Программэу «Къулыкъу ыхьызэ ебгъэджэныр» зыфиIорэм апэрэ гъэхъагъэхэр къегъэлъагъох, студентмэ профессиональнэ хэхъоныгъэ ашIынымкIэ амалышIухэр къетых, общественнэ IофыгъошIухэм яIахь хашIыхьаным кIегъэгушIух.

2023-2024-рэ илъэсым финалым ихьагъэхэм ацIэхэр къыраIуагъэх. Экспертнэ советым иIофшIэн ыухыгъ, социальнэ проектхэм я VI –рэ Урысые зэнэкъокъоу «Инносоциум» зыфиIорэм хэлэжьэнэу заявкэ къэзытыгъагъэмэ яIофшIагъэмэ уасэ афашIыгъах.

Заявкэ 1104-м щыщэу проект 21-рэ къыхахыгъэр, лъэныкъо пэпчъ щырыщ.

Лъэныкъоу «ЧIыдэлъф лъэпкъмэ яхабзэхэр ыкIи якультурэ къэгъэнэжьыгъэныр» (игъусэр Фондэу Росконгрессыр ары) зыфиIорэм ифинал ихьагъ проектэу «Мобильнэ приложениеу «Адыгеим имузейхэр» зыфиIорэр. Проектым иавторыр — Мыекъопэ къэралыгъо технологическэ университетым экономикэм ыкIи гъэIорышIэным ифакультет истуденткэу Хьапэко Аннит ары, игъэсакIор — экономикэ шIэныгъэхэмкIэ докторэу, профессорэу Iэшъынэ Марин Казбек ыпхъур.

Шъугу къэдгъэкIыжьын, проектэу «Мобильнэ приложениеу «Адыгеим имузейхэр» зыфиIорэм гъогоу къыкIугъэм щытхъу пылъэу щыт: акселерационнэ программэу «ИнноВектор» МКъТУ-2022-м къыдыхэлъытагъэу зэхагъэуцуагъ, 2023-рэ илъэсым иIоныгъо мазэ къыщыублагъэу «Къулыкъу ыхьызэ ебгъэджэныр» зыфиIорэм хэтэу щагъэцакIэ финансхэмрэ кредитымрэ якафедрэ. Джы непэ ар социальнэ проектхэм я VI –рэ Урысые зэнэкъокъоу «Инносоциум» зыфиIорэм ифинал ихьагъ.

Зэнэкъокъум щытекIорэмэ сомэ 300 000 грантэу къаратыщт, ащкIэ проектэу къагъэлъэгъуагъэхэр агъэцэкIэнхэ алъэкIыщт ыкIи хъугъэ-шIэгъэшхоу Урысыем иIэщтыр — Петербургскэ дунэе экономическэ форумэу-2024-рэ зыфиIорэм хэлэжьэщтых.

Проектым икомандэ социальнэ проектхэм я VI –рэ Урысые зэнэкъокъоу «Инносоциум» зыфиIорэм ифинал зэрихьагъэм фэшI тыфэгушIо! Зэнэкъокъум текIоныгъэ къыщихьынэу тыфэлъаIо!