Мыекъопэ къэралыгъо технологическэ университетым и «Точка кипение» апэрэу шIэныгъэ техническэ творчествэу «Шустрик» (КIэлэеджакIоу инновационнэ конструкциехэр зэгъэпсышъурэр) зыфиIорэ Урысые зэнэкъокъум и Шъолъыр едзыгъо щызэхащагъ.

Зэнэкъокъум ипшъэрылъыр — кIэлэеджакIохэр проектнэ процессхэм ахэщэгъэнхэр, макетхэр, модельхэр, прототипхэр ягъэшIыгъэнхэр, зэхагъэуцогъэ проектхэр, конструкциехэр моделирование ашIынхэр, агъэцэкIэнхэр.

Къэзэрэугъоигъэхэм шIуфэс гущыIэхэр къарахыгъэх Адыгэ Республикэм гъэсэныгъэмрэ шIэныгъэмрэкIэ Министрэ IэнатIэр зыгъэцэкIэрэ Евгений Лебедевымрэ инновациехэмкIэ шъолъыр Фондым илIыкIоу Адыгеим щыIэр — шIэныгъэ IофшIэнымкIэ ыкIи инновационнэ хэхъоныгъэ егъэшIыгъэнымкIэ МКъТУ-м ипроректорэу Татьяна Овсянниковамрэ.

2023-рэ илъэсым къыщегъэжьагъэу Мыекъопэ къэралыгъо технологическэ университетыр Адыгэ Республикэм ыцIэкIэ зэнэкъокъум ишъолъыр лIыкIоу щыт.

Мыгъэ заявки 10 Адыгеим къыщатыгъ:

— заявки 2-р «Аддитивные технологии» зыфиIорэм къызэригъэнэфагъэу;

— заявки 4-р «Аэрокосмические технологии» зыфиIорэм къызэригъэнэфагъэ;

— команднэу 2 ыкIи язакъоу 2 заявкэхэр къатыгъэх «Нефтегаз Робот-бурильщик» зыфиIорэм къызэригъэнэфагъэу.

КIэлакIэмэ япроектхэр къагъэлъэгъуагъэх, осэшIмэ упчIэхэр къаратыщтыгъэх ыкIи хагъахъомэ хъущт лъэныкъохэр къараIожьыщтыгъэх. Проектэу къызтегущыIагъэхэр зэкIэ дэгъоу шIыгъэх. ОсэшIмэ текIоныгъиплI къагъэнэфагъ, ахэр финалистхэу щытых ыкIи федеральнэ зэнэкъокъухэм ахэлэжьэнхэу фитныгъэхэр яIэщтых.

Iофтхьабзэм икIэухым кIэлакIэмэ шIухьафтын къяжэщтыгъэ —тортышхо — ар МКъТУ-м иректорэу Къуижъ Саидэ зэнэкъокъум хэлажьэрэмэ шIухьафтынэу аритыгъ.

Научнэ-техническэ сферэм хэхьэрэ хъызмэтшIапIэхэм хэхъоныгъэ ягъэшIыгъэным фэIорышIэрэ Фондыр ыкIи коммерциализацие Гупчэу технологиякIэхэм афэгъэзэгъэ «Сколковэр», Урысыем иинновационнэ шъолъырхэм я Ассоциацие, Проектнэ офисэу ЦМИТ-р зэнэкъокъум иIэпыIэгъугъэх. Инновациехэм адэIэпыIэгъэнымкIэ Фондыр ары мылъкур къэзытIупщыгъэр.

КIэлэцIыкIу техническэ творчествэм хэхъоныгъэхэр егъэшIыгъэнхэр къэралыгъо политикэм иапшъэрэ пшъэрылъхэм ащыщэу гъэсэныгъэр дэлажьэ. Тэ тикIэлэеджакIохэу сэнаущыгъэ зыхэлъхэм тарэпагэ, федеральнэ зэнэкъокъухэм ащытекIонхэу тафэлъаIо!