Мы мафэхэм Мыекъопэ къэралыгъо технологическэ университетым студенческэ шIэныгъэ-практическэ конференциеу «Студенческэ наукэр: ныбжьыкIэмэ яеплъыкI» зыфиIорэр щызэфашIыжьыгъ.

Тхьэмафэм къыкIоцI факультетмэ зэкIэмэ шIэныгъэ IофшIэнышхо ащыкIуагъ, студентмэ научнэ докладхэр къашIыщтыгъэх, шIэныгъэм илъэныкъо зэфэшъхьафыбэхэм ахэр афэгъэхьыгъагъэх, университетым ишIэныгъэлэжьхэм адэгущыIэнхэу амал яIагъ.

Фармацевтическэ факультетым секциеу «Фармакогностическое изучение растений» зыфиIорэм Iоф щишIагъ. Ащ ипэщагъэр фармацием икафедрэ идоцентэу Ирина Дьяковар ары. УпчIэу къаIэтыгъэхэр зыфэгъэхьыгъагъэхэр анатомо-морфологическэ ушэтынхэр, фитохимическэ анализэу къэкIрэмэ арашIылIагъэхэр, хроматографием ыкIи капиллярнэ электрофорезым иметодикэхэр ары. ЗызэхэгущыIэжьхэм ыуж анахь доклад дэгъукIэ ятIонэрэ курсым ис студентхэу Саенко А. ыкIи Двадненко А. яехэр къыхагъэщыгъэх.

Студенческэ шIэныгъэ-практическэ конференциеу «Студенческэ шIэныгъэр: ныбжьыкIэмэ яеплъыкI» зыфиIорэм къыдыхэлъытагъэу секциеу «МашIо щынэгъончъэным» зэхэсыгъо иIагъ, ащ ипэщагъэхэр доцентэу Къыздырмыщ Сулетэрэ доцентэу Елена Кучинскамрэ.

Урысые федерацием игражданскэ ухъумэн лъыплъэгъэныр, ошIэ-дэмышIэ Iофхэм цIыфхэр ащыухъумэгъэнхэм къэралыгъо уплъэкIокIо органхэр зэрэхэлажьэхэрэр ыкIи нэмыкI Iофыгъохэр зэхэсыгъом къыщаIэтыгъэх.

МэшIо щынэгъончъэным ылъэныкъокIэ къэралыгъо уплъэкIокIо-лъыплъэкIо къулыкъумэ Iоф зэрашIэрэм, ащ епхыгъэ гумэкIыгъохэм, гущыIэм пае, промышленнэ псэуалъэхэр зэрэухъумагъэхэм зэхэсыгъом хэлажьэхэрэр атегущыIагъэх. МэшIо щынэгъончъэным, ащ епхыгъэ технологиехэр еджэхэрэм ягъэшIэгъэныр, мэшIо-прикладной спортыр къызфагъэфедэзэ ахэр зэрагъасэхэрэм ягугъу ашIыгъ. Административнэ унэм ыкIи лъэныкъуабэ къызэдэзыубытрэ щэпIэ гупчэм машIор къащыкIэмынэнымкIэ ашIагъэхэр зэфахьысыжьыгъэх. Ащ фэшъхьафэу, машIор зэрагъэкIосэрэ шIыкIэм, цIыфхэр унэу машIор къызкIэнагъэм къызэрэчIащыжьырэм, а Iофыгъохэм япхыгъэ гумэкIыгъохэр дэгъэзыжьыгъэнхэмкIэ шIэгъэн фаехэр къызщыдалъытэгъэ докладым едэIугъэх. Искусственнэ акъылымрэ пилот зэрымыс къухьэлъатэмрэ зэрагъэфедэхэрэм, машIор къыкIэнэным ушъхьагъэу фэхъугъэр къызэрагъэнафэрэм афэгъэхьыгъэ докладыр зэкIэмэ ашIогъэшIэгъоныгъ. Секцием изэхэсыгъо зэфэхьысыжьэу фашIыгъэмкIэ, я 2-рэ курсым сэнэхьатэу «МэшIо щынэгъончъэныр» зыфиIорэм щыфеджэрэ К. Функ идоклад анахь дэгъоу къыхагъэщыгъ, ар мэшIогъэкIосэным апэрэ статусэу фашIырэм фэгъэхьыгъагъ.

Экологием ыкIи тыкъэзыуцухьэрэ дунаим икъэухъумэн икафедрэ зэхищэгъэ секциеу «Экологие щынэгъончъэным епхыгъэ Iофыгъо шъхьаIэхэр» зыфиIорэр гъэшIэгъонэу рекIокIыгъ, ащ изэхэщэкIуагъэхэр экологическэ факультетым идеканэу, профессорэу Галина Коноваловар ыкIи кафедрэм идоцентэу Любовь Вавиловар. Зэхэсыгъом доклад 11-мэ щядэIугъэх, ахэр студент ныбжьыкIэмэ шIэныгъэм илъэныкъо зэфэшъхьафмэ афэгъэхьыгъэу къагъэхьазырыгъагъ.

ЦIыфым иэкологие епхыгъэ гумэкIыгъохэм, кIэлэцIыкIухэмрэ ныбжьыкIэхэмрэ язекIони алъэкъо Iэпкъ-лъэпкъхэм зэряпхыгъэм, лъыр купэу зыхахьэрэр обществэм хэхъоныгъэ егъэшIыгъэным итарихъ зэрэщыщым, биологическэ лъэпкъ фэдэу цIыфым хэгъэгъозэжьынымкIэ амалэу иIэхэм, чIыдэлъфэу къэкIыхэрэр IэзэнымкIэ шIуагъэу къатыхэрэм ыкIи нэмыкI шIэныгъэ ушэтыныкIэу ашIыгъэхэр ашIогъэшIэгъонэу ныбжьыкIэмэ къаIотагъэх. Доклад къэзышIыгъэмэ зэкIэмэ къыхагъэщыгъ цIыфымрэ тыкъэзыуцухьэрэ дунаимрэ зэрэзэпхыгъэхэр, ащ елъытыгъэу обществэм, шIэныгъэм, технологиехэм хэхъоныгъэхэр зэрашIыгъэхэр. Экологическэ щынэгъончъагъэр непэрэ дунаимкIэ зэрэIофышхор джащ фэдэу къыкIагъэтхъыгъ. Теоретическэ лъапсэ зиIэ докладмэ афэшъхьафэу ныбжьыкIэмэ ашIэн алъэкIыщтхэр къыраIотыкIыгъэх. Промышленнэ производствэм тыкъэзыуцухьэрэ дунаим зэрар къызэрэфихьырэм фэшI, инновационнэ екIолIакIэхэр гъэфедэгъэн зэрэфаехэр ныбжьыкIэмэ къаIотагъ. Стартап-проектхэм Iоф зэрашIэрэр, ахэр экологием ыкIи тыкъэзыуцухьэрэ дунаим икафедрэ зэригъэцакIэхэрэм, гъэтхэ гъэлъэшыгъэ шIыкIэу «От идеи к прототипу» зыфиIорэм ыкIи акселерационнэ программэу «ИнноВектор МКъТУ» зыцIэм а Iофыгъохэр зэрэщыпхыращыхэрэм афэгъэхьыгъэ докладхэр къашIыгъэх. Непэ обществэм лъэш дэдэу ищыкIагъэ хъугъэ шIэныгъэ ушэтыныкIэхэр. Тистудентмэ къагъэлъэгъогъэ шIэныгъэхэм къаушыхьаты тинеущрэ мафэ зэрэдэгъущтыр. Хабзэ зэрэхъугъэу, секцием иIофшIэн зэфэхьысыжьэу фашIыгъэмкIэ, анахь доклад дэгъур къыхагъэщыгъ. Ащ фэдэу агъэнэфагъэр я 3-рэ курсым щеджэрэ Вероника Шафранович идокладэу «Кофейнэ пыдзафэмэ якъыдэгъэкIыжьын, ахэр Iусэу гъэфедэжьыгъэнхэр» зыфиIорэр. «Техносфернэ щынэгъончъэным» епхыгъэ сэнэхьатым ар феджэ, ипащэр кафедрэм идоцентэу Галина Гунинар ары.

МКъТУ-м истуденческэ тхьамафэ лечебнэ факультетым лъигъэкIотагъ секциеу «Медицинэм епхыгъэ Iофыгъо шъхьаIэхэр» зыфиIорэмкIэ, ипэщагъэр физиологием ыкIи паталогием икафедрэ иIэшъхьатетэу, медицинэ шIэныгъэхэмкIэ кандидатэу, доцентэу Цуамэкъо Ася.

ДокладипшIым ехъу зэхэсыгъом хэлажьэрэмэ къырахьылIагъ, ахэр уз зэфэшъхьафхэм узэряIэзэщтхэм, зэфэхьысыжьхэм афэгъэхьыгъагъэх. ГущыIэм пае, диабетическэ ретинопатиер ыкIи ар жъы хъугъэмэ япсихологическэ зытет зэрэзэрихъокIырэм, глаукомэм игъэхъужьын екIолIакIэу къыфаугупшысыгъэм, гипотиреозым, менингококковэ инфекцием ыкIи нэмыкIхэм студентхэр къатегущыIагъэх. Муковисцидозэу кIэлэцIыкIумэ къяузырэм, увеитым, Вальсальвэм иретинопатие зэрагъэхъужьхэрэм ягугъу ашIыгъ. Микробиологическэ лъэныкъомкIэ докладхэр кIэтIэим ипробиотикхэм ыкIи синбиотикхэм, лактобактериехэм ыкIи микробиоценозым афэгъэхьыгъагъэх. Цуамэкъо Асе япащэу къагъэхьазырыгъэ докладыр шхэным икъэбзагъэрэ мединститутым щеджэрэмэ япсауныгъэ изытетрэ зэрэзэпхыгъэхэм афэгъэхьыгъагъ. Научнэ пащэхэмрэ зэхэсыгъом хэлажьэхэмрэ ашIогъэшIэгъон упчIэхэр атыгъэх, темэхэмкIэ зэхэгущыIэжьхэр рагъэкIокIыгъэх.

Госпитальнэ терапием ыкIи дипломым ыуж агъотрэ гъэсэныгъэм икафедрэ исекцие зэхищэгъэ зэхэсыгъор зыфэгъэхьыгъагъэр «Дифференциальнэ диагностикэу ревматологием щашIырэр» ары.

Дифференциальнэ диагностикэм иупчIэхэр, ревматологическэ узхэр, джащ фэдэу ревматоиднэ артритыр, системнэ волчанкэ плъыжьыр, системнэ склеродермиер ыкIи подагрэр зэрагъэхъужьхэрэр, шIыкIэу къафагъотыхэрэр къаIотагъэх. Зэхэсыгъор гъэшIэгъоныгъэ, акъыл хэпхынэу бэ кIэу зигугъу къыщашIыгъэр.

Студенческэ шIэныгъэ-практическэ конференциеу «Студенческэ шIэныгъэр: ныбжьыкIэмэ яеплъыкI» зыиIорэм хэлэжьагъэмэ, докладхэр къыщызышIыгъэмэ, янаучнэ пащэмэ лъэшэу тафэраз! ТапэкIэ джыри гъэхъагъэхэр ашIынхэу тафэлъаIо!