илъэхъани джырэ уахътэми IэпыIэгъу зищыкIагъэм псынкIэу шъулъэIэсы. Адыгеим имедицинскэ бригадэхэр нэмыкI шъолъырхэми ащыIэх, Iофышхо ащагъэцакIэ. IофшIэн хьылъэу шъушIэрэм пае тышъуфэраз, тхьаегъэпсэушхо къышъотэIо – закъыфигъэзагъ зэхахьэм хэлажьэрэмэ ЛIышъхьэм.

Мы зэхахьэм къэралыгъо бгъэхалъхьэхэри щаратыжьыгъэх. Псауныгъэм икъэухъумэнкIэ гъэхъэгъэшхо зышIыгъэхэм гъэшIогъэ званиехэу «Адыгэ Республикэм инароднэ врач» зыфиIорэ цIэ лъапIэр афагъэшъошагъ. ЛIышъхьэм къыхигъэщыгъэх МКъТУ-м хэхьэрэ медицинэ институтым факультетскэ терапиемкIэ икафедрэ икIэлэегъэджэ шъхьаIэу НамытIэкъо Мурат ыкIи урологиемкIэ ыкIи хирургиемкIэ кафедрэм икIэлэегъаджэу, республикэ сымэджэщым иурологие отделение ипащэу Даур Мурат.

Псауныгъэр къэухъумэгъэнымкIэ УФ-м и Минстерствэ и Рэзэныгъэ тхылъхэмкIэ къыхагъэщыгъэх МКъТУ-м хэхьэрэ медицинэ институтым инфекционнэ узхэмкIэ, дерматовенерологиемкIэ ыкIи фтизиатриемкIэ икафедрэ идоцентэу ПсыIушъо Людмилэ, МКъТУ-м икIэлэегъэджэ шъхьаIэу Светлана Черновар, «Адыгэ республикэ волейбольнэ клубэу «Адыгеир-МКъТУ-р» зыфиIорэм ипащэу Павел Зборовскэр.

Врачебнэ Iофыр цIыфым изыпкъитыныгъэ, ипытагъэ ыкIи илIыгъэ къапкъырэкIы. Медицинэм иIофышIэхэм мэфэкIыр зыфэдэр ашIэрэп, сыда пIомэ цIыфхэм япсауныгъэ къэшъоухъумэ, ошIэ-дэмышIагъэ зыхэлъ тхьамыкIагъохэм ялъэхъан IэпыIэгъу шъуафэхъу, сымаджэхэр нахь псынкIэу алъэ зэрэтеуцожьыщтхэм шъунаIэ тешъогъэты.
Мафэ къэс Iофэу жъугъэцакIэрэм шIэныгъэ куухэм анэмыкIэу, къулаиныгъи, щэIагъи, гукIэгъуи ищыкIагъэх. Медицинэ сэнэхьатыр къыхэпхыгъэмэ пшъэдэкIыжь ин зэрэпхьырэр, узышъхьамысыжьэу ащ уфэлэжьэн зэрэфаер, цIыфхэр япсауны­гъэкIэ къызэрэпщыгугъухэрэр зыщыбгъэгъупшэ хъущтэп.
ЦIыфхэм япсауныгъэ икъэухъумэн лъэгэпIэ иным нэгъэсыгъэным, къэлэдэсхэмрэ къоджэ­дэсхэмрэ зэфэдэ медицинэ IэпыIэгъу ятыгъэным тынаIэ тетэгъэты.
Медицинэм иIофышIэхэмрэ Адыгэ Респуб­ликэм икъэралыгъо хэбзэ къулыкъухэмрэ акIуачIэ зэхэлъэу, хэгъэгум ипащэхэм яIэпыIэгъу хэлъэу джырэ шапхъэхэм адиштэрэ лъэгэпIакIэхэм псауныгъэм икъэухъумэн зэратетщэщтым тыпылъ. МэфэкIымкIэ сышъуфэгушIо, сиIофшIэгъухэр,— закъыфигъэзагъ медицинэм щылажьэхэрэм Мэрэтыкъо Рустем.

Iофтхьабзэм икIэухым Адыгеим итворческэ купмэ концерт къатыгъ, зимэфэкIхэм ащ фэдэ шIыкIэкIэ къафэгушIуагъэх.