Мыекъопэ къэралыгъо технологическэ университетым «НыбжьыкIэ профессионалхэр» зыфиIорэ я VIII – рэ зэIухыгъэ чемпионатэу апшъэрэ еджапIэхэр зэхэлажьэхэу щыкIуагъэр кIэм фэкIуагъ, ар сэнэхьатхэм хэхъоныгъэхэр ягъэшIыгъэнхэм и Агентствэ ишапхъэхэмкIэ зэхащэгъагъ.

Торжественнэу зэнэкъокъур зыщызэфашIыжьрэ зэхахьэм профессионалхэр ыкIи кIэлэегъаджэхэр къыщыгущыIагъэх: МКъТУ-м Чемпионатэу «НыбжьыкIэ профессионалхэр» зыфиIорэм икоординаторэу, экономикэ шIэныгъэхэмкIэ кандидатэу, маркетингымкIэ, сервисымкIэ ыкIи зекIонымкIэ кафедрэм идоцентэу Хьанэхъукъо Зарем; мэкъу-мэщ шIэныгъэхэмкIэ кандидатэу, мэкъу-мэщ продукцием икъыдэгъэкIын технологиехэмкIэ кафедрэм идоцентэу Мария Галичевар; экономикэ шIэныгъэхэмкIэ кандидатэу, чIыгу гъэпсынымкIэ кафедрэм идоцентэу Ирина Селивановар.

ШIухьафтын гъэцэкIэнэу чемпионатым хагъэхьагъэр анахьэу гъэшIэгъоныгъэ, ар 3 модулэу «Флористикэр» — «Шъхьэр зэрагъэкIэракIэрэр ыкIи къэгъэгъэблэрым итемэ а шапхъэр зэрэщагъэфедэрэр».

Ар зэнэкъокъур рагъэжьэнкIэ такъикъ 15 къэнэжьыгъагъ къызаIопщым. АгъэцэкIэным фэшI инфраструктурнэ тхьапэм фэшъхьафэу зэнэкъокъум хэлажьэрэмэ джыри материалхэр аратыгъагъэх. А зы гъэцэкIэныр зэкIэхэми зэдаратыгъагъэми, нэбгыритфымэ къашIыгъэхэр зэтекIыщтыгъэх, зышIыгъэмэ яIэкIоцI дунае, ягушъхьэ байныгъэ къырагъэлъэгъукIыгъ.

«Предпринимательствэр» зыфиIорэ лъэныкъомкIэ зэнэкъокъум хэлажьэрэмэ модулитIумкIэ «Техникэ-экономическэ лъапсэу проектым иIэр» ыкIи «Фирмэм (проектым) лъэтегъэуцо фэшIыгъэныр ыкIи лъыгъэкIотэгъэныр» зыфиIохэрэмкIэ яамалхэр къагъэлъэгъуагъэх. ОсэшIмэ анахьэу анаIэ зытырадзагъэр мылъкоу проектмэ къаращэлIагъэр, бюджетэу зэхагъэуцуагъэм ихъарджрэ ифедэрэ, предпринимательствэр IэпыIэгъу къазэрэфэхъугъэр арых.

Аужырэ зэнэкъокъу мафэр «ЗекIо» зыфиIорэм фэгъэхьыгъагъ, ащ игъэцэкIэн къыдилъытэщтыгъэ Адыгэ Республикэм изекIо IофшIэн зэрэгъэнэфэгъэщтыр. Туристхэр нахьыбэу поселкэу Каменномостскэм къещэлIэгъэнхэр, экстремальнэ туризмэ лъэпкъхэм хэхъоныгъэхэр ягъэшIыгъэнхэр, предложениехэр а лъэныкъохэмкIэ къэхьыгъэнхэр ащ игъэцэкIэн хэтыгъэх.

Лъэныкъоу «БизнесымкIэ программнэ зэшIокIэу щыIэхэр» зыфиIорэмкIэ десктопнэ ыкIи мобильнэ приложениехэр чемпионатыр рагъэкIокIыным пае зэхагъэуцонэу щытыгъ, информационнэ системэм уплъэкIунхэр рашIылIагъэх, проектым лъэтегъэуцо фашIыгъ, осэшIмэ апашъхьэ къыралъхьагъ. Зэнэкъокъум хэлажьэрэмэ информационнэ системэм хахьэрэ платформэмэ апае, гущыIэм фэшI Windows ыкIи Android зыфиIохэрэмкIэ опыт яIэ хъугъэ.

Лъэныкъоу «Урбанистикэр ыкIи къэлэ псэолъэшIыныр» зыфиIорэмкIэ зэнэкъокъурэмэ кварталхэр зэтыраутыгъэх, къэлэгъэпсынымкIэ архитектурнэ шIыкIэхэр къагъотыгъэх, объектхэр зыфэдэщтхэр къатхыхьагъэх, къагъэлъэгъуагъэх. IофшIэным изэфэхьысыжьэу доклад къагъэхьазырыгъ, проектмэ зэкIэмэ игъэкIотыгъэ лъэтегъэуцо афашIыгъ.

Зэнэкъокъум къыдыхэлъытагъэу лъэныкъоу «Финансхэр» зыфиIорэмкIэ мыщ хэлажьэрэмэ профессиональнэ кейс къаратыгъ, ащ хъызмэтшIапIэу «Пивоваренный завод Майкопский» зыфиIорэм ибухгалтерскэ ыкIи финансовэ отчет игъусагъ.

Лъэныкъоу «Рестораннэ сервисыр» гъэцэкIэгъэным пае модулэу В-р «Барым ыкIи кофейнем, мэкIаем ыкIыб Iоф щыпшIэныр» зыфиIорэр ыкIи Г-р «Шъонхэу чIахыхэрэр» зыцIэр зэхафын фэягъэ. Экспертмэ мыщ фэдэ лъэныкъохэмкIэ уасэ къафашIыгъ:

1. Кофейнэ картэмкIэ хьакIэмэ уапэгъокIыныр ыкIи яфэIо-фашIэхэр афэбгъэцэкIэныр. Зэнэкъокъум хэлажьэрэмэ шъон зэфэшъхьафи 4 хьакIитIумэ, 2 классическэ шъонхэм къахэхыгъэу ыкIи 1 авторскэ шъон апагъохын фэягъэ. Ахэр ежь-ежьырэу агъэхьазырынэу ыкIи аратынэу щытыгъ.

2. Барнэ картэмкIэ хьакIэмэ уапэгъокIыныр ыкIи яфэIо-фашIэхэр афэбгъэцэкIэныр. Зэнэкъокъум хэлажьэрэмэ шъон зэфэшъхьафи 4 хьакIитIумэ апагъохынэу щытыгъ. Нэбгрэ пэпчъ ратырэр зыфэдизыр ыкIи уахътэу тырагъэкIуадэрэр лъытэгъагъэ.

Лъэныкъоу «Тыкъэзыуцухьэрэ дунаим икъэухъумэн» зыфиIорэ зэнэкъокъум хэлажьэрэмэ макъэхэр ауплъэкIугъэх, ащ пае мэкъэушэтын прибор аIыгъыгъ, рабочэ журналым зэфэхьысыжьэу фэхъугъэхэр датхагъэх. ЯтIонэрэ IофшIэным къыдилъытэщтыгъэ зэрар Iоф зышIэрэмэ къафэзыхьыхэрэр нахь макIэ шIыгъэнхэр, псэуалъэр макъэр нахь макIэ зышIыхэрэмкIэ къэухъумагъэмэ ауплъэкIугъ, пхъэшI хъызмэтшIапIэмэ а лъэныкъомкIэ ыкIи санитарнэ-къэбзэныгъэ шапхъэхэр зэращагъэцакIэхэрэр щауплъэкIугъэх.

Лъэныкъоу «Тыкъэзыуцухьэрэ дунаим икъэухъумэн» зыфиIорэм игъэцэкIэн Iофыгъо шъхьаIэу хэтыгъ нормативнэ, справочнэ документациер шапхъэхэм адиштэныр ыкIи информационнэ-фитныгъэ порталэу компаниеу «ГАРАНТ» зыфиIорэм зэнэкъокъум хэтхэр рылэжьэнхэу.

ЗэкIэ текIоныгъэ къыдэзыхыгъэмэ тыгу къыддеIэу тафэгушIо ыкIи тапэкIэ профессиональнэ гъэхъагъэхэр джыри бэрэ ашIынхэу тафэлъаIо!