Мыекъопэ къэралыгъо технологическэ университетым и «Точка кипением» хэт студентхэмрэ гъэсакIохэмрэ интенсивэу «ГукъэкIым къыщегъэжьагъэу апэрэ шIыгъом нэсэу» Университет 2035-рэ зыфиIорэм иIофшIэн чанэу хэлажьэх.

Проектнэ командэмэ зэнэкъокъум иапэрэ едзыгъо акIугъ. МКъТУ-м истудентхэр зэрахэтхэу Iофтхьабзэм командэ 312-рэ хэлэжьагъ, ахэр Урысыем ишъолъыр 38-мэ къарыкIыгъэх. Ащ ехъулIэу командэмэ ушэтынхэр ашIыгъэх, пшъэрылъхэр зыфэдэхэр агъэунэфыгъэх, аудиториеу зыдэлэжьэщтхэр къыхахыгъэх, апэрэ шIыгъор зэрагъэшIагъ.

МКъТУ-м икомандэмэ Iофтхьабзэм проектхэр къыщатыгъэх, лъэтегъэуцохэр афашIыгъэх, экспертмэ технологическэ ыкIи экономическэ лъэныкъохэр зэрагъэцэкIэщтхэр адызэхафыгъэх. Видеороликыр техыгъэнымкIэ, прототипыр гъэхьазырыгъэнымкIэ кIэлакIэмэ джэнджэш дэгъухэр къараIуагъэх, инвестормэ япроектхэр арагъэлъэгъунымкIэ, федеральнэ лъэгапIэхэм анагъэсынхэмкIэ ашIэн фаехэр къафаIотагъэх.

Студентмэ коммерческэ IэрышIэу технологическэ гукъэкIымкIэ агъэнэфагъэхэм ащыщыр — дроносфера («Дронпорт»), пынджым пыдзафэу къыхэкIыхэрэм ягъэкIодыжьын дэлажьэрэр, инновационнэ предприятиер, шIэныгъэ-арагъашIэрэ информационнэ продуктыр: «Бактериофагхэр кIэлэцIыкIухэм апае зэрагъэфедэхэрэр» ыкIи нэмыкIхэр.

«ФудСовет — неущрэ мафэм ишхыныгъу» зыфиIорэм гъэтхэ орым рагъэжьагъэу Iоф дашIэ. Мызыгъэгум, командэм студентмэ апае шхыныгъохэр егъэхьазырых, ахэр зыфэгъэхьыгъэхэр Африкэм ихэгъэгухэм къарыкIыгъэ студентхэр ары. Анахь гъэцэкIэнэу командэ пэпчъ къыфыхахыгъэр агъэпсэуалъэрэ сценариер къэтхыхьэгъэныр, проектыр гъэхьазырыгъэныр ар ылъапсэу. Ащ пае гумэкIыгъо ыкIи шIуагъэ къэзытыщт зэдэгущыIэгъухэр рагъэкIокIыгъэх.

Мыекъопэ къэралыгъо технологическэ университетым и «Точка кипением» мафэм къыкIоцI мыщ фэдэ лъэубэкъухэр щадзынхэу агъэнафэ: прототипированиер, тестированиер, зэпхыныгъэр, IофшIэнхэр гъэцэкIэжьыгъэнхэр. Университет 2035-м иметодологие елъытыгъэу а зэкIэлъыкIуакIэр студентмэ бэрэ агъэцэкIэщт, аудиторием ишIоигъоныгъэхэр къыдалъытэщтых.

Лъэтегъэуцор дэгъоу зэшIуагъэкIыным пае студентмэ къагъэлъэгъуагъ апэрэ къэшIыгъом заказчикым игумэкIыгъо зэрэдигъэзыжьырэр. Iофэу зэшIуахырэм экономикэм ылъэныкъокIэ тэрэзэу гъэпсыгъэмэ командэмэ къашIэнэу щытыгъ, федэу заказчикым фэхъурэр зыфэдэр къыхагъэщын фэягъэ.

Шъугу къэдгъэкIыжьын, Университет 2035-м иператорэу МКъТУ-м щыIэр —«Точки кипением» икомандэу мыхэр зыхэтхэр: маркетингым, сервисым ыкIи туризмэм икафедрэ идоцентэу, программнэ пащэу Светлана Новиковар; шIэныгъэ IофшIэным игъэIорышIапIэ ишIэныгъэ IофышIэ нахьыкIэу, администраторэу Мария Тамахинар.