Мы мафэхэм Мыекъопэ къэралыгъо технологическэ университетым и Президентэу ТхьакIущынэ Аслъан игрант зэрылъ ятфэнэрэ зэнэкъокъоу «Къэшъумыгъэланл!» зыфиIоу ныбжьыкIэ проектхэмрэ творческэ IофшIэнхэмрэ зыхэлажьэхэрэм зэфэхьысыжь фашIыгъ, лауреатхэр къыхагъэщыгъэх. Ащ шъолъырым иныбжьыкIэ ыкIи иобщественнэ организациехэм ялIыкIохэр хэлэжьагъэх.

Iофтхьабзэр документальнэ фильмэу «Интеллигенциемрэ хабзэмрэ» зыфиIоу илъэс 20-кIэ узэкIэIэбэжьмэ тырахыгъагъэм икъэгъэлъэгъонкIэ къызэIуахыгъ, ащ иавторыр МКъТУ-м иапэрэ ректорэу, социологие шIэныгъэхэмкIэ докторэу, профессорэу ТхьакIущынэ Аслъан.

МКъТУ-м и Президент игрант зэрылъ зэнэкъокъоу ныбжьыкIэ проектхэмрэ творческэ IофшIэнхэмрэ зыхэлажьэхэрэр 2019-рэ илъэсым агъэнэфэгъагъ, ар зигукъэкIыгъэр народнэ дипломатиемкIэ ыкIи культурэхэм азыфагу илъ зэпхыныгъэхэмкIэ МКъТУ-м и Гупчэ ипащэу Саид Мусхаджиевыр ары. Университетым истудентмэ творческэ IофшIэнхэр агъэцэкIэнхэм фэщэгъэнхэр, проектнэ IофшIэнхэр зыфэдэхэм ащыгъэгъозэгъэнхэм ыкIи IофшIэгъэ дэгъухэр лъыгъэкIотэгъэнхэр ары пшъэрылъ шъхьаIэу мы Iофтхьабзэм иIэр. Ащ изэхэщакIохэр народнэ дипломатиемкIэ ыкIи культурэхэм азыфагу илъ зэпхыныгъэхэмкIэ МКъТУ-м и Гупчэрэ ШIэныгъэ тхылъеджапIэмрэ.

Зэнэкъокъур лъэныкъуиплIыкIэ рагъэкIокIыгъ:

— Народнэ дипломатиер ыкIи культурэмэ азыфагу илъ зэпхыныгъэхэр;

— НыбжьыкIэ журналистикэр ыкIи гъэсэныгъэм иинновациехэр;

— Университетым ищыIэныгъ ыкIи псауныгъэм игъэпытэн пылъыгъэныр;

— Социальнэ ыкIи патриотическэ проектхэр.

— Ятфэнэрэу зэнэкъокъум зэфэхьысыжьхэр фэтэшIых, ар ежь игъогу шапхъэ теуцогъах, ныбжьыкIэ пэрытхэр къыхэгъэщыгъэнхэм иIахь хелъхьэ, студентмэ япроектнэ ыкIи творческэ гукъэкIмэ афэIорышIэ, — къыхигъэщыгъ народнэ дипломатиемкIэ ыкIи культурэхэм азыфагу илъ зэпхыныгъэхэмкIэ МКъТУ-м и Гупчэ ипащэу Саид Мусхаджиевым.

Зэнэкъокъум лауреат щыхъугъэхэм торжественнэ шIыкIэм тетэу афэгушIуагъ шIэныгъэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковар. ЗэхэщакIохэм, казачествэм и Союз ыкIи Адыгэ Хасэм ялIыкIохэм дипломхэр къэзылэжьыгъэхэм афагъэшъошагъэх, еджэным ыкIи общественнэ Iофхэм ягухэлъхэр къащыдэхъунхэу студентмэ афэлъэIуагъэх.