Практическэ ухьазырныгъэм къыдыхэлъытагъэу Мыекъопэ къэралыгъо технологическэ университетым икIэлэегъаджэхэмрэ истудентхэмрэ Н.И. Ткачевым ыцIэ зыхьырэ фирмэу «Агрокомплексым» щыIагъэх. ЗекIоным изэхэщакIор — мэкъу-мэщ продукцием икъыдэгъэкIын технологиехэм якафедрэ ипащэу Мамсыр Нурбый ары.

Мэкъу-мэщ производствэмкIэ генеральнэ пащэм игуадзэу Александр Квашиным фирмэу «Агрокомплексым» итарихъ, гъогоу къыкIугъэр, хэхъоныгъу непэрэ мафэм ышIыхэрэр экскурсием хэлажьэрэмэ къафиIотагъ.

Iоф щызышIэхэрэмкIэ генеральнэ пащэм игуадзэу Марина Ирхинам къэкIыхэрэр хъызмэтшIапIэм къызэрэщыдагъэкIыжьрэ шIыкIэр, ащ епхыгъэ IофшIэнхэр зэрэщызэхэщагъэхэр къыIотагъэх. Студентмэ практикэу мыщ щахьыхэрэр зыфэдэхэр, IофшIэпIэ чIыпIэу щагъотын алъэкIыщтхэр джащ фэдэу ащ къыIуагъэх.

РастениеводствэмкIэ пащэу Савва Шевель ыкIи информационнэ технологиехэмкIэ пащэм игуадзэу Александр Инякиным хьакIэхэм слайд-лекцие къафеджагъэх, ар темэу «Цифровые решения в растениеводстве» зыфиIорэм фэгъэхьыгъагъ.

Ащ ыуж «Пшызэ икъуаехэр зыфиIорэ заводым щыIагъэх», ащ ипащэу Юлия Харевич къуаем иихынкIэ апшъэрэ непэрэ технологиехэу агъэфедэхэрэм ягугъу къышIыгъ. ХъызмэтшIапIэм щырахырэ къое лъэпкъ зэфэшъхьафхэм ахэIагъэх, язытет ауплъэкIугъ.

Отделениеу №3-м, ар хъызмэтшIапIэу «И.П. Ревко ыцIэ зыхьырэм» ий, шъофымрэ лэжьыгъэр зыщыраутыгъэмрэ къаплъыхьагъэх.

Мыщ хъызмэтшIапIэм ипащэу Александр Старушкэм, агроном шъхьаIэм игуадзэу Роман Андрусенкэм студентхэмрэ кIэлэегъаджэхэмрэ нэIуасэ фишIыгъэх шIэныгъэ ушэтынхэу шъофым щашIыгъэхэм, ахэр производствэм зэрэщагъэфедэхэрэм.

Щэджэгъоужым хъызмэтшIапIэу «Рассвет» зыцIэм игъэщ комплексэу станицэу Новомалороссийскэм дэтым къэкIуагъэх, ащ ипащэу Константин Быкановым IофшIэныр зэрэзэхэщагъэм щигъэгъозагъэх, былымхэр зэраIыгъхьэм, зы чэмышъхьэм телъытагъэу щэ литрэ мини 10-м ехъу илъэсым къыкIоцI къызэратырэр къыIотагъэх.

Студентмэ лъэшэу ашIогъэшIэгъонэу дэкIыгъо мафэр Н.И. Ткачевым ыцIэ зыхьырэ фирмэу «Агрокомплексым» щагъэкIуагъ, упчIабэ специалистхэм аратыгъ ыкIи джэуап дэгъухэр агъотыгъэх.

ХъызмэтшIапIэм ипащэ ыкIи иIофшIэкIо куп тафэразэу тхьаегъэпсэу ятэIо, дэгъу дэдэу Iофтхьабзэр тфызэхащагъ, экскурсиер гъэшIэгъон хъугъэ.