Мыекъопэ къэралыгъо технологическэ университетым истудентэу Денис Шишкаловым ипащэу, МКъТУ-м фармациемкIэ кафедрэм идоцентэу Ростислав Гаченкэр игъусэу апшъэрэ еджапIэхэм ячемпионатэу «Профессионал ныбжьыкIэхэр» зыфиIорэм ифинал ихьагъ, ар зэхэзыщагъэхэр псауныгъэр къэухъумэгъэнымкIэ Министерствэм И.М. Сеченовам ыцIэ зыхьырэ Апэрэ МГМУ-рэ АНО «Агентство развития профессионального мастерства (Ворлдскиллс Россия)» зыфиIорэмрэ.

ЗэкIэмкIи зэнэкъокъухэм Урысые Федерацием иуниверситет зэфэшъхьафхэм къарыкIыгъэхэ нэгыри 9 ахэлэжьагъ. Денис IофшIэгъэ дэгъухэр къыгъэлъэгъуагъэх ыкIи яплIэнэрэ чIыпIэр ыубытыгъ.

Зэнэкъокъур модульнэ программэ лъэныкъуабэхэмкIэ рекIокIыгъ, ары пэпчъ хэушъхьэфыкIыгъэ пшъэрылъ иIагъ.

—Фармацевтическэ организациер зычIэтыщт унэм игъэхьазырын. Iэзэгъу уцхэм язытет, ахэр къаIахыхэ, къаухъумэхэ хъумэ алъыплъэгъэныр, апэрэ учетым хэгъэуцогъэнхэр, уцыщэ тучанмэ аратыхэрэм афэсакъыгъэныр.

ГъэцэкIэнхэм къаделъытэ унэр санитарнэ шапхъэхэм адештэмэ ауплъэкIуныр, Iэмэ-псымэу агъэфедэрэр ауплъэкIуныр, унэмэ жьэу ачIэтым икъэбзагъэ зэрагъэшIэныр, температурэу гъэучъыIалъэм чIэтыр зэхафыныр,

Нэбгырэ пэпчъ икъэбзагъэ, щыгъынхэр санитарнэ шапхъэмэ адештэхэмэ зэгъэшIэгъэныр, нормативнэ документхэр IофшIэным тегъэпсыхьэгъэнхэр ыкIи нэмыкIхэр.

Симуляционнэ программэр агъэфедэзэ Iэзэгъу уцхэр аштэнхэ фэягъэ: язытет уплъэкIугъэныр, документэу ягъусэхэм ахэплъэгъэныр, товарым игъусэ учетнэ документхэр гъэпсыгъэнхэр, аптечнэ программэм товарыр дэгъэхьэгъэныр, фыкъуагъэхэр къахэкIыгъэхэмэ, ахэмэ документ апылъхьэгъэныр ыкIи нэмыкIхэр. 

— Фармацевтическэ организациер зычIэтыщт унэм игъэхьазырын. Врачмэ ярецепткIэ Iэзэгъу узхэр шIыгъэнхэр, медицинскэ ыкIи ветеринарнэ организациемэ къатыгъэ шапхъэмэ атетэу ахэр щытынхэр. Зэнэкъокъум хэлажьэрэм рецептищ раты, псыкIэ, пытэкIэ ыкIи шъабэкIэ гъэпсыгъэу уцхэр щытынхэ фае. ГъэцэкIэнхэр еухыхэфэ нэс, Iофтхьабзэм хэлажьэрэм фармацевтическэ экспертизэр ышIынэу щыт, компонентэу ищыкIагъэр зыфэдизыр къылъытэн, оптимальнэ технологием егупшысэн, уцым изытет зэригъэфэн ыкIи зэритIупщыщтым фигъэхьазырын фае.

Уцыр зыфэдэщтыр, ар рецептэу зэрашIыщтыр экспертмэ зэнэкъокъур зыщыкIощт мафэм агъэнафэ. Ар егъэцакIэфэ нэкъуакъом журналхэм адетхэ жьы шынэгъакIэр зыфэдизыр, температурэу ащ иIэр, ахэмэ ахэхьэ рецептурнэ журналыри.

— Фармацевтическэ организациер зычIэтыщт унэм игъэхьазырын. Уцыщэ тучанмэ аIупэхэм уцэу ащэхэрэр къызэрэтыралъхьэрэр. Фармацевтическэ упчIэжьэгъоу щэфакIомэ адашIырэр, уцхэр ахэм зэрэращэхэрэр, Iэзэгъу уцхэу цIыфхэм аIэкIагъахьэхэрэм изытет, фармацевтическэ экспертизэу ашIырэр.

ЩэпIэ гупчэм хэхьэрэ унэхэри нэкъуакъомэ ауплъэкIунхэу щыт. Ахэр санитарнэ шапхъэхэм адештэхэмэ, уплъэкIун приборхэр, къызэралъытэрэ-кассовэ Iэмэ-псымэхэр мыкъутагъэхэмэ еплъых. Джащ фэдэу фармацевтическэ организациехэм яунэхэм жьым икъэбзагъэ ащауплъэкIу, гъэучъыIалъэхэм, хэушъхьафыкIыгъэ щыгъынхэм язытет, ахэр санитарнэ шапхъэмэ адештэхэмэ зэрагъашIэ.

— Автоматизированнэ склад системэмэ Iоф адэшIэгъэныр. Фармлогистика. Фармменеджмент». Ар гъэцэкIэгъэным фэшI мы модулым нэкъуакъом пшъэрылъ щыфашIы ситуационнэ Iофхэу уцыщэ тучаным IофшIэныр зэрэщыкIорэр къызэрэщашIырэр, ащ иавтоматизированнэ склад системэхэр зыфэдэхэр ауплъэкIух, зыгъэцакIэрэр уцыщэ тучаным иIофышIэхэр ары, аналитическэ ыкIи зэхэщэн IофшIэныр агъэцакIэрэм фэдэу ашIы, фармацевтическэ логистикэмкIэ отчет къаты, документмэ Iоф адашIэ. Нэкъуакъом амал раты тхьамафэм къыкIоцI зэрэлэжьэщтымкIэ график зэхигъэуцонэу, ар иIофшIакIохэм апашъхьэ лъэтегъэуцо фишIынэу щыт. Расписаниер зэхагъэуцо хъумэ, IофыгъуакIэу къыкъокIыгъэхэр хигъэхьанхэ ыкIи ащ фэшI программэу ежь фэIэрыфэгъум таблицэ щызэхигъэуцон фае.

ГъэцэкIэным зэфэхьысыжьэу фэхъурэр — расписаниер зэрэщыIэмрэ ащ илъэтегъэуцорэ. Нэкъуакъом ситуационнэ пшъэрылъ къыфашIы, ащ елъытыгъэу Iэзэгъу уц къэзышIырэм МНН ХХХ игъусэу ипродукт Урысые Федерацием (ЕАЭС-м иреферентнэ къэралыгъу) ибэдзэр хигъэхьаным дэлажьэ. Ащ пае зэраригъэтхыщтым истратегие ыгъэхьазырын ыкIи къэзышIыщтым лъэтегъэуцо фишIын фэягъ.

ШIэныгъэ пащэми студентми тафэгушIо, ягъэхъагъэхэм джыри хагъэхъонэу тафэлъаIо!