Непэ Мыекъопэ къэралыгъо технологическэ университетым торжественнэу къыщызэIуахыгъ я VIII-рэ ЗэIухыгъэ апшъэрэ гъэсэныгъэ чемпионатэу «НыбжьыкIэ профессионалхэр» зыфиIорэр, ар шапхъэу сэнэхьатхэм хэхъоныгъэ ягъэшIыгъэным фэIорышIэрэ Агентствэм ыгъэнэфагъэмкIэ рагъэкIокIыгъ.

IэпэIэсэныгъэмкIэ чемпионатыр — ар ныбжьыкIэ профессионалхэу неущрэ мафэм факIохэрэм язэнэкъокъу, хэхъоныгъэ ашIынымкIэ, ыпэкIэ лъыкIотэнхэмкIэ шIэныгъакIэхэмрэ шIыкIакIэхэмрэ къязытырэ Iофтхьабз.

Чемпионатым лъэныкъуи 7 къызэлъеубыты. Апэрэу мы илъэсым «Урбанисткэр ыкIи къэлэ псэолъэшIыныр» зыфиIорэмкIэ зэнэкъокъущтых. «Профессионал ныбжьыкIэхэр» зыфиIорэм изэхэщакIор Мыекъопэ къэралыгъо технологическэ университетыр ары. Координатор шъхьаIэр — маркетингым, сервисым ыкIи зекIоным икафедрэ идоцентэу Хьанэхъукъо Зарем.

Гъэ къэс «НыбжьыкIэ профессионалхэр» зыфиIорэм иапэрэ едзыгъоу апшъэрэ еджапIэм щырагъэкIокIырэм текIоныгъэ къыщыдэзыхыхэрэр апшъэрэ еджапIэхэм азыфагу щызэхащэрэ зэнэкъокъум и Финал ехьэх, ар Москва зыщыкIорэр. ТIогъогогъо тистудентмэ апэрэ чIыпIэхэр къыдахыгъэх ыкIи Лъэпкъ сборнэм къырагъэблэгъагъэх.

ШIуфэс псалъэ къышIызэ, Хьанэхъукъо Заремэ къыхигъэщыгъ мы чемпионатым хэлажьэхэрэм ар лъэубэкъушIу зэрафэхъущтыр, ахэмэ профессиональнэ шIыкIэхэм хэхъоныгъэ арагъэшIынымкIэ ишIуагъэ къызэрякIыщтыр. Джащ фэдэу, экологическэ факультетым идеканэу, биологие шIэныгъэхэмкIэ докторэу, экологием ыкIи тыкъэзыуцухьэрэ дунаим икафедрэ ипрофессорэу Галина Коноваловар, экономикэм ыкIи гъэIорышIэным ифакультет идеканэу Ешыгоо Светланэ зэнэкъокъум хэлажьэрэмэ гъэхъагъэхэр ашIынхэу къафэлъэIуагъэх.

ЗэкIэхэми я VIII-рэ ЗэIухыгъэ апшъэрэ гъэсэныгъэмкIэ чемпионатэу «НыбжьыкIэ профессионалхэр» зыфиIорэр къызэрэзэIуахыгъэмкIэ тафэгушIо! Ащ гъэхъагъэхэр щашIынхэу ыкIи анахь лъэшыр щытекIонэу тафэлъаIо!