Мы мафэхэм Сеченовскэ университетэу Москва дэтым «Медицинскэ ыкIи фармацевтическэ апшъэрэ еджапIэхэм яректорхэм я Совет» и Ассоциациерэ Урысыем гъэсэныгъэмрэ шIэныгъэмрэкIэ и Министерствэ хэхьэрэ къэралыгъо университетхэм ямедицинэ факультетхэм япащэхэмрэ зыхэлэжьэгъэхэ зэхэсыгъо щыкIуагъ. Ащ унашъо щашIыгъ Ассоциацием Мыекъопэ къэралыгъо технологическэ университетыр хагъэхьанэу.

Мы мафэм Ассоциацием зэхахьэм иунашъокIэ апшъэрэ еджэпIэ 18 хагъэхьагъ. Джы Урысыем гъэсэныгъэмрэ шIэныгъэмрэкIэ и Министерствэ епхыгъэ апшъэрэ еджэпIэ 56-м щыщэу Ассоциацием 31-р хэт.

Ассоциациер зыкIызэхащагъэр пшъэрылъэу щыIэхэр зэдагъэцэкIэнхэм, апшъэрэ еджапIэхэм яректорхэм Iофэу ашIэрэм зыкIныгъэ хэлъынхэм афэшI. Урысыем имедицинскэ ыкIи фармацевтическэ гъэсэныгъэ, ар апшъэрэ системэм хэтэу хэхъоныгъэхэр егъэшIыгъэнхэмкIэ IэпыIэгъушIоу мы Iофыгъор мэхъу. Джащ фэдэу нормативнэ шапхъэу щыIэхэр, гъэсэныгъэмрэ шIэныгъэмрэ зэщэлIэгъэнхэм, IэкIыб къэралыгъохэм ыкIи дунэе гъэсэныгъэ, шIэныгъэ, культурнэ организациехэм зэпхыныгъэхэр адэшIыгъэнхэм ар фытегъэпсыхьагъэу щыт. Ащ фэшъхьафэу, пшъэрылъэу агъэуцу рагъаджэхэрэр, апшъэрэ еджапIэхэу медицинэм ыкIи фармацевтикэм фэгъэзагъэхэм яIофышIэхэр социальнэу къаухъумэгъэнхэу, ректорскэ сообществэм исоциальнэ ыкIи фитныгъэ статус гъэпытэгъэныр.

Ассоциацием иIофшIэн дырагъэштагъ Урысыем гъэсэныгъэмрэ шIэныгъэмрэкIэ и Министрэу Валерий Фальковымрэ псауныгъэр къэухъумэгъэнымкIэ УФ-м и Министрэу Михаил Мурашкомрэ.

— Мыщ фэдэ купэу апэрэу тызэрэугъоих, къэпIон хъумэ, мы хъугъэ-шIагъэм тарихъ мэхьанэ иI. Нахь зэпхыныгъэ ыкIи зэдэлэжьэныгъэ пытэхэр зэрэзэдытиIэщтхэм, тапашъхьэ къиуцорэ пшъэрылъхэм тызэгъусэхэу тазэрэфэкIощтым щэч хэлъэп, — къыщиIуагъ зэхэсыгъом Валерий Фальковым.

Урысыем гъэсэныгъэмрэ шIэныгъэмрэкIэ и Министерствэ ипресс-къулыкъу къызэритыгъэмкIэ, министритIуми мы Iофыгъор къызкIэтэджыгъэу алъытагъэр псауныгъэм икъэухъумэн системэ IэпэIэсэныгъэшхо зыхэлъ кадрэхэм зэращыкIэрэм къыхэкIыгъэу ары. Валерий Фальковым пшъэрылъищ анахь шъхьаIэхэу къыгъэнэфагъэх. Ащ ишIошIкIэ, федеральнэ къэралыгъо гъэсэныгъэ шапхъэхэм зыкI екIолIакIэхэр медицинскэ программэхэм афэшIыгъэн, псауныгъэр къэухъумэгъэнымкIэ УФ-м и Министерствэ ягъусэу кIэлэегъаджэхэм ясэнэхьат зыщыхагъахъорэ программэр къихьащт еджэгъу илъэсыкIэм университетхэм ыкIи медицинэм фэгъэзэгъэ институтхэм ащытIупщыгъэн ыкIи Iэмэ-псымэхэу ахэм ащагъэфедэхэрэр гъэкIэжьыгъэнхэ фае. Ащ фэшI, 2025-рэ илъэсым ищылэ мазэ и 1-м къыщыублагъэу медицинскэ Iэмэ-псымакIэхэр зэгъэгъотыгъэнхэм афэгъэхьыгъэ ведомственнэ программакIэр атIупщыщт.

Валерий Фальковым шъхьафэу ынаIэ тыридзагъ IэкIыб къэралыгъомэ къарыкIыгъэ студентхэр мы Iофыгъохэм къахэгъэлэжьэгъэнхэ зэрэфаем, ахэмэ медицинэ гъэсэныгъэр апэ рагъэшъы, ар къыдалъытэнэу къяджагъ. Зэхахьэм хэлажьэрэмэ агу къыгъэкIыжьыгъ, УФ-м и Президентэу Владимир Путиным и Унашъоу «Урысые Федерацием илъэпкъ пшъэрылъхэу 2030-м нэс ыкIи 2036-м ателъытагъэм» зыфиIорэм елъытыгъэу 2030-рэ илъэсым ехъулIэу къэралыгъом иапшъэрэ еджапIэхэм IэкIыб хэгъэгумэ къарыкIыгъэхэу ащеджэхэрэр нэбгырэ мин 500-м нагъэсынэу щыт.

А Iофыгъор зэшIохыгъэнымкIэ зишIуагъэ къэкIощтхэм ащыщ студентхэр зычIэсыщтхэ общежитиехэм язытет гъэтэрэзыгъэныр, ащ фэшI президентскэ программэм елъытыгъэу общежитие 800 агъэцэкIэжьынэу агъэнафэ.