Мыекъопэ къэралыгъо технологическэ университетым студенческэ гукъэкIмэ я Урысые зэнэкъокъоу «Аграрий» зыфиIорэм ифинальнэ едзыгъоу мэкъу-мэщым ылъэныкъокIэ проектхэр къызщагъэлъэгъуагъэхэм зэфэхьысыжьхэр фашIыгъэх.

Мы проектым изэхэщакIохэр Мыекъопэ къэралыгъо технологическэ университетымрэ Адыгэ Республикэм мэкъу-мэщымкIэ и Министерствэрэ.

Зэнэкъокъур зыфытегъэпсыхьагъэр ныбжьыкIэхэм яинновационнэ проектхэр лъагъэкIотэнхэмкIэ адеIэгъэныр ары.

Экспертнэ комиссием хэхьагъэхэр: мэкъу-мэщ технологиехэм яфакультет идеканэу Шъхьапэцэ Аслъан, мэкъу-мэщ шIэныгъэхэмкIэ кандидатэу, мэкъу-мэщ продукцием икъыдэгъэкIын технологиехэм якафедрэ идоцентэу Мария Галичевар, мэкъу-мэщ продукцием икъыдэгъэкIын технологиехэм якафедрэ ипащэу Мамсыр Нурбый, техническэ шIэныгъэхэмкIэ кандидатэу, доцентэу Едыдж Саид, техническэ шIэныгъэхэмкIэ кандидатэу, доцентэу Тхьайшъао Аминат, ландшафтнэ архитектурэм ыкIи мэз Iофым икафедрэ идоцентэу, мэкъу-мэщ шIэныгъэхэмкIэ кандидатэу Уджыхъу Марет, мэкъу-мэщ технологиехэм якафедрэ идоцентэу Юрий Чумаченкэр.

Мы илъэсым Урысыем ишъолъыри 9-мэ заявкэ 62-рэ атыгъагъ (Адыгэ Республикэр, Дагъыстан, Краснодарскэ краир, Ставропольскэ краир, Красноярскэ краир, Ростовскэ хэкур, Белгородскэ хэкур, Иркутскэ хэкур, Оренбургскэ хэкур), ащ къегъэлъагъо мэкъумэщ шIэныгъэм ыкIи индустрием мэхьанэшхо зэрэратырэр.

Зэнэкъокъум мыщ фэдэ лъэныкъохэмкIэ хэлэжьагъэх:

— Зоотехниер ыкIи ветеринариер;

— Агрономиер ыкIи агроинженериер;

— Инновационнэ лъэныкъохэу мэкъу-мэщым хэхъоныгъэхэр езыгъэшIыхэрэр;

— Мэкъу-мэщ продукциер къыдэгъэкIыжьыгъэным ыкIи щыгъэлъыгъэным технологиеу пылъыр;

— Экологическэ щынэгъончъагъэу мэкъу-мэщым иIэр

Финал едзыгъом IофшIэгъэ 28-рэ хэфэгъагъ, ахэмэ гукъэкIэу яIэхэр къащыраIотыкIыгъагъэх. Непэрэ мэкъу-мэщ хъызмэтым игумэкIыгъохэр, IофыгъуакIэу епхьылIэнхэ фаехэр, хэхъоныгъэхэр зэребгъэшIыщт шIыкIэхэр проектмэ къащатыгъэх. Мыекъопэ къэралыгъо технологическэ университетым чIахьэхэ хъумэ, ушэтынэу атыщтхэм джыри балли 10 ыкIи 8 къафыхагъэхъощт. Мэкъу-мэщым фэгъэхьыгъэ шIэныгъэ зэзыгъэгъоты зышIоигъохэмкIэ ар IофыгъошIу дэд.

Шъугу къэдгъэкIыжьын, студенческэ гукъэкIмэ я Урысые зэнэкъокъоу «Аграрий» зыфиIорэр олимпиадэмэ яспискэ ыкIи шIэныгъэ зэнэкъокъухэу ныбжьыкIэмэ ятворческэ проектхэр, яшIэныгъэхэр лъызгъэкIуатэхэрэмэ ахагъэхьагъэх.