Мыекъопэ къэралыгъо технологическэ университетым икомандэ Урысые студенческэ фармацевтическэ олимпиадэу «ФармУмник» зыфиIорэм ящэнэрэ чIыпIэр къыщыдихыгъ.

Студентмэ фармацевтическэ лъэныкъор нахь куоу зэрагъэшIэным, яIэпэIэсэныгъэ зынэсрэр, яухьазырыныгъэ зыфэдэр къыхагъэщыным фытегъэпсыхьагъэу мы олимпиадэр зэхащэ.

МКъТУ-м ифармацевтическэ факультет икIэлэегъаджэхэр осэшIхэм, джащ фэдэу зэхэщэн ыкIи методическэ комиссием ахэхьагъэх: медицинэ шIэныгъэхэмкIэ кандидатэу, доцентэу Артур Арутюновыр, фармацевтическэ шIэныгъэхэмкIэ кандидатэу, доцентэу Инна Бочкарёвар, биологие шIэныгъэхэмкIэ кандидатэу, доцентэу Ирина Дьяковар.

ЗэкIэмкIи олимпиадэм хэлэжьагъэх студенти 130-рэ, Урысыем ишъолъыр зэфэшъхьафхэм къагъэлъэгъогъэ командэ 28-рэ, Республикэхэу Беларусь ыкIи Казахстан къарыкIыгъэхэр. «Майкопскэ Mixt» зыфиIорэ командэр къэзгъэлъэгъогъэ студентхэр: Денис Шишкаловыр, Данила Дьяковыр, Александра Леконцевар, Тхьапшъэкъо Мадинэ.

Олимпиадэр едзыгъуищэу гощыгъагъэ:

А I-рэ едзыгъор — «Командэм ивидеолъэтегъэуцу», ащ студентхэр апшъэрэ еджапIэм, ащ икIэлэегъаджэхэм ыкIи командэм хэтхэм къащытегущыIагъэх.

Я II-рэ едзыгъор — тестовэ гъэцэкIэнхэр командэм къышIынхэр. Сыхьатым къыкIоцI студентхэр тестмэ яупчIэхэм джэуапхэр аратыжьыщтыгъэ, ахэр мыщ фэдэ лъэныкъомкIэ къаратыгъагъэх: фармацевтическэ химиер, фармацевтическэ технологиер, фармакогнозиер, биофармациер, токсикологическэ химиер, фармацием иэкономикэ ыкIи игъэIорышIэн, фармакологиер.

Я III-рэ едзыгъор — комплекснэ, IэпэIэсэныгъэ ориентированнэ ситуационнэ гъэцэкIэнхэр командэм къышIынхэр.

НыбжьыкIэмэ джэуап дэгъухэр атыгъэх ыкIи къалэжьыгъэ ящэнэрэ чIыпIэр къыдахыгъ. Ащ къегъэлъагъо университетым студентхэр дэгъоу зэрэщырагъаджэхэрэр ыкIи зэрэщагъэхьазырхэрэр!