Мыекъопэ къэралыгъо технологическэ университетым и «Точка кипение» ныбжьыкIэ проектхэу «Уигухэлъ факIу» зыфиIоу ригъэкIокIыхэрэм и Урысые зэнэкъокъу ифиналистхэр щызэIукIагъэх, яIофшIагъэхэр осэшIмэ апашъхьэ аралъхьагъэх.

ГъэсэныгъэмкIэ Урысыем и Министерствэ иинтеллектуальнэ зэнэкъокъухэм я Сатыр илъэсих хъугъэу мы проектыр хахьэ, гъэсэныгъэ-зэнэкъокъу программэу щыт, лъэныкъо пэпчъ эксперт пэрытмэ мастер-классхэр щызэхащэх.

Урысыем ишъолъыр 11-мэ якомандэ 200-м ехъумэ заявкэхэр къатыгъэх мыщ хэлэжьэнхэу, финалым командэ 62-рэ ихьагъэр. Ахэмэ ащыщых Адыгэ Республикэр, Воронежскэ, Новгородскэ, Саратовскэ, Тульскэ, Пензенскэ хэкухэр; Краснодар краир, Москва, Удмуртиер.

ОсэшIхэм ахэтыгъэх: маркетингымкIэ, сервисымкIэ ыкIи зекIонымкIэ кафедрэм идоцентэу, МКъТУ-м и «Точка кипение» ипрограммнэ пащэу Светлана Новиковар; МКъТУ-м цифровизациемкIэ ипроректорэу Дмитрий Игнатовыр; АСИ-м иметодологиеу «Сервис-дизайным» иэкспертэу Анастасия Нетребинар;  сэнэхьатхэм якъыхэхын ыкIи апшъэрэ еджапIэм чIэхьащтхэм ягъэхьазырын Гупчэ ипащэу  Олег Франко; МКъТУ-м и Студенческэ научнэ обществэ ипащэу Надежда Продиблох; «Туристическая Адыгея» зыфиIорэ организацием ипащэу Ольга Ивановар; курортэу «Красная поляна» зыфиIорэм тыкъэзыуцухьэрэ дунаир къэухъумэгъэнымкIэ ипащэу Лев Шагаровыр.

Командэмэ япроектхэр мыщ фэдэ лъэныкъохэмкIэ къагъэлъэгъуагъэх:

 «Зыпкъ ит зекIоныр»; «IT ыкIи цифрэ технологиехэр»; «Медиа».

Мы мафэм экспертхэр къин хэтыгъэх, анахь дэгъур къыхэпхыныр Iофыгъо псынкIэу щытыгъэп. Ау щытми зэнэкъокъум зэфэхьысыжьхэр фашIыгъэх, лъэныкъоу «Зыпкъ ит зекIоныр» зыфиIорэмкIэ дипломхэр зыфагъэшъошагъэхэр:

— «Фестивалэу «Адыгэ щэе ешъоным ихабзэхэр» —  I-рэ степень зиIэ дипломыр;

— «Адыгэ лъэпкъым идышъэ кIэн» — я 2-рэ степень зиIэ дипломыр;  

— «Кавказскэ биосфернэ заповедникыр» — я 3-рэ степень зиIэ дипломыр;

Лъэныкъоу «IT ыкIи цифрэ технологиехэр» зыфиIорэмкIэ дипломхэр зыфагъэшъошагъэхэр:

Илъэс 14-18-рэ зыныбжьхэр зыхэт купхэр:

— «Телеграм чат-бот «Уикъалэ ом изытет зыфэдэр» — I-рэ степень зиIэ дипломыр;

— «Веб-сайтэу «Адыгэ Республикэм ичIыпIэ шIагъохэр» зэхэгъэуцогъэныр» — я 2-рэ степень зиIэ дипломыр;

— «Flash Translator» — я 3-рэ степень зиIэ дипломыр.

Илъэс 19-25-рэ зыныбжь купхэр:

— «Многофункциональная система администрирования веб-платформы» зыфиIорэр — I-рэ степень зиIэ дипломыр;

— «Тот.сайт» — я 2-рэ степень зиIэ дипломыр;

— «Графическэ программированиер: компьютернэ графикэмрэ программированием ыбзэхэмрэ ясинтез» — я 3-рэ степень зиIэ дипломыр.

Лъэныкъоу  «Медиа» зыфиIорэмкIэ дипломхэр зыфагъэшъошагъэхэр:

Илъэс 14-18-рэ зыныбжьхэр зыхэт купхэр:

— «Тэхъутэмыкъое районыр нэмыц-фашист техакIомэ къазэрэтырахыжьыгъэр» — I-рэ степень зиIэ дипломыр;

— «Псалъэ къэзышIырэр» — я 2-рэ степень зиIэ дипломыр;

— Музееу «Псаум игеометрие» — я 2-рэ степень зиIэ дипломыр;

— «Зыми фэмыдэ мэкъу-мэщ лъэпкъхэу ыкIи мэкъу-мэщ культурэу адыгэмэ яIагъэхэр къэIэтыжьыгъэнхэр» — я 3-рэ степень зиIэ дипломыр;

— «Урокым учIэмысэу» — я 3-рэ степень зиIэ дипломыр;

— «БлэкIыгъэм зыщыдгъэгъуазэзэ, неущырэр къызэIутэхы» — я 3-рэ степень зиIэ дипломыр.

Илъэс 19-25-рэ зыныбжьхэр:

— «Студенческэ щыIакIэр МВЕК» зыфиIорэ купыр кIэпшIыкIыжьыныр» — I-рэ степень зиIэ дипломыр;

— «Фэтэрыбэу зэхэт унэм имашIо-электрощынэгъончъагъэ цифрэ- видео контентымкIэ фэсакъыгъэныр» — я 2-рэ  степень зиIэ дипломыр;

— Телеграм каналэу «Еджэрэ колледжыр» — я 2-рэ  степень зиIэ дипломыр;

— «ПкIашъэу къетэкъохыжьыгъэмэ тхьапэ ахэшIыкIыгъэныр инновационнэ шIыкIэр къызфагъэфедэзэ» — я 2-рэ  степень зиIэ дипломыр;

— «One Soul Story» —я 3-рэ  степень зиIэ дипломыр.

ТекIоныгъэ къыдэзыхыгъэмэ тафэгушIо! Джыри нахь лъэгапIэхэм анэсынхэу, ягухэлъхэр щыIэныгъэм щыпхыращынхэу тафэлъаIо!

Шъугу къэдгъэкIыжьын, текIоныгъэ къыдэзыхыгъэхэм ыкIи апэрэ чIыпIищмэ ахэфагъэхэм ЗыкI ушэтынхэм къащахьырэ баллхэм джыри 10 ыкIи 8 афыхагъэхъощт,  МКъТУ-м чIэхьанэу къыхахымэ ары.

Ащ фэшъхьафэу, текIоныгъэ къыдэзыхыгъэхэм якъэбархэр фондэу «Сэнаущыгъэр ыкIи гъэхъагъэхэр» зыфиIорэм IэкIагъэхьащтых, ащ ишIуагъэкIэ Урысые Федерацием и Президентэу Владимир Путиным грантэу къытыхэрэмэ ахэфэнхэ алъэкIыщтых.