Сабыйхэу сэнаущыгъэ зыхэлъхэр къыхэгъэщыгъэнхэм ыкIи адэIэпыIэгъэнхэм я Шъолъыр гупчэу «Полярис-Адыгея» зыфиIорэм иковоркинг Урысые гъэсэныгъэ гукъэкIхэм ахэлажьэхэрэм яконференцие щэкIо, ар зыфэгъэхьыгъэр «Сириус. Гъэмафэр: уипроект егъажь» зыфиIорэм игъэсакIохэр япащэхэу кIэлэеджакIохэм шIэныгъэ-технологическэ проектыкIэхэр къаугупшысынхэр ыкIи агъэцэкIэнхэр ары.

Программу «Сириус. Гъэмафэр: уипроект егъажь» зыфиIорэм Фондэу «Сэнаущыгъэмрэ гъэхъагъэмрэ» ышъхьагъ итэу ыкIи Гъэсэныгъэ гупчэу «Сириусыр» игъусэу яплIэнэрэу Iофтхьабзэр зэхащэ, «Iушэу зыбгъэпсэфыныр» зыфиIорэм къыдыхэлъытагъ. Апэрэ мафэхэм къащегъэжьагъэу программэм кIэлэеджэкIо 25604-рэ хэлэжьагъ, гъэсакIоу зыкъыщызгъэлъэгъуагъэхэр урысые апшъэрэ еджапIэмэ ястудент 5940-рэ.

Мы еджэгъу илъэсым Адыгеим ипроектнэ пшъэрылъ 53-мэ командэ 59-рэ адэлэжьагъ, ахэмэ ащыщ нэбгрэ 134-рэ тишъолъыр иеджапIэхэм ыкIи СПО-м иорганизациехэм къарыкIыгъэх, 20-р нэмыкI чIыпIэхэм.

Мыекъопэ къэралыгъо технологическэ университетыр программэм ящэнэрэ илъэс хъугъэ зыхэтыр, командэ 28-рэ къыщегъэлъагъо, ахэр Адыгэ Республикэм иеджапIэхэм ыкIи гурыт профессиональнэ гъэсэныгъэм ащеджэхэрэмкIэ агъэпсыгъэх. Мыекъопэ къэралыгъо технологическэ университетым истудентхэмрэ имагистрантхэмрэ ахэм гъэсакIоу яIэхэр.

Урысые шIэныгъэм ыкIи бизнесым фэгъэхьыгъэ гукъэкIхэм зягъэушэтыгъэнэу, гумэкIыгъохэр дэгъэзыжьыгъэнхэмкIэ ягупшысэхэр къыраIотыкIынхэу студентмэ амал яI.

Конференцием хэлажьэ Фондэу «Сэнаущыгъэр ыкIи гъэхъагъэр» зыфиIорэм испециалистэу Алексей Евдокимовыр.

Адыгэ Республикэм иеджапIэхэм ыкIи гурыт профессиональнэ гъэсэныгъэм ащеджэхэрэм мы программэр агу зыкIырихьырэм мыщ фэдэ ушъхьагъухэр иIэх: урысые наукэм ыкIи бизнесым ииндустрие къыгъэуцурэ пшъэрылъхэр агъэцэкIэнхэмкIэ, нэмыкI шъолъырхэм къарыкIыгъэхэм нэIуасэ афэхъунхэмкIэ ыкIи яшIэныгъэхэм ахагъэхъонымкIэ амалышIухэр къетыхэшъ ары.

Программу «Сириус. Гъэмафэр: уипроект егъажь» зыфиIорэм ишIуагъэкIэ анахь гухэлъ шъхьаIэхэр къадэхъунхэ алъэкIы, сообществэм щыщ мэхъух, ахэр ары дунаир нахьышIум фэзыщэхэрэр.

— Апшъэрэ еджапIэхэм ыкIи колледжхэм ястудентхэмкIэ программу «Сириус. Гъэмафэр: уипроект егъажь» зыфиIорэм амалхэр ныбжьыкIэмэ къареты цIыфыкIэхэр ашIэнхэу, неущрэ мафэм профессиональнэ гъэсэныгъэу агъотыщтымкIэ лъапсэ пытэ ашIы, хэхъоныгъэ ашIыным фыкIегъэблых, — къыIотагъ апшъэрэ еджапIэм чIэхьащтхэр зыщагъэхьазырхэрэ гупчэм ипащэу Олег Франко.

ЕджэпIэ гъэсэныгъэ программэу «Сириус. Гъэмафэр» сэнаущыгъэ зыхэлъ ныбжьыкIэмэ адэIэпыIэ урысые бизнесым ыкIи шIэныгъэм хэщэгъэнхэмкIэ. ХъызмэтшIапIэхэмрэ еджапIэхэмрэ ныбжьыкIэмэ амал къараты анахь пшъэрылъышхохэр зэшIуахынхэу, экономикэм ихэгъэхъон егупшысэнхэу.