Сэнэхьат къыхэхыным фэгъэхьыгъэ Iофтхьабзэу Мыекъопэ къэралыгъо технологическэ университетым зэхищагъэм еджапIэхэм ыкIи колледжхэм къычIатIупщыщтхэ нэбгрэ 200-м ехъу хэлэжьагъ.

Университетым иплощадкэ къыщаIотагъ егъэджэнымкIэ нахь къыхахыхэрэр, учIэхьаным Iофыгъоу пылъхэр ыкIи IофшIэн зэгъэгъотыгъэнымкIэ амалэу щыIэхэр. Анахьэу хьакIэмэ ашIогъэшIэгъоныгъэр Дзэ егъэджэн гупчэу Мыекъопэ къэралыгъо технологическэ университетым къыщызэIуахыгъэр ары. Дзэ егъэджэн гупчэм амал студентмэ къаритыщт еджэхэзэ дзэ учетнэ сэнэхьат зэрагъэгъотынэу, ащ пае тхьэмафэм зы «дзэ мафэ» къафыхагъэкIызэ ашIыщт. Апэрэ купыр мыгъэ чIахьэрэмэ къахахыщт, Iоныгъом и 1-м аугъоищт. Дзэ егъэджэн гупчэм иIофышIэмэ нахь игъэкIотыгъэу ащ пылъ Iофыгъохэр къаIотагъэх.

Iофтхьабзэм къекIолIагъэхэм лабораториехэр зэрагъэлъэгъугъэх, факультетмэ зэкIэмэ нэIуасэ зафашIыгъ, кIэлэегъаджэмэ адэгущыIагъэх, упчIэхэр аратыгъэх ыкIи джэуапхэр агъотыгъэх.

Университетым амалэу къытырэмэ къатегущыIагъ егъэджэнымкIэ проректорэу Людмила Задорожнаяр.

— Лъэшэу тынаIэ зытедгъэтрэр студентмэ яIэпэIэсэныгъэ ихэхъоныгъ ары. МКъТУ-р федеральнэ проектмэ чанэу ахэлажьэ, университетым иинновационнэ екIолIакIэхэм сэнэхьат зэфэшъхьафыбэ къыдалъытэ. Гъэсэныгъэ процессым иIофыгъо шъхьаIэхэр апшъэрэ еджапIэм академие ыкIи инновационнэ екIолIакIэу иIэхэр ары, джащ фэдэу тыкъэзыуцухьэрэ дунаеу ренэу зэхъокIырэм псынкIэу зыхэбгъэгъозэшъуныр, — къыIотагъ Людмила Задорожнаям.

Университетым ипроект заулэмэ лъэтегъэуцоу афашIыгъэхэри хьакIэмэ ашIогъэшIэгъоныгъ. Ахэмэ ащыщ проектнэ практикумыр, ар студентхэмкIэ амалышIоу щыт, ахэм яIэпэIэсэныгъэ хагъэхъонымкIи, социальнэ гумэкIыгъохэр дагъэзыжьынхэмкIи. Ар акселератор — студентмэ аушэтыгъэхэр экономикэу непэрэ мафэм агъэфедэрэм хагъэхьан алъэкIы.

УнаIэ теудзэн плъэкIыщт проектэу «Диплом как стартап» зыфиIорэм, аужырэ илъэситIур пштэмэ, апшъэрэ еджапIэм осэшхо ащкIэ къыфашIыгъ — къычIитIупщыгъэ нэбгри 10-м ехъу миллионер хъугъэх. Федеральнэ проектэу «Платформа университетского технологического предпринимательства» зыфиIорэмкIэ студентмэ ябизнес рагъэжьэнэу сомэ миллион къаратын ылъэкIыщт.

Приемнэ комиссием пшъэдэкIыжь зыхьырэ исекретарэу Бэрзэдж Розэ сэнэхьатэу университетым зыщыфагъэхьазырхэрэр къыIотагъэх, бюджетнэ чIыпIэ пчъагъэу щыIэр, стипендиеу аратыхэрэм, платформэу «Урысыем IофшIэн щыбгъотыныр» зыцIэм Iоф зэришIэрэ шIыкIэр къыIуагъэх.

«Урысыем IофшIэн щыбгъотыныр», ар федеральнэ къэралыгъо информационнэ системэу щыт, IофшIэн ягъэгъотыгъэнымкIэ Федеральнэ къулыкъум ипроект. Порталым ишIуагъэкIэ IофшIэпIэ чIыпIэхэр къагъоты, IофшIэн язытырэмэ IофшIакIохэр къыхахышъух. ЗэкIэ фэIо-фашIэхэр ыпкIэ хэмылъэу агъэцакIэх. 2024-рэ илъэсым къыщыублагъэу «Урысыем IофшIэн щыбгъотыныр» зыфиIорэ платформэмкIэ занкIэ егъэджэнхэр зэхащэх.

Мыекъопэ къэралыгъо технологическэ университетым чIахьэ зышIоигъохэм документхэр мэзаем и 1-м къыщегъэжьагъэу атых. Непэрэ мафэм ехъулIэу заявление 100-м ехъу атыгъах, ахэр гъэсэныгъэ программэхэу бакалавриатым, специалитетым ыкIи магистратурэм ателъытагъэх.

Iоныгъом и 20-м къыщегъэжьагъэу онлайн шIыкIэмкIэ заявлениехэр атышъущтых, ащ пае абитуриентыр апшъэрэ еджапIэм исайт ихьани, унэе кабинетым щитын фай. Къэралыгъо фэIо-фашIэхэр (госуслуги) агъэфедэнхэу приемнэ комиссиер абитуриентхэм къяджэ, заявкэхэм, документхэм ятын къащегъэжьагъэу чIахьэхэфэ нэс ар агъэфедэн алъэкIыщт.

— МКъТУ-м ипчъэ зэIухыгъэхэм я Мафэ IэпэIэсэныгъэ зыхэлъмэ ядунай ухещэ. Профессиональнэ зэмылIэужыгъоныгъэу тиIэр ныбжьыкIэмэ ятэгъэлъэгъу, ягухэлъхэр къадэхъунхэм тыфэIорышIэ, ар пшъэрылъэу зыфэдгъэуцужьыгъ, — къыхигъэщыгъ сэнэхьатыр къыхэхыгъэнымкIэ ыкIи апшъэрэ еджапIэм зыфэгъэхьазырыгъэнымкIэ Гупчэм ипащэу Олег Франко.