Мэлылъфэгъум и 4-м мэхьанэшхо зиIэ хъугъэ-шIагъэм тикъэлэ шъхьаIэ чIыпIэ щиубытыгъ. Мыекъопэ къэралыгъо технологическэ университетымрэ Пшызэ къэзэкъыдзэ обществэм икъутамэу Мыекъуапэ щыIэмрэ зэзэгъыныгъэм зэдыкIэтхагъэх.

Урысыем идзэ-патриотическэ шэн-хабзэхэм зягъэушъомбгъугъэнымкIэ ыкIи студентхэм дзэ-патриотическэ пIуныгъэ икъу ягъэгъотыгъэнымкIэ шIуагъэ къэзытырэ зэдэлэжьэныгъэр мы зэзэгъыныгъэм къыделъытэ.

Зэзэгъыныгъэм изэдыкIэтхэн фэгъэхьыгъэ зэхэсыгъом МКъТУ-м иректорэу Къуижъ Саидэ тхьаматагъор щызэрихьагъ. Ащ хэлэжьагъэх Мыекъопэ къэзэкъ обществэм иатаманэу, есаулэу Сергей Захаровыр, ныбжьыкIэ политикэмкIэ МКъТУ-м ипроректорэу БрантIэ Мурат, Урысые обществэу «ШIэныгъэм» иреспубликэ къутамэ ипащэу Галина Измайловар, чIыдагъэ IофхэмкIэ МКъТУ-м икафедрэ идоцентэу, техническэ шIэныгъэхэмкIэ кандидатэу Николай Старковыр.

Зэзэгъыныгъэм зыIапэ кIэзыдзагъэхэр: МКъТУ-м иректорэу Къуижъ Саидэрэ Мыкъопэ къэзэкъ обществэм иатаманэу, есаулэу Сергей Захаровымрэ.

Студентхэм ядзэ-патриотическэ пIуныгъэ шIэныгъэ-методическэ екIолIакIэ къыфэгъотыгъэныр зэзэгъыныгъэм иIахьхэм ащыщ. Къэралыгъом ищынэгъончъагъэ, къэухъумэкIо къулыкъухэм ныбжьыкIэхэр ахэщэгъэнхэр пшъэрылъхэу зэдэлэжьэныгъэм иIэх.

Тренингхэр, лекциехэр, практическэ IофшIэнхэр студентхэм афызэхащэхэзэ ашIыщтых, гражданскэ пшъэдэкIыжьэу ахьырэр зыфэдэм щагъэгъозэщтых, нахь чанэу обществэм ищыIакIэ хагъэлэжьэщтых.

Ащ фэшъхьафэу, бгъуитIумэ язэхэт проектхэр зэрагъэцэкIэщтхэм атегущыIагъэх, псауныгъэм икъэухъумэн ыкIи физическэ культурэм ямэхьанэ къызэраIэтыщтым дэлэжьэщтых. Зэзэгъыныгъэм къыдыхэлъытагъэу зэнэкъокъу зэфэшъхьафхэр зэхащэщтых, дзэ ыкIи спорт лъэпкъ заулэхэмкIэ гъэцэкIэнхэр рагъэкIокIыщтых.

Апэрэ Iофтхьабзэу къэзэкъ классмэ арысхэр ыкIи къэзэкъ ныбжьыкIэхэр зыхагъэлэжьэщтхэр Мыекъопэ къэралыгъо технологическэ университетым  пчъэ зэIухыгъэхэм я Мафэу мэлылъфэгъум и 13-м зэхащэщтыр ары.