Мы тхьэмафэм Мыекъопэ къэралыгъо технологическэ университетым социальнэ проектхэм язэнэкъокъу ия II-рэ едзыгъо щыкIуагъ.

Студентмэ яIофшIагъэхэр къагъэлъэгъуагъэх, ахэр программэу «Къулыкъу ахьызэ егъэджэгъэнхэр» зыфиIорэм къыдыхэлъытагъэхэу агъэцэкIагъэх ыкIи экспертмэ лъэныкъуитфыхэмкIэ осэшхо къафашIыгъ: «Тарихъ кIэныр», «БэгъашIэм фэкIогъэныр», «Урысыем икультурэрэ ихабзэхэмрэ къэухъумэгъэнхэр», «Инклюзивнэ обществэр», «Шъолъырхэм хэхъоныгъэхэр ягъэшIыгъэнхэр».

Очнэ шIыкIэм тетэу проект 55-рэ апшъэрэ еджэпIитфмэ ащеджэрэ студентмэ къагъэлъэгъуагъ: Поволжскэ институтэу П.А. Столыпиным ыцIэ зыхьырэм, (РАНХ-м икъутам ыкIи ГС-м, Саратов), Омскэ къэралыгъо университетыр, Волгоградскэ къэралыгъо университетыр, Адыгэ къэралыгъо университетыр ыкIи Мыекъопэ къэралыгъо технологическэ университетыр.

Я III-рэ едзыгъор (очнэ шIыкIэм тетэу) мэкъуогъум и 11-м къыщыублагъэу и 14-м нэс рагъэкIокIыщт, ащ зэнэкъокъум зэфэхьысыжьхэр щыфашIыщтых, текIоныгъэ къыдэзыхыгъэхэр къыщыхагъэщыщтых. Ахэм мыщ фэдэ ахъщэ шIухьафтынхэр къяжэх: I-рэ чIыпIэр — сомэ 10000; я 2-рэ чIыпIэр — сомэ 8000; я 3-рэ чIыпIэр — сомэ 6000.

Программэу «Къулыкъу ахьызэ егъэджэгъэнхэр» зыфиIорэм мэхьанэшхо иI обществэм хэхъоныгъэ егъэшIыгъэнымкIэ. Ащ мыщ фэдэ ушъхьагъухэр иIэх: социальнэ пшъэдэкIыжьыр ыкIи гражданствэр; практическэ шIэныгъэр бгъэфедэныр; апшъэрэ еджапIэхэмрэ социальнэ хэхъоныгъэ зышIырэ сообществэхэмрэ язэпхыныгъэхэр гъэпытэгъэнхэр; инклюзивностымрэ зэфэдэныгъэмрэ. Джащ тетэу программэу «Къулыкъу ахьызэ егъэджэгъэнхэр» зыфиIорэм гъэсэныгъэм изытет нахьышIу ешIы ыкIи обществэм социальнэ хэхъоныгъэ егъэшIыгъэным иIахь хелъхьэ.

Тикъэбархэм шъуакъылъыплъ, текIоныгъэ къыдэзыхыгъэмэ ацIэхэр къэтIопщыщтых ыкIи илъэсым ианахь социальнэ проект дэгъум шъущыдгъэгъозэщт!