МКъТУ-м истудентхэр Армавир дэт кIэлэцIыкIу сымэджэщым илIыкIохэм аIукIагъэх
Армавир дэт кIэлэцIыкIу сымэджэщым иврач шъхьаIэ ипшъэрылъхэр зыгъэцакIэрэ Наталья Бородинар ыкIи кадрэхэм яотдел ипащэу Эльвира Фальченкэр МКъТУ-м и Медицинскэ институт ипедиатрическэ факультет ия 6-рэ курс щеджэрэ студентмэ аIукIагъэх.
Iофтхьабзэм ипшъэрылъыр — специалист ныбжьыкIэхэр мы медицинскэ учреждением Iоф щашIэным кIэгъэблыгъэнхэр ары. Мыекъопэ къэралыгъо технологическэ университетым IофшIапIэ студентхэм ыкIи къычIатIупщыхэрэм ягъэгъотыгъэнымкIэ и Гупчэ яIэпыIэгъоу мы зэIукIэгъур зэхащагъ.
КIэлэцIыкIу сымэджэщым IофшIэпIэ чIыпIэ щагъотыным епхыгъэ упчIэхэр ары нахьыбэрэмкIэ зэIукIэгъум къыщаIэтыгъэхэр. Педиатрическэ факультетым идеканэу Жанна Кимэ ыпхъур Iофтхьабзэм чанэу хэлэжьагъ, анахь Iофыгъо шъхьаIэу зытегущыIагъэхэр ащ къыIэтыгъэх.
IофшIапIэ студентхэм ыкIи къычIатIупщыхэрэм ягъэгъотыгъэнымкIэ МКъТУ-м и Гупчэ ипащэу Темзэкъо Азамат зэдэлэжьэныгъэм фэгъэхьыгъэ предложениехэу къыхьыгъэхэми адырагъэштагъ.
ЗэIукIэгъум кIэух къыфишIызэ, Наталья Бородинам рэзэныгъэ гущыIэхэр иIофшIэгъухэм къапигъохыгъэх, тапэкIи сымэджэщымрэ университетымрэ шIуагъэ къытэу зэрэзэдэлэжьэщтхэм ицыхьэ зэрэтелъыр хигъэунэфыкIыгъ.