Мыекъопэ къэралыгъо технологическэ университетым непэ Iэнэ хъурае щызэхащагъ, ар зыфэгъэхьыгъагъэр Адыгэ Республикэм итхылъ Плъыжь иящэнэрэ къыдэкIыгъу ары.

ТхылъыкIэр едзыгъуитIоу зэхэт. Апэрэр къаухъумэрэ къэкIхэрэм ыкIи хьаIухэм афэгъэхьыгъ, джащ фэдэу ащ таксон 228-мэ афэгъэхьыгъэ къэбархэр къыдэхьагъэх. ЯтIонэрэ едзыгъом къагъэгъунэрэ псэушъхьэ лъэпкъ 279-мэ афэгъэхьыгъэ къэбархэр дэтых. Тхылъ Плъыжьым иапэрэ къыдэкIыгъо 2000-рэ илъэсыр ары къызыхаутыгъагъэр, ащ лъэпкъи 149-рэ къыдэхьэгъагъ, ащ щыщэу 103-р къэкIхэрэм ыкIи 46-рэ хьаIухэм афэгъэхьыгъагъ.

Зэхэсыгъом хэлэжьагъэх экологием ыкIи шIэныгъэм алъэныкъокIэ лажьэхэрэ зэлъашIэрэ лIыкIохэр: чIыопсым ыкIи тыкъэзыуцухьэрэ дунаим игъэфедэн и ГъэIорышIапIэ ипащэу игуадзэу Ешэ Аслъан, природнэ паркэу «ТхьакIышхом» ипащэу Шэуджэн Инвер, биологие шIэныгъэхэмкIэ докторэу, МКъТУ-м ипрофессорэу, АР-м итхылъ Плъыжь иапэрэ едзыгъоу «Ухэзыщэрэр. КъэкIхэрэр ыкIи хьаIухэр» зыфиIорэм пшъэдэкIыжь зыхьырэ иредакторэу Эмилия Сиротюк, тхылъым иятIонэрэ едзыгъоу «Псэушъхьэхэр» зыфиIорэм пшъэдэкIыжь зыхьырэ иредакторэу, биологие шIэныгъэхэмкIэ докторэу, профессорэу, И.Т. Трубилиным ыцIэ зыхьырэ Пшызэ къэралыгъо университетым фитопатологием, энтомологием ыкIи къэкIрэ уцхэм якъэухъумэн икафедрэ ипащэу Александр Замотайловыр ыкIи нэмыкIхэр.

Iофтхьабзэм къыщыхагъэщыгъэх ыкIи бгъэхалъхьэхэр щаратыгъэх тхылъыр зэхэзгъэуцуагъэхэ Эмилия Сиротюк, Александр Замотайловыр, Валерий Акатовыр ыкIи Владимир Шапаваловыр. Ахэмэ ушэтын IофшIэнэу агъэцэкIагъэр шIэныгъэ лъапсэ тфэхъугъ, тыкъэзыуцухьэрэ дунаим икъэухъумэнкIэ амалэу щыIэхэм ахагъэхъуагъ. Тхылъым иредактормэ зэралъытэрэмкIэ, цIыфхэр тыкъэзыуцухьэрэ дунаим дэй дэдэу зэрэдэзекIохэрэр къызэтегъэуцогъэн фае, экологическэ гъэсэныгъэм нахь зегъэушъомбгъугъэныр пшъэрылъ шъхьаIэхэм ащыщ.

Мыекъопэ къэралыгъо технологическэ университетым экологическэ Iофтхьабзэхэр мымакIэу регъэкIокIых, чIыпIэ флорэмрэ фаунэмрэ язэгъэшIэн ахэр тегъэпсыхьагъэх. Джащ фэдэу, мэзхэр укъэбзыгъэнхэмкIэ, зыфэдэ къэмыхъугъэ къэкIхэрэмрэ псэушъхьэхэмрэ къызэтегъэнэгъэнхэмкIэ ыкIи къэухъумэгъэнхэмкIэ проектыкIэхэр пхыращых, экологическэ гъэсэныгъэр лъагъэкIуатэ.