ШIэныгъэлэжьхэм ясовет
Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ МКъТУ-м иректорэу Къуижъ Саидэ. Университетым IофшIэнэу ыгъэцакIэхэрэм ыкIи хэхъоныгъэу ышIыщтхэм афэгъэхьыгъэ упчIэхэм зэхэсыгъом щытегущыIагъэх. Iофтхьабзэм хэлэжьагъ МКъТУ-м ипрезидентэу, профессорэу ТхьакIущынэ Аслъан.
Зэхэсыгъом ипэублэм гъэтхапэм и 22-м къалэу Москва дэт «Крокус Сити Холл» къыщыхъугъэ тхьамыкIагъом хэкIодагъэхэм зы такъикъэ афэшъыгъуагъэх. ЧIыпIэ зэжъу ифэгъэ цIыфхэм афэтхьаусыхагъэх ыкIи IэпыIэгъу арагъэкIынэу зэрэхьазырхэр къыхагъэщыгъ.
Ащ ыуж шIэныгъэлэжьхэм ясовет хэтхэр повесткэ шъхьаIэм хэт упчIэмэ язэхэфын фежьагъэх.
Егъэджэн IофшIэнымкIэ проректорэу Людмила Задорожнаяр университетыр зэрауплъэкIугъэмкIэ илъэс зэфэхьысыжьхэр къышIыгъэх. Ащ хэтыгъэх егъэджэн процессыр зэрэзэхэщагъэр, шIэныгъэ-ушэтын IофшIэнэу рагъэкIокIырэр, нэмыкI лъэныкъохэу университетыр зыдэлажьэхэрэр. Университетым иуплъэкIунхэу ежьхэм зэхащагъэхэм зэфэхьысыжьхэр фашIыгъэх ыкIи гъэсэныгъэр нахьышIу шIыгъэнымкIэ екIолIакIэхэр къыхагъэщыгъэх.
МКъТУ-м и Политехническэ колледж ипащэу ХъутIыжъ Заурбэч колледжым инепэрэ зытет зыфэдэм къытегущыIагъ, гъэхъагъэу яIэхэм ыкIи ягумэкIыгъохэм. Колледжым хэхъоныгъэхэр егъэшIыгъэнхэмкIэ шIэгъэн фае лъэныкъохэм, егъэджэн процессыр гъэкIэжьыгъэнымкIэ ыкIи кадровэ Iофэу щыIэхэм, организацие зэфэшъхьафхэм зарэдэлажьэхэрэм ар къатегущыIагъ.
Поселкэу Яблоновскэм МКъТУ-м икъутамэу дэтым ипащэу ЕкъутэкI Руслъан гурыт профессиональнэ гъэсэныгъэм хэхъоныгъэ егъэшIыгъэным къытегущыIагъ. Докладым къызэрэщыхигъэщыгъэмкIэ, сэнэхьатэу къутамэм щарагъэгъотырэмэ ахагъэхъон гухэлъ яI, материальнэ-техническэ базэр ыкIи гъэсэныгъэ процессыр нахьышIу ашIыщтых.
НыбжьыкIэ политикэмкIэ проректорэу БрантIэ Мурат гъэсэныгъэ IофшIэнэу университетым чIэлъым къытегущыIагъ. Студенческэ щыIэныгъэм, ныбжьыкIэ шIоигъоныгъэхэм, культурнэ Iофтхьабзэхэу рагъэкIокIыхэрэм шъхьафэу тегущыIагъэх.
Повесткэ шъхьаIэм лъыпыдзагъэу университетым гъэсэныгъэ программэ зэфэшъхьафхэмкIэ узэрэчIэхьащтым игугъу ашIыгъ. А Iофыгъом къытегущыIагъ МКъТУ-м иприемнэ комиссие пшъэдэкIыжь зыхьырэ исекретарэу Бэрзэдж Розэ.
«Студентэу университетым чIэсмэ яеджапкIэ къегъэIыхыгъэным» ыкIи «ШIэныгъэлэжь цIэ лъапIэр фэгъэшъошэгъэныр» зыфиIохэрэ IофыгъохэмкIэ зэхэсыгъор аухыгъ.
Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо къыщаIэтыгъэ упчIэхэр зэкIэ зэхафыгъэх.