ШIэныгъэм истуденческэ тхьамафэ Мыекъопэ къэралыгъо технологическэ университетым щылъагъэкIуатэ. Непэ факультетмэ ясекциехэр щыIагъэх.

Морфологием икафедрэ лъапсэ зыфэхъугъэ секциеу «Фундаментальнэ ыкIи практическэ упчIэхэу анатомием, гистологием ыкIи физиологием фагъэуцухэрэр» зыфиIорэр щырагъэкIокIыгъ. Секцием иIофшIэн хэлэжьагъэх лечебнэ факультетым иа 1-2-рэ курсхэм ащеджэрэ студентхэр ыкIи морфологием икафедрэ икIэлэегъаджэхэр. Теоретическэ докладхэр къашIыгъэх, джащ фэдэу шIэныгъэ-практическэ ушэтынэу ашIыгъэхэм шIэныгъэм итарихъымкIэ, анатомиемкIэ, физиологиемкIэ ыкIи гистологиемкIэ язэфэхьысыжьхэр къагъэнэфагъэх. Анахьэу анаIэ зытырадзагъэр докладхэу «Этиловэ спиртыр цIыфым ыпкъышъол къызэрегуаорэр» ыкIи «Медицинскэ институм иа 1-рэ курс щеджэрэ студентхэм яшIэжьрэ яшэнрэ зэрэзэпхыгъэхэр» арых.

Республикэ сымэджэщым иактовэ зал зэхэсыгъоу «Хирургием иупчIэ шъхьаIэхэр» зыфиIорэр щыкIуагъ, ар зэрищагъ медицинэ шIэныгъэхэмкIэ кандидатэу, профессорэу, Адыгэ Республикэм штатым хэмыт ихирург шъхьаIэу Болэкъэ Махьмудэ. Секцием иIофшIэн къыщаIэтыгъэ Iофыгъохэм ащыщых операциехэм яшIын зэрэрекIокIырэр, непэрэ уахътэм сымаджэхэм зэряIазэхэрэр, ащ пае шапхъэу къыхахыхэрэр, пэшIорыгъэшъэу къыхахырэ шапхъэхэр зыфэдэхэр.

Болэкъо Махьмудэ идокладхэр зыфэгъэхьыгъагъэхэр каротиднэ эндартерэктомиер ары. Атеросклерозэу ныбэшъо аортэм ыкIи магистральнэ лъынтфэхэм, жъэжъые узхэм, малоинвазивнэ технологиехэу урологием щагъэфедэхэрэм ыкIи нэмыкIхэм. Доклад къэзышIыгъэмэ гу узым, лъынтфэ фыкъуагъэхэм, нэмыкI узхэм зэряIазэхэрэр къаIотагъэх. Секциер гъэшIэгъонэу, бэмэ уащагъэгъуазэу гъэпсыгъагъэ, докладэу къашIыгъэмэ ащыщхэр къыхаутынхэу рахъухьагъ.

Студенческэ шIэныгъэ-конференцием къыдыхэлъытагъэу физиологием ыкIи патологием икафедрэ «Фармакология» зыфиIорэ лъэныкъомкIэ Iэнэ хъурае зэхащэгъагъ, ащ темэу иIагъэр: «Витаминхэр зэримыкъухэрэр: ар непэрэ мафэм зэрагъэтэрэзыжьрэр».

Физиологием ыкIи патологием икафедрэ идоцентэу, республикэ сымэджэщым иотдел ипащэу ЯхъулIэ Альбинэ секциер зэрищагъ. Iэнэ хъураем хэлэжьагъэхэр лечебнэ факультетым ия 3-рэ курс щеджэрэ студентхэр ары. ЗэкIэмкIи доклади 9 ащ къыщашIыгъ, ахэр мультимедийнэ лъэтегъэуцохэу гъэпсыгъагъэх, сурэтхэмкIэ, графикэхэмкIэ гъэкIэрэкIэгъагъэх. Непэрэ лъэхъаным псауныгъэм уфэсакъыным итемэ IэкIыб ашIырэп. Тэрэзэу ушхэныр, витаминнэ препаратхэр бгъэфедэнхэр Iофыгъо шъхьаIэ мэхъух, ау хэгъэгум ишъолъыр пстэуми ащыпсэухэрэм витаминхэр зэрафимыкъухэрэр нафэ, ахэм студентхэри ащыщых, ар псауныгъэм лъэшэу къегуао.

Микронутриентхэр зэримыкъухэрэм къыхэкIэу физическэ амалхэм къащэкIэ, ар клеткэмэ къащегъэжьагъэу пкъышъолым къегуао, ащ къыхэкIэу пкъым зэхъокIныгъэ зэфэшъхьафыбэ иIэ мэхъу. Докладэу къашIыгъэмэ яшIуагъэкIэ а Iофыр зэхафын алъэкIыгъ.

Iэнэ хъураем упчIэ-джэуапхэр зыфаIорэ зэхэгущыIэжь гъэшIэгъон щыкIуагъ. Анахьэу ащ хэлажьэрэмэ ашIогъэшIэгъоныгъэр темэхэу синергизмэр ыкIи антагонизмэр микронутриентхэм зэрадэхъухэрэр, сыд фэдэ уплъэкIунхэр ыкIи лабораторнэ маркерхэр ара витаминхэр зэримыкъухэрэм иушъхьагъур?

Фармацевтическэ факультетым идеканэу Артур Арутюновыр зипэщагъэ секциеу «Фармацием иупчIэ шъхьаIэхэр» зыфиIорэр рагъэкIокIыгъ. Iофыгъоу ащ зыщытегущыIагъэхэр нахьыбэрэмкIэ зыфэгъэхьыгъагъэхэр информационнэ-упчIэжь IэпыIэгъур, хэбзэIахьыр, рекламэр, уцыщэ тучанхэм программнэ амалэу яIэхэр арых. Анахь доклад дэгъоу Диана Магулян къышIыгъэр къыхагъэщыгъ. Ащ ыцIагъэр: «Уцыщэ тучаным фэгъэхьыгъэ рекламэу интернетым къыщашIырэр къазэрэхэщырэр».

Аудиториеу М-1-м факультетхэр зыхэлэжьагъэхэ Iэнэ хъурае фармакологием икIэлэегъаджэу Даур Ларисэ щызэхищагъ, ащ зэреджагъэр: «Жъыри кIэри зэголъых. Непэрэ мафэм сыдэущтэу уIэзэщт». Лечебнэ ыкIи педиатрическэ факультетхэм яя 3-рэ курс ащеджэрэ студентхэр Iэнэ хъураем хэлэжьагъэх. Лечебнэ факультетым идеканэу Беслъангъур Заремэрэ физиологием ыкIи патологием икафедрэ ипащэу Цуамэкъо Асерэ пэублэ псалъэхэр ащ къыщашIыгъэх. Зэхэсыгъом щытегущыIагъэх тапэкIэ сымаджэхэм зэряIазэщтыгъэхэ шIыкIэмрэ непэрэмрэ зэрэзэтекIыхэрэм, непэрэ медицинэм нахь диштэхэрэр бгъэфедэнхэр тэрэзэу задаштагъ. Фармакологием ылъэныкъокIэ шIэныгъэу аIэкIэлъмэ зэрахэхъуагъэр, доклад гъэшIэгъонмэ зэрядэIугъэхэр зэхэгущыIэжьым хэлэжьагъэхэм къыхагъэщыгъ.

Технологическэ факультетым искусствоведениемкIэ кандидатэу КIэдэкIое Нафсэт зипэщэгъэ секцием зэхэсыгъо щыкIуагъ, ащ ыцIагъэр: «Промышленность псынкIэм ямышIыкIэу щагъэфедэхэрэр». Секцием иIофшIэн хьэкIэ лъапIэхэр хэлэжьагъэх. Ахэр: сурэтышIэ модельерэу, АР-м культурэмкIэ изаслуженнэ IофышIэу, искусствэм ылъэныкъокIэ АР-м икъэралыгъо премие илауреатэу СтIашъу Юр, АР-м итеатральнэ объединение щагъэхьазырырэ костюмхэмкIэ художникэу Къуекъо Саид. Креативнэ индустрием тихэгъэгу хэхъоныгъэхэр зэрэщишIыхэрэр, урысыем ишъолъырыбэхэм ащ иамалхэр къазэрэщылъагъорэр, непэрэ уахътэм модэр зыфэдэр, дизайн Iофхэр ыкIи нэмыкIыбэхэр зытегущыIэгъэ упчIэхэм ахэтыгъэх.

Джащ фэдэу информационнэ ыкIи инновационнэ технологиехэр дапIэхэм зэращагъэфедэхэрэр, а лъэныкъомкIэ хэхъоныгъэу щыIэхэр къаIотагъэх. ШIэныгъэр Интенсив Университет 20.35 зыфиIорэм зэрэпхырыпщышъущтым къытегущыIагъ Бела Ранцевар, апэрэ курсым щеджэрэр, «Технологии изделий легкой промышленности» зыфиIорэр, докладыр анахь дэгъоу алъытагъ.

Экономикэмрэ гъэIорышIэнымрэ яфакультет шIэныгъэ семинарэу «ГукъэкIхэр щыIэныгъэм щыпхырыщыгъэнхэр: «КIэм тылъыхъузэ» зыфиIорэр щызэхащэгъагъ, ар зэрищагъ экономикэ шIэныгъэхэмкIэ докторэу, менеджментым ыкIи шъолъыр экономикэм икафедрэ ипрофессорэу Владимир Зарубиным. ШIэныгъэ семинарым изэхэсыгъо хэлэжьагъэх студентхэр, магистрантхэр ыкIи университетым икIэлэегъаджэхэр. Бизнесым ыкIи организациер гъэIорышIэным япхыгъэ Iофыгъохэр семинарым къыщаIэтыгъэх. Студентмэ къашIыгъэ докладмэ анаIэ ащытырадзагъ профессиональнэ IофшIэнымкIэ амалэу щыIэхэм ыкIи творчествэм хэхъоныгъэ рагъэшIынымкIэ зэшIуахынэу щытхэм.

Стоматологическэ факультетыми мы шIэныгъэм итхьамафэу рагъэкIокIырэм зыщидзыягъэп, ащи Iэнэ хъурае зэхищагъ, ащ ыцIагъэр: «Стоматологием гумэкIыгъоу къыхэкIыхэрэр, ахэр студент-стоматологым ынэхэмкIэ». Апэрэ курсым къыщегъэжьагъэу ятфэнэрэм нэс ащеджэрэ студентхэр ыкIи кIэлэегъаджэхэр ащ хэлэжьагъэх, хьакIэхэри къырагъэблэгъагъэх. Стоматологием ылъэныкъокIэ гумэкIыгъоу щыIэхэр, уз зэфэшъхьафхэм зэряIазэхэрэр, жэ кIоцIым, нэгушъом микозэу ахахьэрэм игъэхъужьын ыкIи нэмыкIыбэхэм алъыIэсыгъэх, микроскопыр зэрагъэфедэрэ шIыкIэми игугъу ашIыгъ. КариесымкIэ сымаджэ хъугъэр зэрэбэм, анахьэу Мыекъуапэ пштэмэ, электроннэ медицинэ картэм ишапхъэ зэхагъэуцомэ ишIуагъэ къызэрэкIощтыр, бэмэ атегущыIагъэх. Зэхэсыгъом изэфэхьысыжьэу анахь дэгъоу доклад къэзышIыгъэмэ дипломхэр ыкIи шIухьафтынхэр аратыгъэх.