Мыекъопэ къэралыгъо технологическэ университетым Урысые шIэныгъэ-практическэ конференциеу МКъТУ-м иаспирантхэр, докторантхэр ыкIи шIэныгъэлэжь ныбжьыкIэхэр зыхэлэжьагъэхэр щызэфашIыжьыгъ.

ЗэхэщэкIо комитетым пэщэныгъэ дызэрихьагъ шIэныгъэ IофшIэнымкIэ ыкIи инновационнэ хэхъоныгъэмкIэ проректорэу, философие шIэныгъэхэмкIэ докторэу, профессорэу Татьяна Овсянниковам.

Мэфищым къыкIоцI МКъТУ-м иаспирантурэрэ имагистратурэрэ ащеджэхэрэм ыкIи нэмыкI шIэныгъэ-гъэсэныгъэ учреждениемэ ялIыкIохэм икIыгъэ илъэсым аушэтыгъэхэмкIэ докладхэр къашIыгъэх. Зэхэсыгъом секции 9-рэ ахэмэ якъутэми 4-рэ хэтыгъэх. Ахэр университетым ишIэныгъэлэжьхэм зэращагъэх: техническэ шIэныгъэхэмкIэ докторхэу Шъхьэлэхъо Анзаур, Сихъу Хьазрэт, Хьаткъо Зурет; медицинэ шIэныгъэхэмкIэ доторхэу Артур Арутюновымрэ Елена Лялюковамрэ; мэкъу-мэщ шIэныгъэхэмкIэ докторэу Мамсыр Нурбый, экономикэ шIэныгъэхэмкIэ докторэу Iэшъынэ Марин, культурологиемкIэ докторэу Сихъу Аминэт, шIэныгъэхэмкIэ кандидатхэу Щыщэ Рит, Блэгъожъ Ася, Любовь Вавиловар.

Конференцием къыдыхэлъытагъэу мэкъу-мэщ продукцием икъыдэгъэкIын итехнологиехэм якафедрэ ипащэу, мэкъу-мэщ шIэныгъэхэмкIэ докторэу Мамсыр Нурбый пэIудзыгъэ шIыкIэм тетэу секциеу «Современные научные подходы в исследовании направлений сельскохозяйственной отрасли» зыфиIорэр зэрищагъ. Кафедрэм апшъэрэ квалификацие зиIэ шIэныгъэ сэнэхьатхэр лъэныкъуитIумкIэ щагъэхьазырых: «4.1.1. ЧIыгум ыкIи лэжьыгъэм, къэкIхэрэм адэлэжьэгъэныр» (программэм ипащэр Мамсыр Нурбый) ыкIи «4.1.2. Селекциер, семеноводствэр ыкIи къэкIхэрэм ябиотехнологие» (программэм ипащэр Ирина Бандурко).

ШIэныгъэ сэнэхьатхэм афэгъэзэгъэ кафедрэмэ яаспирантмэ ядокладхэм ядэIугъэх. Ахэр афэгъэхьыгъагъэх чIыгум узэрешIушIэщтым, тыгъэгъазэ гибридым минералхэр зэрэIэкIэбгъэхьащтхэм, натрыфым ыкIи гыныплъым уазэрэдэлэжьэщтым; хъызмэт-биологическэ уасэ къужъ лъэпкъмэ аратыгъ; агрофизическэ зэхъокIныгъэу чIыгум фэхъухэрэр тыгъэгъазэр зыщыбгъэтIысхьэрэм гъэунэфыгъэнхэу; Адыгэ Республикэм ичIыгухэм ядэгъугъэ зыфэдэр; мэкъу-мэщ техникэмрэ мэзхэмрэ зэрагъэфедэхэрэр Адыгэ Республикэм ичIыгухэм лэжьыгъэ къащагъэкIы хъумэ; морфобиологическэ зэфэмыдэныгъэу бжыхьасэ ыкIи гъэтхасэ коцмэ яIэхэр.

ШIэныгъэ-практическэ конференцием зэкIэмкIи доклад 90-рэ къыщашIыгъ, ахэр очнэ ыкIи онлайн шIыкIэхэмкIэ кIуагъэх, шIэныгъэ темэ зэфэшъхьафыбэхэм афэгъэхьыгъагъэх. Конференцием изэфэхьысыжьэу статьяхэр къыздэхьащт тхылъ къыдагъэкIыщт, ащ университетым итхылъеджапIэ нэIуасэ ущыфэхъун плъэкIыщт.