Мыекъопэ къэралыгъо технологическэ университетым илIыкIохэр медицинэм иIофышIэхэу коронавируснэ инфекцием ебэныхэзэ зидунай зыхъожьыгъэхэм ялIыхъужъыныгъэ фэгъэхьыгъэ шIэжь мыжъосыным икъызэIухын хэлэжьагъэх.

Мыекъопэ къэлэ клиническэ сымэджэщым ищагу саугъэтыр дагъэуцуагъ. Ащ икъызэIухын фэгъэхьыгъэ зэхахьэм хэлэжьагъэх АР-м и ЛIышъхьэу КъумпIыл Мурат, псауныгъэр къэухъумэгъэнымкIэ АР-м и Министрэу Мэрэтыкъо Рустем, республикэм имедикхэр, Мыекъопэ къэралыгъо технологическэ университетым илIыкIохэр — МКъТУ-м хэхьэрэ медицинскэ институтым истудентхэр ыкIи кIэлэегъаджэхэр, гъэсэныгъэ медицинскэ кластерэу «Профимед» зыфиIорэм иIофшIакIохэр.

— Непэ мыщ зэкIэхэми тыкъыщызэрэугъоигъэх короновируснэ инфекцием ебэнхэзэ, япрофессиональнэ пшъэрылъ агъэцакIэзэ зыпсэ зытыгъэхэм яшIэжь дгъэлъэпIэнэу. Мы саугъэтым къегъэлъагъо шъхьэкIэфэныгъэшхоу ыкIи рэзэныгъэшхоу медицинэм иIофышIэхэм афэтшIырэр. Ахэр ары зипсауныгъэ фэмысакъхэу цIыфыбэмэ ящыIэныгъэ къэзгъэнэжьыгъэхэр. Тэ ренэу тыгу илъыщтых псэемыблэжьыныгъэу врачхэм, медсестрахэм, санитармэ, фельдшермэ, лаборантмэ, IэпыIэгъу псынкIэм щылажьэрэмэ, студент-гуфакIомэ къахэфагъэр, ковидым ипандемие зэребэныгъэхэр, — къыщиIуагъ зэхахьэм КъумпIыл Мурат.

Ащ зэхахьэм хэлажьэрэмэ агу къыгъэкIыжьыгъ, пандемием илъэхъан цIыфэу коронавируснэ инфекциер къызэузыгъэмэ яIазэхэзэ псауныгъэм икъэухъумэн системэ щылажьэрэ нэбгырэ мини 3,5-рэ сымаджэ зэрэхъугъагъэхэр, гухэкI нахь мышIэми, нэбгырэ 18-мэ ядунай ахъожьыгъ.

Медикхэу зыпсэ зытыгъэмэ ащыщых МКъТУ-м икIэлэегъаджэхэри. Ахэр врачхэу-кIэлэегъэджэхэу: лечебнэ факультетым идеканэу, Республикэ сымэджэщым иклиническэ фармакологэу, медицинэ шIэныгъэхэмкIэ кандидатэу, физиологием ыкIи патологием икафедрэ идоцентэу Хьатхъохъу Майя, Республикэ сымэджэщым и ЛОР отделение ипащэу, медицинэ шIэныгъэхэмкIэ докторэу, госпитальнэ хирургием ыкIи диплом ужэу гъэсэныгъэм икафедрэ ипрофессорэу Боджэкъо Адам.

Саугъэтым икъызэIухын фагъэшъошагъ МКъТУ-м илечебнэ факультет ия 6-рэ курс иотличникэу Шъао Алый. 2019-рэ илъэсым къыщегъэжьагъэу «Апэрэ IэпыIэгъур ыкIи Iофтхьабзэмэ язэхэщэн» ВОД «ГуфакIохэр-медикхэр» зыфиIохэрэм ар яшъолъыр координатор. 2020-2021-рэ илъэсхэм фельдшерэу эпидемиологическэ бригадэу «COVID-19» зыфиIорэм Iоф щишIагъ, палатнэ медбратэу COVID-19 узыр къызэузыгъэхэр зычIэлъыгъэхэ пульмонологическэ отделением щылэжьагъ.

МКъТУ-м илечебнэ факультет истуденти 150-у «зонэ плъыжьым» щылажьэрэмэ Алый зэу ащыщыгъ. Ащ фэшъхьафэу джыри нэбгырэ 50 колл-гупчэм Iоф щашIагъ. Лечебнэ факультетым икIэлэегъаджэхэми афэшIэщтыр ашIагъ. ГущыIэм пае, медицинскэ институтым ипащэ МГКБ-м инфекционистэу агъэкIогъагъ, студентмэ ягъусэу ар коронавируснэ инфекцие узым игъэнэфэн ыкIи игъэхъужьын Iофтхьабзэхэм ахэлэжьагъ.

Лечебнэ факультетым истудентхэр гъогу-постовой къулыкъум гуфакIохэу ахэтыгъэх. Пандемием илъэхъан а факультет дэдэм истудентхэр урысые акциеу «МЫВМЕСТЕ» зыфиIорэм хэлэжьагъэх, гъомлапхъэхэр зекIон зымылъэкIыхэрэм е жъажъэу зекIохэрэм, гъот макIэ зиIэхэм афащэщтыгъ.

Непэрэ шIэжь мыжъосыныр цIыфхэм ящыIэныгъэ къызэтезгъэнэжьхэзэ фэхыгъэхэм афэгъэхьыгъ, мы чIыпIэм ахэмэ Тхьэм уащыфелъэIун, рэзэныгъэ гущыIэхэр ащыпэбгъохын плъэкIыщт.