Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ МКъТУ-м иректорэу Къуижъ Саидэ. Университетым иIофшIэн, хэхъоныгъэу ышIыщтхэм зэхэсыгъор афэгъэхьыгъагъ. Джащ фэдэу зэхэсыгъом хэлэжьагъ МКъТУ-м ипрезидентэу, профессорэу ТхьакIущынэ Аслъан.

Повесткэм тегущыIэнхэм ыпэкIэ ректорэу Къуижъ Саидэ апшъэрэ гъэсэныгъэмкIэ ыкIи наукэмкIэ Урысыем и Министерствэ ищытхъу тхылъхэр илъэс пчъагъэхэм къакIоцI гъэхъагъэхэр ашIыхэзэ Iоф зышIагъэмэ аритыжьыгъэх. Ахэр: МКъТУ-м экономикэм иинформационнэ системэ ифакультет идеканэу, экономикэ шIэныгъэхэмкIэ докторэу Дэргушао Асиет, МКъТУ-м иегъэджэн-методическэ отдел игъэIорышIапIэ ипащэу, экономикэ шIэныгъэхэмкIэ кандидатэу, доцентэу Наталья Чудесовар, финансовэ гъэIорышIапIэм ипащэу Екатерина Мельниковар, физикэ-хьисап шIэныгъэхэмкIэ кандидатэу Ольга Шевяковар, МКъТУ-м и ШIэныгъэ тхылъеджапIэ ипащэ игуадзэу Ирина Берберьян. Хабзэ зэрэхъугъэу профессорскэ-кIэлэегъэджэ купым хэтхэу зимэфэкIхэми афэгушIуагъэх.

Повесткэм зэритым тетэу кIымэфэ зачетнэ-ушэтын сессием изэфэхьысыжьхэм афэгъэхьыгъэ доклад къышIыгъ МКъТУ-м иегъэджэн-методическэ отдел игъэIорышIапIэ ипащэу, экономикэ шIэныгъэхэмкIэ кандидатэу, доцентэу Наталья Чудесовам. Ащ къызэриIуагъэмкIэ, студентмэ янахьыбэрэмэ ушэтынхэр дэгъоу акIугъэх, шIэныгъэ дэгъухэр къагъэлъэгъуагъэх.

Квалификациехэм якъыхэхын епхыгъэ IофыгъуакIэу къырахьыжьагъэми ащ щигъэгъозагъэх.

Ащ ыуж цифровизациемкIэ МКъТУ-м ипроректорэу Дмитрий Игнатовым цифрэ трансформациеу университетым 2030-рэ илъэсым нэс иIэщтым истратегие къыIотагъ. Ащ идоклад къыщыкIигъэтхъыгъ гъэсэныгъэ процессыр регъэкIокIыгъэным непэрэ технологиехэр зэрэхэлажьэхэрэр, университетым ицифровизацие, онлайн-гъэсэныгъэм хахъоу ышIыхэрэр, административнэ процессхэм яавтоматизацие.

Лечебнэ факультетым идеканэу Беслъангъурэ Заремэ кафедрэхэм язытет игугъу къышIыгъ. Медицинэм щылэжьэщт специалистхэм яухьазырыныгъэ епхыгъэ Iофхэм кафедрэхэр зэрафырикъухэрэр къыIуагъ.

Апшъэрэ еджапIэр къэзыухыхэрэр аспирантурэм еджэныр щылъагъэкIотэным фэгъэхьыгъэ къэбарыр къыриIотыкIыгъ философием, социологием ыкIи педагогикэм якафедрэ ипрофессорэу, культурологиемкIэ докторэу Сихъу Аминат. Ащ къызэриIуагъэмкIэ шIэныгъэ ыкIи кIэлэегъэджэ кадрэхэм ягъэхьазырын епхыгъэ Iофхэр университетым дэгъоу зэшIуехых, апшъэрэ квалификацие зиIэхэр егъэхьазырых.

Приемнэ комиссием пшъэдэкIыжь зыхьырэ исекретарэу Бэрзэдж Розэ IофыгъуакIэу 2024-2025-рэ илъэсхэм къыхэхьагъэхэм къатегущыIагъ.

Егъэджэн IофшIэнымкIэ проректорэу Людмила Задорожнаяр МКъТУ-м ишIэныгъэлэжь совет зэзэгъыныгъэмэ я Шапхъэ къыхилъхьагъ. Университетым щылажьэрэмэ яIофшIакIэ хэгъэхъогъэным, яIэпэIэсэныгъэ зыкъегъэIэтыгъэным фытегъэпсыхьэгъэ зэхъокIныгъэхэр ащ фэхъугъэх, къэралыгъо аттестациеми зэхъокIыныгъэхэр иIэхэ хъугъэ.

ЫпкIэ зыхэлъ гъэсэныгъэ фэIо-фашIэхэмкIэ уасэхэр гъэнэфэгъэнхэм, ВО ыкIи СПО-м, магистрантхэм, аспирантхэм, ординаторхэм ыкIи урысыбзэр зэзыгъашIэхэу апэрэ курсым щеджэщтхэм афэгъэхьыгъэу къэгущыIагъ финансхэмкIэ гъэIорышIапIэм ипащэу Елена Мельниковар.

МКъТУ-м ишIэныгъэлэжьхэм ясовет изэхэсыгъо икIэухым зыщытегущыIагъэхэр университетым щеджэрэ студентмэ яеджапкIэ къыщыгъэкIэгъэныр ары. Ащ къытегущыIагъ ныбжьыкIэ политикэмкIэ проректорэу БрантIэ Мурат.

Мыекъопэ къэралыгъо технологическэ университетым шIэныгъэлэжьхэм ясовет изэхэсыгъоу зэхищагъэм зэфэхьысыжьхэр фашIыгъэх, упчIэу къаIэтыгъэхэр зэкIэ зэхафыгъэх.