Мыекъопэ къэралыгъо технологическэ университетым зичэзыу гъэсэныгъэ проектэу «Тренинг-Марафоныр» щыкIуагъ, ащ ныбжьыкIэ чанмэ ялIыкIо 200-м ехъу хэлэжьагъ.

Торжественнэ зэхахьэм хэлэжьагъэх Урысые обществэу «ШIэныгъэм» икъутамэу Адыгэ Республикэм щыIэм ипащэу Галина Измайловар, «Урысые ныбжьыкIэхэм я Союз» и Адыгэ республикэ организацие итхьаматэ игуадзэу Павел Дорошенкэр ыкIи гъэсэныгъэ проектэу «Тренинг-Марафоным» ипащэу ХьакIэмызэ Заринэ.

Урысые ныбжьыкIэмэ я Союз и Адыгэ шъолъыр итренинговэ гупчэ и Ассоциацие итренерхэм къагъэнэфэгъэ гъэсэныгъэ лъэныкъохэр ары программэм хэхьагъэхэр.

ШIыкIэмэ ябэдзэр ары «Тренинг-Марафоным» анахь хъугъэ-шIэгъэ гъэшIэгъонэу хэтыгъэр. Ащ иплощадкэ къыугъоигъэхэм амал яIагъ IофыгъуакIэхэм защагъэгъозэнэу, ежьхэм шIыкIэ-Iофыгъохэу агъэфедэхэрэр къыщагъэлъэгъонхэу. Бэдзэрым къыдыхэлъытагъэу мыщ фэдэ площадкэмэ Iоф ашIагъ:

— «Мем зэхэгъэуцу» — ар чIыпIэу Iофтхьабзэм хэлажьэрэмэ коллажхэр зыщагъэпсыщтыгъэхэр, канцелярскэ пкъыгъохэр ащ фэшI къызфагъэфедагъэх.

— «Элиасэу проектым иIэр» — ар ассоциациемкIэ джэгукI. НыбжьыкIэмэ тхьапэхэр къыхахы ыкIи ащ тетхагъэхэм къарыкIхэрэр къыраIотыкIы, ащ дэжьым зэлъэпсэгъу гущыIэхэр амыгъэфедэхэу.

— «КъашъуIо «къуае» — сурэт зыщытырахырэ чIыпI, ащ Iофтхьабзэм хэлажьэрэмэ ясэнаущыгъэ щаушэтыгъ, сурэтхэр ямышIыкIэу щытырахыгъэх.

— «IэутIэкIэ угущыIэныр» — ар икъоу зэхэзымыхырэмэ зэдэгущыIэгъу шIыкIэу къыхахы. ШIоигъоныгъэ зиIэмэ зэкIэмэ ащ фэдэ шIыкIэр къызфагъэфедэн, ар зэрагъэшIэн амал яIагъ.

Проектым хэлажьэрэмэ шIэныгъэу аIэкIэлъхэр къагъэлъэгъуагъэх, ахэмкIэ зэхъожьыгъэх, ар неущрэ мафэмкIэ опытышхоу зэрэхъущтым щэч хэлъэп.