Кавказскэ къэралыгъо природнэ биосфернэ заповедникэу Х.Г. Шапошниковым ыцIэ зыхьырэр илъэси 100 зэрэхъурэм ипэгъокIэу экологическэ факультетым истудентхэр Гъозэрыплъ иэкогупчэ зэрагъэлъэгъугъ, ар заповедникым ишъолъыр хэхьэ.

Iофтхьабзэр зэхэзыщагъэр ыкIи ипэщагъэр экологическэ факультетым идеканэу, биологическэ шIэныгъэхэмкIэ докторэу Галина Коноваловар ары.

Мыекъопэ къэралыгъо технологическэ университетымрэ Мыекъопэ къэралыгъо заповедникымрэ зэзэгъыныгъэу зэдыряIэм къыдыхэлъытагъэу мы дэкIыгъо экскурсиер зэхащэнэу хъугъэ. Апэ Гъозэрыплъэ кордоным екIолIагъэх, къушъхьэтхым ыкIи Адыгеим игурыт къушъхьэмэ яландшафт зэрагъэлъэгъугъ. Экологэ-информационнэ гупчэм иIофышIэхэр студентмэ къапэгъокIыгъэх, ахэмэ заповедникым тарихъэу пылъыр, агъэпсынэу зэрэхъугъэр къафаIотагъ. Тыкъэзыуцухьэрэ дунаим имузей зычIахьэхэм анахьэу ашIогъэшIэгъоныгъэхэм ащыщ шIэныгъэ-популярнэ видеофильмэу зэплъыгъэхэр, ар заповедникым ыныбжь илъэси 100 зэрэхъурэм фэгъэхьыгъэу тырахыгъ.

Ащ фэшъхьафэу, шъолъырым вольернэ комплексым студентхэр щыIагъэх, Кавказ щыIэ псэушъхьэ лъэпкъ зэфэшъхьафхэм  нэIуасэ афэхъугъэх, ахэр къызэрагъэгъунэхэрэ шIыкIэм зыщагъэгъозагъ. Шъолъырым испунэу дэтым анаIэ тырадзагъ, ащ иинагъэ, тарихъ мэхьанэу иIэр зэхашIагъ.

Физическэ амалэу яIэхэр аушэтыныр студентмэ алъэкIыгъ, «Леопардым илъэсгъогу» зыфиIоу метрэ 1700-рэ зикIыхьагъэм рыкIуагъэх, ар псэи чъыгхэр къызэбэкIырэ чIыпIэу щыт, ахэм апхырыкIыгъэх. Джащ фэдэу къэбар зэфэшъхьафхэр зытетхагъэхэ стендмэ нэIуасэ зэфашIыгъ, леопардэу мыщ щыIэм къэбарэу пылъыр зэрагъэшIагъ. Студентмэ яIахьи тыкъэзыуцухьэрэ дунаим халъхьагъ, лъэсгъогухэр аукъэбзыгъэх, пыдзафэхэу зекIомэ къагъанэхэрэр Iуахыжьыгъэх.

Псыхъохэу Шъхьэгуащэрэ МэлкIэпымрэ зыщызэхэлъадэхэрэр зэкIэмэ ашIогъэшIэгъоныгъ, Филомоновэ къушъхьэ цакIэм, псыкъефэххэм яплъыгъэх, псэи чъыгхэм язытети ыгъэгушхуагъэх. ТшIошъ дгъэхъунэу тыфай мыщ щалъэгъугъэхэм яшIуагъэкIэ, экологическэ факультетыр къэзыухыщтхэм сэнахьатэу хахыщтыр къыщынэфэгъэнэу ыкIи ящыIэныгъэ щыщ хъунэу.