Инновациехэм адэлажьэрэ Фондэу «УМНИК» зыфиIорэм 2023-рэ илъэсым зэнэкъокъоу ригъэкIокIыгъэм щытекIуагъэхэр къаIопщыгъэх. Нэбгрэ 250-у текIоныгъэ къыдэзыхыгъэмэ Мыекъопэ къэралыгъо технологическэ университетым щеджэрэ нэбгритIу ахэфагъэх — Диана Бужкорэ Кудайнет Саидэрэ.

Диана Бужко зэнэкъокъум къуаеу «МАТЭ» зыфиIорэмрэ хьаджыгъэу Расторопши зыцIэмрэ ыгъэфедэхэзэ тортым ирецептурэрэ итехнологиерэ щызэхигъэуцуагъэх. Ащ пащэу иIагъэр стандартизацием, метрологием ыкIи товарнэ экспертизэм якафедрэ идоцентэу, техническэ шIэныгъэхэмкIэ кандидатэу Тхьайшъао Аминат. Кудайнет Саидэ къуаехэу бэрэ щылъхэрэм апае пектин зыхэлъ кIышъом икъэухъумэн фэгъэхьыгъэр зэхигъэуцуагъ. Ащ шIэныгъэ пащэу иIагъэр гъомлапхъэхэмкIэ ыкIи шхыныгъохэр гъэхьазырыгъэнхэмкIэ кафедрэм ипащэу, техническэ шIэныгъэхэмкIэ докторэу, профессорэу Хьаткъо Зурет ары.

Мы мафэ благъэхэм ахэмэ зэзэгъыныгъэхэр инновациехэм адэлажьэрэ Фондым дашIыщт ыкIи грантхэу сомэ мин 500 зырыз къаратыщт. А ахъщэмкIэ зы илъэсым къыкIоцI шIэныгъэ-ушэтын IофшIэнхэр инновационнэ проектхэм къадыхэлъытагъэу рагъэкIокIын фэещт. Ащ фэшъхьафэу пшъашъэмэ егъэджэнхэр преакселерационнэ программэмкIэ акIунэу щыт, интеллектуальнэ IофшIэныр агъэцэкIэнэу фитныгъэ яIэным фэшI заявкэр атын фае ыкIи бизнес-планрэ инновационнэ проектым игъогу картэрэ зэхагъэуцощт.

«УМНИК» зыфиIорэ программэр — ар грантовэ IэпыIэгъу Фондэу хъызмэтшIэпIэ цIыкIухэу шIэныгъэ-техническэ лъэныкъом фэгъэзагъэхэм апае агъэлажьэ. ШIэныгъэлэжь ныбжьыкIэхэу инновационнэ IофшIэнымкIэ зисэнаущыгъэ зыушэты зышIоигъохэм ыкIи шIэныгъэ-техническэ, инновационнэ Iофтхьабзэхэм ахэлажьэхэрэм IэпыIэгъу афэхъугъэныр ары мыщ ипшъэрылъыр. Джащ фэдэу хъызмэтшIэпIэ цIыкIухэр къызэIухыгъэнхэр, шIэныгъэ проектхэр коммерцием щыгъэфедэгъэнхэр ащ къыделъытэх.

Адыгэ шъолъырыр пштэмэ, мы зэнэкъокъум фэгъэзагъэр экономикэ хэхъоныгъэмкIэ ыкIи сатыумкIэ Министерствэр ары. МКъТУ-р Фондым илIыкIоу щыт, ар щылэ мазэм и 23-м 2023-рэ илъэсым къызэIуахыгъ, лъапсэу фэхъугъэр зэдэлэжьэгъэнымкIэ зэзэгъыныгъэу АР-м иминистрэхэм я Кабинет, ащ ыцIэкIэ Адыгэ Республикэм и ЛIышъхьэу КъумпIыл Муратрэ ыкIи хъызмэт цIыкIухэм хэхъоныгъэ ягъэшIыгъэным ыкIи шIэныгъэ-техническэ лъэныкъом афэгъэзэгъэ къэралыгъо Фондымрэ зэдашIыгъэр ары.

Дианэрэ Саидэрэ текIоныгъэ къызэрэдахыгъэмкIэ тафэгушIо! ТапэкIи инновационнэ IофхэмкIэ ыкIи нэфэшъхьаф гукъэкIэу яIэхэмкIэ ягухэлъхэр къадэхъунхэу тафэлъаIо!