Федеральнэ программэу «Профессионалитет» зыфиIорэм къыдыхэлъытагъэу Мыекъопэ къэралыгъо технологическэ университетым хэхьэрэ Политехническэ колледжым хъугъэ-шIэгъэшхоу «ЗыкIныгъэ пчъэ зэIухыгъэмэ ямафэ» щыкIуагъ.

Iофтхьабзэм ишIуагъэкIэ абитуриентхэмрэ ны-тыхэмрэ Урысые Федерацием иэкономикэ зэпхыгъэ ыкIи зыщыкIэхэрэ рабочэ сэнэхьатхэм нэIуасэ фашIыгъэх.

Колледжым иактовэ зал ары Iофтхьабзэр къызыщызэIуахыгъэр. Ащ хэлэжьагъэх гъэсэныгъэмрэ шIэныгъэмрэкIэ АР-м и Министрэ игуадзэу Артем Журавель, шIэныгъэм, профессиональнэ гъэсэныгъэм ыкIи дунэе зэдэлэжьэныгъэм иотдел ипащэу Емзэщ Марин, къалэм имедицинэ учреждениехэм ялIыкIохэр ыкIи IофшIэпIэ чIыпIэ къэзытыхэрэр. Колледжым щеджэхэрэм шIэныгъэу аратырэр, сэнэхьатэу щагъотыхэрэр зыфэдэхэр Адыгэ Республикэм ит еджапIэхэм ащеджэхэрэмэ къафаIотагъ.

Iофтхьабзэр къызызэIуахым ыуж, ны-тымэ афэгъэхьыгъэ зэхахьэр рагъэкIокIыгъ. Сэнэхьатэу хэпхын плъэкIыщтхэр къизыIотыкIырэ площадкэхэу агъэхьазырыгъэхэр хьакIэхэм арагъэлъэгъугъ. МКъТУ-м и Политехническэ колледж еджэн процессыр зэрэщыкIорэр къафаIотагъ. ШIоигъоныгъэ зиIэмэ медикэу улэжьэныр зыфэдэр ежь ашъхьэкIэ аушэтын алъэкIыгъ.

Федеральнэ программэу «Профессионалитет» зыфиIорэм къыдыхэлъытагъэу зэхащэгъэ «ЗыкIныгъэ пчъэ зэIухыгъэмэ ямафэ» Урысые класснэ сыхьатэу «Профессионалитет: компание дэгъу о къыхэпхыгъ!» зыфиIорэр рагъэкIокIыгъ.

Федеральнэ программэм ишапхъэхэмкIэ егъэджэнхэр зэрэзэхащэхэрэ шIыкIэр, къычIахьэрэмэ янеущрэ мафэр зыфэдэ хъун ылъэкIыщтыр, колледжымрэ организациехэм япащэхэмрэ зэрэзэдэлажьэхэрэр зещакIомэ къаIотагъэх. Джащ фэдэу проектым фэгъэхьыгъэ промо-ролик къагъэлъэгъуагъ.

Абитуриентхэр мастер-классхэу гъэшIэгъонэу зэхащагъэхэм ахагъэлэжьагъэх, ахэр опытышхо зиIэ кIэлэегъаджэхэм зэращагъэх. Медицинэ практикэм лъэныкъо зэфэшъхьафэу иIэхэм анэсыгъэх, апэрэ медицинэ IэпыIэгъу цIыфым зэребгъэкIыщтым ыкIи нэмыкIхэм ащагъэгъозагъэх.

Мыекъопэ къэралыгъо технологическэ университетым хэхьэрэ Политехническэ колледжым «ЗыкIныгъэ пчъэ зэIухыгъэмэ ямафэу» щыкIуагъэр къэбар Iотэным фэгъэхьыгъэ къодыеу щытыгъэп. Ащ ишIуагъэкIэ Iофтхьабзэм хэлажьэрэмэ гукъыдэчъыкIэхэр яIэхэ хъугъэ, сэнэхьатхэр зыфэдэхэм защагъэгъозагъ, ахэмэ афэгъэхьыгъэ шIэныгъэхэр агъотыгъэх.