Урысыем и УФСИН и ГъэIорышIапIэу Адыгэ Республикэм щыIэм ипащэхэр МКъТУ-м истудентхэм аIукIагъэх
Урысыем и УФСИН и ГъэIорышIапIэу Адыгэ Республикэм щыIэм иIофышIэмэ яшIоигъоныгъэкIэ Мыекъопэ къэралыгъо технологическэ университетым зэIукIэ щыкIуагъ, ащ хагъэлэжьагъэх «МашIо щынэгъончъэныр» зыфиIорэ сэнэхьатыр зыщызэрагъэгъотрэ кафедрэр къэзыухыхэрэ студентхэр.
Iофтхьабзэм къыдыхэлъытагъэу мэшIогъэкIосэным пылъ къулыкъоу инспекцием хахьэрэм ипащэу, IэкIоцI къулыкъум имайорэу Александр Однолеткэм УФСИН-м щылажьэхэрэмэ фэгъэкIотэнэу яIэхэр, ащ къулыкъу щыпхьыным шIуагъэу пылъхэр къыIотагъэх.
ГъэIорышIапIэм кадрэхэмкIэ иотделение ипащэу, IэкIоцI къулыкъум имайорэу Владимир Вержбицкэм къэзэрэугъоигъэхэм игъэкIотыгъэу къафиIотагъ Урысыем и УФСИН и ГъэIорышIапIэу Адыгэ Республикэм щыIэм уIухьаным ыкIи къулыкъу щыпхьыным пае шапхъэу пылъхэр, машIо щынэгъончъэным епхыгъэ структурнэ подразделением Iоф зэрэщашIэрэ шIыкIэр.
Мыекъопэ къэралыгъо технологическэ университетымрэ Урысыем и УФСИН и ГъэIорышIапIэу Адыгэ Республикэм щыIэмрэ зэрэзэдэлэжьэщтхэ шапхъэхэм ягъэнэфэгъэн ары зэфэхьысыжьэу зэIукIэм фэхъугъэр. Ащ пае егъэджэн экскурсиехэр зэхащэнхэу, специалистхэм ягъэхьазырынкIэ практическэ ушэтынхэр ашIынхэу рахъухьагъ.
МониторингымкIэ, моделированиемкIэ ыкIи Iофтхьабзэхэр зэхэщэгъэнхэмкIэ МЧС-м и ГъэIорышIапIэу АР-м щыIэм иIофышIэу Хъут Марет студентмэ къафиIотагъ кризиснэ Iофхэм ягъэIорышIэпIэ Гупчэ структурнэ подразделение шъхьафэу МЧС-м зэрэхахьэрэр, ЗыкI къэралыгъо системэм ипшъэрылъхэм ягъэцэкIэн зэрэдэлажьэхэрэр.
МЧС-м IофшIэнэу щагъэцакIэрэр, стажировкэр зэращахьырэ шIыкIэр, IофшIэпIэ чIыпIэ щыгъотыгъэным шапхъэу пылъхэр студентхэм зэрагъэшIагъэх, IофшIэным ылъэныкъокIэ хэхъоныгъэхэр ашIынхэмкIэ, сэнэхьатыр зэрагъэгъотынымкIэ, гъэIорышIапIэм иподразделение шъхьаIэ къулыкъу щахьынымкIэ шIэныгъэ икъу агъотыгъ.
ЧIэтIупщыгъом нэсыгъэ студентхэу IофшIапIэм Iухьэ зышIоигъохэм пэшIорыгъэшъэу ядокументхэр организацием ратыхэмэ зэрэнахьышIур зэIукIэм къыщаIуагъ. ХэушъхьафыкIыгъэу къыхагъэщыгъ, МКъТУ-р къэзыухыгъабэ джырэ уахътэм МЧС-м и ГъэIорышIапIэу АР-м щыIэм зэрэщылажьэхэрэр, ар непэрэ ныбжьыкIэхэмкIэ щысэ дэгъу мэхъу.