Непэ Мыекъопэ къэралыгъо технологическэ университетым мэкъу-мэщымкIэ и ШIэныгъэ-ушэтэкIо институт шIэныгъэ-производственнэ Iофтхьабзэу «Шъофым ибжыхьасэхэм ямаф» зыфиIорэр щыкIуагъ, ащ икIэщакIор мэкъу-мэщымкIэ Адыгэ Республикэм и Министерств ары.

Iофтхьабзэм хэлэжьагъэх мэкъу-мэщымкIэ Адыгэ Республикэм и Министрэу КIуанэ Анзаур, МКъТУ-м шIэныгъэ IофшIэнымкIэ ыкIи инновациехэм хэхъоныгъэхэр ягъэшIыгъэнхэмкIэ проректорэу Татьяна Овсянниковар, районхэм арыт мэкъу-мэщ гъэIорышIапIэхэм япащэхэр, агрохимическэ къулыкъум игупчэ, шIэныгъэ институтым ыкIи ФГБНУ «Национальный центр зерна им П.П. Лукьяненко» зыфиIорэм ялIыкIохэр, селекционнэ-чылапхъэ компаниехэу«Ruseed» ыкIи АО «Щёлково Агрохим» зыфиIохэрэм къарыкIыгъэхэр, студентхэр.

ШIуфэс гущыIэкIэ къэзэрэугъоигъэхэм закъыфагъэзагъ Мыекъопэ къэралыгъо технологическэ университетым мэкъу-мэщымкIэ и ШIэныгъэ-ушэтэкIо институт ипащэ ипшъэрылъхэр зыгъэцакIэу, мэкъу-мэщ шIэныгъэхэмкIэ кандидатэу Хьаткъо Казбек ыкIи МКъТУ-м шIэныгъэ IофшIэнымкIэ ыкIи инновациехэм хэхъоныгъэхэр ягъэшIыгъэнхэмкIэ проректорэу Татьяна Овсянниковар.

ЗэIукIэгъум чылапхъэмэ япхыгъэ Iофыгъохэм щатегущыIагъэх, агробизнесым IэпыIэгъу зэраратырэм игугъу ашIыгъ, шъофым фэгъэзэгъэ Iахьым бжыхьасэхэм язытет щауплъэкIугъ, раутыгъэ чылапхъэхэр зыфэдэхэр зэрагъэшIагъ.

КIымафэм пхырыкIырэ зэнтхъ сорти 6-мэ язытет экспертмэ зэрагъэшIагъ, бжыхьэсэ коц сорт 30-мэ уасэ афашIыгъ.

Iофтхьабзэм ихьакIэмэ упчIэ гъэшIэгъонхэр яIагъэх, зэкIэхэми джэуап дэгъухэр, зэхэугуфыкIыгъэхэр агъотыгъэх, Мыекъопэ къэралыгъо технологическэ университетым мэкъу-мэщымкIэ и ШIэныгъэ-ушэтэкIо институт испециалистхэм технологиеу агъэфедэхэрэ зыфэдэхэр къаIуатагъэх.