Адыгеим илIыкIохэр Беларусь щыIэх — стратегическэ зэдэлэжьэныгъэр
Мы мафэхэм Адыгэ Республикэм илIыкIо куп Республикэу Беларусь кIуагъэх. ДэкIыгъо Iофтхьабзэм Iофыгъуабэ къызэлъиубытыгъ, ахэр гъэсэныгъэм ыкIи социальнэ-экономическэ лъэныкъохэм афэгъэхьыгъагъэх.
ЛIыкIо купым Мыекъопэ къэралыгъо технологическэ университетым ыцIэкIэ хэтыгъэх шIэныгъэ IофшIэнымкIэ ыкIи МКъТУ-м инновационнэ хэхъоныгъэхэр егъэшIыгъэнхэмкIэ проректорэу Татьяна Овсянниковамрэ МКъТУ-м биотехнологиехэмкIэ ишIэныгъэ-гъэсэныгъэ гупчэ ипащэу Хьаткъо Зуретрэ.
ГъэсэныгъэмкIэ Беларусь иминистрэ игуадзэу Александр Бахановичым дашIыгъэ зэIукIэм щытегущыIагъэх ныбжьыкIэ проектэу «Уигухэлъ факIу» зыфиIорэ Урысые зэнэкъокъум, джащ фэдэу мэкъу-мэщ промышленнэ комплексэу «Аграрий» зыфиIорэ лъэныкъомкIэ студенческэ шIоигъоныгъэхэм я Урысые зэнэкъокъоу МКъТУ-м щырагъэкIокIырэм кIэлэеджакIохэр къазэрэхагъэлэжьэщтхэм.
Республикэу Беларусь шIэныгъэхэмкIэ и Лъэпкъ Академиерэ Мыекъопэ къэралыгъо технологическэ университетымрэ зэрэзэдэлэжьэщт лъэныкъохэр агъэнэфагъэх, ахэр нахьыбэрэмкIэ зыфэгъэхьыгъэхэр мэкъу-мэщ промышленнэ комплексыр, шъолъырым имэкъу-мэщ культурэхэм ягенетикэ шъхьаIэхэм, чылапхъэхэм ыкIи тыкъэзыуцухьэрэ дунаим диштэрэ технологиехэу агъэфедэхэрэр, гъомлэпхъэ производствэр арых.
ШIэныгъэ ыкIи гъэсэныгъэ зэпхыныгъэхэу тихэгъэгухэм яIэхэр гъэпытэгъэнхэмкIэ мы Iофтхьабзэр лъэубэкъушIоу щыт, мэкъу-мэщым ылъэныкъокIи, инновациехэмкIэ хэхъоныгъэхэр шIыгъэнхэмкIи мэхьанэшхо зиIэ Iофыгъу.