Мы мафэхэм МКъТУ-м мэкъу-мэщымкIэ и ШIэныгъэ-ушэтэкIо институт Iэнэ хъураеу «Къэралыгъо селекцием хэхъоныгъэхэр егъэшIыгъэнхэр, семеневодствэ системэр гъэкIэжьыгъэныр, Урысыем ищынэгъончъагъэ фытегъэпсыхьэгъэ къэралыгъо амалхэр гъэфедэгъэнхэр» зыфиIорэр щыкIуагъ.

Iэнэ хъураем иIофшIэн нахьыбэрэмкIэ зыфэгъэхьыгъагъэр непэрэ мафэм мэкъу-мэщ технологиеу щыIэхэр селекцием, семеневодствэм зэрэщыбгъэфедэщтхэр, материалхэр къызэрэзэтебгъэнэщтхэр ыкIи къызэрэухъумэщтхэр, апэрэ семеневодствэм упылъыныр, апшъэрэ репродукцие къэзытыхэрэр къызэрэдэбгъэкIыщтхэр, семеневодствэм биологическэ лъапсэу иIэр, а лъэныкъомкIэ хэбзэгъэуцугъэу щыIэр, мэкъу-мэщ культурэмэ зэрафэсакъыхэрэр ыкIи нэмыкIхэр.

МКъТУ-м мэкъу-мэщымкIэ и ШIэныгъэ-ушэтэкIо институт ипащэу Хьаткъо Казбек ары Iофтхьабзэр зезыщагъэр.

Зэхэсыгъом хэлажьэрэмэ шIуфэс къарихыгъ шIэныгъэ IофшIэнымкIэ ыкIи инновационнэ хэхъоныгъэмкIэ МКъТУ-м ипроректорэу Татьяна Овсянниковам.

Ащ игущыIэхэм къащыхигъэщыгъ институтым пшъэрылъэу ыпашъхьэ илъхэр, мэкъу-мэщ секторыр нахьышIу шIыгъэнымкIэ Iофтхьабзэу зэрахьан фаехэр, гъомлапхъэ щынэгъончъэным, шъолъырым ыкIи хэгъэгум яэкономикэ язытет.

Программэм къыдыхэлъытагъэу мыщ фэдэ докладхэр къашIыгъэх:

— «Адыгэмэ ямэкъу-мэщ культурэу зыми фэмыдагъэм зыкъегъэIэтыжьыгъэныр», ар къэзышIыгъэр МКъТУ-м мэкъу-мэщ гъомлапхъэр къыдэгъэкIыгъэным итехнологие икафедрэ идоцентэу Мария Галичевар ары;

— «Гъомлэпхъэ щынэгъончъэным дэлэжьэгъэнымкIэ МКъТУ-м имэкъу-мэщ ШIэныгъэ-ушэтэкIо институтым амалэу IэкIэлъхэр» — къэзышIыгъэр институтым ипащэу Хьаткъо Казбек;

— «Урысые Федерацием игъомлэпхъэ щынэгъончъэнымкIэ селекцием чIыпIэу ыубытрэр. КIымафэр изыхырэ зэнтхъыр — селекционнэ IофшIэным ипшъэрылъхэр» — МКъТУ-м мэкъу-мэщымкIэ и ШIэныгъэ-ушэтэкIо институт иотдел ипащэ ипшъэрылъхэр зыгъэцэкIэрэ Марина Кузенкэр;

— «Гъомлэпхъэ щынэгъончъэным коцым икультурэ чIыпIэу щиубытрэр» — МКъТУ-м мэкъу-мэщымкIэ и ШIэныгъэ-ушэтэкIо институт ишIэныгъэлэжь IофшIакIоу Анастасия Хлебниковар.

Iэнэ хъураем къыщашIыгъэ докладмэ зэкIэмэ мэхьанэшхо зэряIэр кIэухым къыхагъэщыгъ, тематикэу къыхахыгъэм осэшхо фашIыгъ, зэхэгущыIэжьыр игъоу зэрэщытыр къаIуагъ.