Непэ Мыекъопэ къэралыгъо технологическэ университетым Дунэе студенческэ шIэныгъэ-практическэ конференциеу «НыбжьыкIэ мэкъу-мэщ шIэныгъэр» зыфиIорэр щыкIуагъ.

МКъТУ-м мэкъу-мэщ продукциер къыдэгъэкIыгъэным итехнологиехэмкIэ икафедрэ иIофышIэхэр ары Iофтхьабзэр зэхэзыщагъэхэр. ЗещакIохэр: кафедрэм ипащэу Мамсыр Нурбыйрэ кафедрэм идоцентэу Мария Галичевамрэ.

Хэгъэгуи 7-мэ ястудентхэр, магистрантхэр ыкIи аспирантхэр конференцием хэлэжьагъэх: Урысые Федерацием, Казахстан, Узбекистан, Таджикистан, Абхъазым, Белоруссием, Афганистан къарыкIыгъэхэр. Нэбгрэ 50-м ехъумэ докладхэр конференцием къыщашIыгъэх.

ШIэныгъэ IофшIэнымкIэ ыкIи инновационнэ хэхъоныгъэхэмкIэ МКъТУ-м ипроректорэу Татьяна Овсянниковам, МКъТУ-м мэкъу-мэщ хъызмэтымкIэ и ШIэныгъэ-ушэтын институт ипащэу Хьаткъо Казбек ыкIи къэкIырэмэ ягенетическэ ресурсхэм я Урысые институтэу Н.И. Вавиловым ыцIэ зыхьырэм ипащэ игуадзэу Евгений Добренковым конференцием хэлажьэрэмэ шIуфэсхэр къарахыгъэх.

Конференцием ипшъэрылъыр — студентхэр шIэныгъэ сообществэм хэщэгъэнхэр, мэкъу-мэщым ылъэныкъокIэ шIэныгъэ ушэтынхэр ягъэшIыгъэнхэр, непэрэ мэкъумэщ IофхэмкIэ пшъэрылъэу къэуцухэрэм язэшIохын къыхэгъэлэжьэгъэнхэр ары. НэмыкI лъэныкъохэм афэгъэзагъэу рагъаджэхэрэри мы отраслым иIофхэм къахэгъэлэжьэгъэнхэм зэхэщакIохэм  анаIэ тырагъэты.

Мыекъопэ къэралыгъо технологическэ университетым Дунэе студенческэ шIэныгъэ-практическэ конференциеу «НыбжьыкIэ мэкъу-мэщ шIэныгъэр» зыфиIоу щыкIуагъэр хъугъэ-шIэгъэшхоу студент закъохэр арэп зыфэхъугъэр, шIэныгъэ сообществэмкIи ар мэхьанэ ин зиIэ Iофыгъу. Мыщ фэдэ Iофтхьабзэ  зэрэзэхащагъэм къегъэлъагъо хэгъэгу зэфэшъхьафхэм ащыпсэухэрэр мэкъу-мэщым фэгъэхьыгъэ шIэныгъэхэмкIэ зэдэгощэнхэм зэрэфэхьазырхэр.